కుటుంబ సభ్యుల కోసం విమానం గాల్లో ఉండగానే కాక్‌పిట్ తలుపు తెరిచిన పైలట్

ప్రపంచవ్యాప్తంగా విమాన ప్రయాణం అంటేనే కఠినమైన భద్రతా ప్రమాణాలు గుర్తుకొస్తాయి. అత్యంత కచ్చితమైన నియమాలతో ప్రయాణికుల రక్షణకు ప్రాధాన్యత ఇస్తుంటారు. కానీ ఇటీవల బ్రిటిష్ ఎయిర్‌వేస్‌కు చెందిన ఒక పైలట్ చేసిన నిర్లక్ష్యం అందరినీ ఆశ్చర్యపరిచింది. తన కుటుంబ సభ్యుల కోసం విమానం గాల్లో ఉండగానే.. కాక్‌పిట్ తలుపును తెరిచాడు. ఈ ఘటనపై విమానయాన సంస్థ తీవ్ర చర్యలు తీసుకున్నాయి. ముఖ్యంగా సదరు పైలట్‌ను సస్పెండ్ చేశారు.

లండన్ హీత్రూ విమానాశ్రయం నుంచి న్యూయార్క్ వెళ్లే బోయింగ్ 777-300 విమానంలో పైలట్ ఒక కీలక భద్రతా నిబంధనను ఉల్లంఘించాడు. తన కుటుంబ సభ్యులు విమానంలో ప్రయాణికులుగా ఉండటంతో.. వారికి విమానం నడిపే విధానాన్ని చూపించాలనే ఉద్దేశంతో ప్రయాణం మధ్యలో కాక్‌పిట్ తలుపును తెరిచి ఉంచాడు. ఈ చర్య ప్రయాణికులలో తీవ్ర ఆందోళన కలిగించింది. అక్కడున్న వారంతా ఒక్కసారి తలుపు తెరవడంతో విపరీతంగా భయపడిపోయారు. ముఖ్యంగా సిబ్బందిని పిలిచి విషయం వివరించారు. కానీ సిబ్బంది కూడా ఏమీ చేయలేకపోవడంతో.. విమానం న్యూయార్క్‌లో దిగిన వెంటనే ఈ ఘటనపై విమానయాన సంస్థకు ఫిర్యాదు చేశారు.

అలాగే ఈ ఘటనకు సంబంధించిన ఫోటోలు, వీడియోలను సాక్ష్యాలుగా అధికారులకు చూపించారు. ఆపై సోషల్ మీడియాలో కూడా పెట్టగా నెట్టింట తెగ వైరల్ అయ్యాయి. దీనిపై ఆందోళన వ్యక్తం చేసిన విమానయాన సంస్థ.. పైలట్‌ను వెంటనే సస్పెండ్ చేసింది. ఈ ఘటన కారణంగా లండన్‌కు తిరిగి రావాల్సిన విమానం కూడా రద్దయింది. ఫలితంగా వందలాది మంది ప్రయాణికుల ప్రయాణ ప్రణాళికలు దెబ్బతిన్నాయి. అయితే కంపెనీ పాలసీ ప్రకారం.. భద్రతా నిబంధనలను ఉల్లంఘించిన ఆ పైలట్‌ను వెంటనే సస్పెండ్ చేశారు.

2021 సెప్టెంబర్ 11వ తేదీన జరిన ఉగ్రవాద దాడుల తర్వాత ప్రపంచ వ్యాప్తంగా విమాన భద్రతా నిబంధనలు మరింత కఠినతరం అయ్యాయి. పైలట్లు విమానం గాల్లో ఉన్నప్పుడు కాక్‌పిట్ తలుపులను తప్పనిసరిగా లోపలి నుండి లాక్ చేసి ఉంచాలి. అనధికారిక వ్యక్తులు లోపలికి రాకుండా ఇది నిరోధిస్తుంది. లేదంటే ఎవరైనా కాక్‌పిట్‌లోకి చొరబడి ఎంతైనా రచ్చ చేసే అవకాశం ఉంటుంది. ముఖ్యంగా ఈ ఘటనపై బ్రిటిష్ ఎయిర్‌వేస్‌కు చెందిన ఓ ప్రతినిధి స్పందించారు. విమానయానంలో భద్రతకు అత్యధిక ప్రాధాన్యత ఇస్తామని వివరించారు. ఇలాంటి సంఘటనలపై లోతైన విచారణ జరుపుతామని స్పష్టం చేశారు. పూర్తి విచారణ తర్వాతే పైలెట్‌పై చర్యలకు ఉపక్రమిస్తామన్నారు.