ధర్మవరంలో పాకిస్థాన్ ఉగ్రమూలాల కేసు.. వెలుగులోకి సంచలన విషయాలు

శ్రీ సత్యసాయి జిల్లా ధర్మవరంలో పాకిస్థాన్ ఉగ్రమూలాలు బయటపడటంతో జనం ఉలిక్కిపడుతున్నారు. ఉగ్రవాది నూర్ మహమ్మద్‌ను ఐబీ, పోలీసులు సంయుక్తంగా అదుపులోకి తీసుకున్నాయి. ఈ కేసులో విస్తుగొలిే వాస్తవాలు వెలుగులోకి వస్తున్నాయి. ఏకంగా 37 వాట్సాప్ గ్రూపుల్లో నిందితుడు సభ్యుడిగా ఉన్నట్లు వెల్లడయ్యింది. అతడి మొబైల్ వాట్సాప్ గ్రూపుల్లో బిన్ లాడెన్, ఆల్ ఖైదా, లష్కరే తొయిబా, ఇండియన్ ముజాహిద్దీన్, జైషే మహమ్మద్ వంటి ఉగ్ర ముఠాలకు చెందిన వీడియోలను పోలీసులు గుర్తించారు.

రోజు కూలీగా జీవనం సాగిస్తున్న నూర్ మహమ్మద్.. ధర్మవరం పట్టణం లోనకోటలో ఇటీవలే కొత్త ఇంటిని నిర్మించుకున్నాడు. రోజు కూలీకి అంత మొత్తం ఎక్కడి నుంచి వచ్చిందనే పోలీసుల ఆరా తీస్తున్నారు. సత్యసాయి జన్మదిన వేడుకల్లో పాల్గొనేందుకు ప్రధాన మంత్రి నరేంద్ర మోదీ పుట్టపర్తికి రానున్నారు. ఈ పర్యటన అంశం కూడా అతడు సభ్యుడిగా ఉన్న పాక్ ఉగ్రవాద వాట్సాప్ గ్రూపుల్లో చర్చకు వచ్చినట్లు పోలీసులు అనుమానిస్తున్నారు. ఇటీవల కడప జిల్లా రాయచోటిలోనూ ఉగ్రవాదుల మూలాలు వెలుగులోకి వచ్చిన సంగతి తెలిసిందే.

ప్రస్తుతం కడప సెంట్రల్ జైల్లో రిమాండ్ ఖైదీగా ఉన్న నూర్‌ను మరింత లోతుగా విచారించేందుకు పోలీసులు కస్టడీ పిటిషన్ వేయనున్నారు. కోర్టులో సోమవారం పిటిషన్ దాఖలు చేయనున్నట్టు పోలీసులు తెలిపారు. కాగా, పాక్‌కు చెందిన జైషే మహమ్మద్ ఉగ్రవాద సంస్థతో నూర్‌కు సంబంధాలు ఉన్నట్లు నిఘా వర్గాలు గుర్తించాయి. యువతను ఉగ్రవాదం వైపు ఆకర్షిస్తున్నట్టు అధికారులు చెబుతున్నారు.

నూర్ మహమ్మద్ ధర్మవరంలోని ఓ బిర్యానీ సెంటర్‌లో కుక్‌గా పనిచేస్తుండగా.. అతడి తల్లి, చెల్లెలు ఇంట్లో బీడీలు చుడుతుంటారు. పకడ్బందీగా ప్రణాళిక రూపొందించుకుని పగలు బిర్యానీ సెంటర్‌లో పనిచేస్తూ రాత్రిపూట ఉగ్రవాద సంస్థలతో సంబంధాలు కొనసాగిస్తున్నట్టు తేలింది. ఇతర రాష్ట్రాలకు చెందిన పలువురితోనూ అతడికి సంబంధాలు ఉన్నట్లు ఎన్‌ఐఏ, ఐబీ అధికారులు గుర్తించారు. అలాగే, తాడిపత్రికి చెందిన ఓ మహిళతో నూర్‌కు వివాహేతర సంబంధం ఉన్నట్లు వెలుగులోకి వచ్చింది.

అయితే, గతేడాది రాయదుర్గంలో ఉగ్రవాదులతో లింకులు ఉన్నాయనే ఆరోపణలపై ఓ టెకీని ఎన్‌ఐఏ అరెస్టు చేసింది. అలాగే, మూడు రోజులు రెక్కీ నిర్వహించిన ఎన్‌ఐఏ.... ఓ రిటైర్డ్ హెడ్మాస్టర్‌ కుమారుడిని అరెస్టు చేశారు. బెంగళూరులోని ఓ ఐటీ కంపెనీలో పనిచేస్తున్న ఆ యువకుడు...రామేశ్వరం కేఫ్‌ పేలుళ్ల నిందితులతో కలిసి నివసించినట్లు గుర్తించారు.