జూనియర్ ఎన్టీఆర్‌పై అనుచిత వ్యాఖ్యలు.. టీడీపీ ఎమ్మెల్యేదే అంటూ ఆడియో వైరల్

జూనియర్ ఎన్టీఆర్‌‌‌పై పరుష పదజాలంతో మాట్లాడుతోన్న ఆడియో ఒకటి సోషల్ మీడియాలో వైరల్ అవుతోంది. ఇది అనంతపురం అర్బన్ టీడీపీ ఎమ్మెల్యేది అంటూ సోషల్ మీడియాలో ప్రచారం సాగుతోంది. జూనియర్ ఎన్టీఆర్ వార్-2 సినిమా విడుదల సందర్భంగా తనను స్పెషల్ షోకు ఆహ్వానించిన అభిమానితో బూతులు మాట్లాడుతున్న వ్యక్తి.. యంగ్‌ టైగర్‌ ఎన్టీఆర్‌పై అభ్యంతకరమైన వ్యాఖ్యలు చేయడం ఆడియోలో వినిపిస్తోంది. ‘‘ఆ ల***.. కొడుకు సినిమాలు ఎలా చూస్తారు.. నారా లోకేష్‌కు వ్యతిరేకంగా ఉన్న జూనియర్ ఎన్టీఆర్ సినిమాలు ఆడనివ్వను.. పర్మిషన్ లేకుండా ఎలా ప్రత్యేక షో వేస్తారు.. వాడి సినిమాకు ఎట్లాబోతారు.. కూలీకి పోండి.. పార్టీకి కలిసిరాని వ్యక్తి సినిమాకు ఎలావెళ్తారు.. ఆ సినిమా వేస్తే కాల్చేస్తాను.. ఆ సినిమా రీల్ కూడా రాదు.. నా అనుమతి లేకుండా సినిమా ఎలా ప్రదర్శిస్తారు.. వాడితో డ్యాన్సులు చేస్తారా? మీరు.. సినిమా చూడండి మీకు అప్పుడు చెబుతాను.. సినిమాను ప్రదర్శిస్తే మధ్యలోనే కాల్చేస్తా.. వాడి సినిమా ఈ టైమ్‌లో ఎట్లా వేయిస్తారు.. ఆడించుకోండి చూద్దాం’’ అంటూ అతడికి హెచ్చరించడం ఆడియాలో స్పష్టంగా వినిపిస్తోంది.

అయితే, ఈ ఆడియోలో మాట్లాడిన వ్యక్తి అనంతపురం అర్బన్ ఎమ్మెల్యే దగ్గుపాటి ప్రసాద్ అంటూ సోషల్ మీడియాలో వైరల్ చేస్తున్నారు. ఎమ్మెల్యే దగ్గుపాటి ప్రసాద్‌ను వార్-2 సినిమా ప్రత్యేక షోకు జూనియర్ ఎన్టీఆర్ అభిమానుల సంఘం నేత ధనుంజయ నాయుడు ఆహ్వానించాడని, ఈ సమయంలో ఆయనపై ఆగ్రహం వ్యక్తం చేశారని ప్రచారం జరుగుతోంది. దీనిపై యంగ్ టైగర్ అభిమానులు తీవ్ర ఆగ్రహం వ్యక్తం చేస్తున్నారు. బాధ్యతాయుతమైన ప్రజా ప్రతినిధి ఇంత దారుణంగా ఎలా మాట్లాడుతున్నారని, తమ అభిమాన నటుడు సినిమా ప్రదర్శనలను అడ్డుకుంటానని బెదిరింపులకు దిగడంపై మండిపడుతున్నారు.

ఇవి కేవలం వ్యక్తిగత ద్వేషం కాదని, రాజకీయ కక్ష సాధింపులో భాగమని ఆరోపిస్తున్నాయి. కాగా, ఈ ప్రచారంపై టీడీపీ ఎమ్మెల్యే దగ్గుబాటి ప్రసాద్ స్పందించారు. ఆ అడియోలో మాట్లాడింది తాను కాదని, ఇదంతా రాజకీయ కుట్ర అని స్పష్టం చేశారు. అంతేకాదు, జూనియర్ ఎన్టీఆర్ అభిమానులకు ఆయన క్షమాపణ చెప్పారు. రాజకీయ కారణాలతోనే గతవారం పది రోజులుగా తనపై అసత్య ప్రచారం చేస్తున్నారని, ఇది కూడా అందులో భాగమని ఆయన వివరణ ఇచ్చారు. తాము నందమూరి అభిమానులమని, బాలకృష్ణ, జూనియర్ ఎన్టీఆర్‌లంటే తమకు ఎంతో గౌరవమని అన్నారు. మీడియా మిత్రుడు ఒకరు ఈ ఆడియోను తన దృష్టికి తీసుకొచ్చాడని, తాను బూతులు మాట్లాడినట్టు ప్రచారం చేస్తున్నది నిజం కాదన్నారు. తాను మాట్లాడిన ఆడియో అంటూ తప్పుడు ప్రచారం చేస్తున్నారని మండిపడ్డారు.