ఆంధ్రప్రదేశ్ ప్రజలకు అలర్ట్.. రాష్ట్రంలో మళ్లీ వర్షాలు

ఏపీవాసులకు అలర్ట్.. రాష్ట్రంలో వానలు మళ్లీ మొదలుకానున్నాయి. వాయువ్య బంగాళాఖాతం, దానికి ఆనుకుని ఉన్న పశ్చిమ మధ్య బంగాళాఖాతంలో దక్షిణ ఒడిశా- ఉత్తరాంధ్ర తీరాల మీదుగా ఉపరితల ఆవర్తనం కొనసాగుతోంది. దీని ప్రభావంతో రేపు (ఆదివారం) శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు, విశాఖ జిల్లాల్లో అక్కడక్కడ తేలికపాటి నుంచి మోస్తరు వర్షాలు పడే అవకాశం ఉందని ఏపీ విపత్తుల నిర్వహణ సంస్థ వెల్లడించింది. మరోవైపు సెప్టెంబర్ 13న బంగాళాఖాతంలో అల్పపీడనం ఏర్పడుతుందని భారత వాతావరణ విభాగం అంచనా వేసింది. ఈ అల్పపీడనం పశ్చిమ-వాయవ్య దిశగా పయనించే అవకాశం ఉందని తెలిపింది. ఏపీ, ఒడిశా, తెలంగాణ వైపుగా ఈ అల్పపీడనం కదిలే అవకాశాలు ఉన్నట్లు వెల్లడించింది.

ఈ అల్పపీడనం ప్రభావంతో సెప్టెంబర్ నెలాఖరు వరకు తెలుగు రాష్ట్రాలలో వర్షాలు కురుస్తాయని భారత వాతావరణ విభాగం తెలిపింది. అలాగే వచ్చే 4 రోజుల్లో రాష్ట్రంలోని పలుచోట్ల తేలికపాటి నుంచి మోస్తరు వర్షాలు కురవొచ్చని అమరావతి వాతావరణ విభాగం తెలిపింది. మరోవైపు శుక్రవారం రోజున పార్వతీపురం మన్యం, అనకాపల్లి, విజయనగరం, అల్లూరి, విశాఖపట్నం జిల్లాల్లో తేలికపాటి నుంచి ఓ మోస్తరు వానలు కురిశాయి. అలాగే రాష్ట్రవ్యాప్తంగా కొన్ని ప్రాంతాల్లో వేడి, ఉక్కపోత వాతావరణం కూడా ఉంది. ఈ నేపథ్యంలో అల్పపీడనం ఏర్పడిందన్న వార్తలు కొంచెం ఉపశమనం కల్గిస్తున్నాయి. ఈ నెలాఖరు వరకూ వర్షాలు కురుస్తాయన్న వాతావరణ శాఖ అంచనాలతో ఉక్కబోత నుంచి ఉపశమనం లభించే అవకాశాలు ఉన్నాయి.

 మరోవైపు శ్రీశైలం ప్రాజెక్టులో ఒక గేటును అధికారులు తెరిచారు. ఇటీవలే శ్రీశైలం జలాశయం గేట్లు అధికారులు మూసివేశారు. అయితే తుంగభద్ర జలాశయం నుంచి వరద వస్తుండటంతో శ్రీశైలం డ్యామ్ నిండుకుంది. దీంతో అధికారులు శ్రీశైలం ప్రాజెక్టులో ఒక గేటును 10 అడుగుల మేర ఎత్తి నీటిని విడుదల చేశారు. శ్రీశైలం ప్రాజెక్టు గేట్లు తెరవడం ఈ సీజన్‌లో ఇది ఐదోసారని అధికారులు చెప్తున్నారు. ప్రస్తుతం శ్రీశైలం ప్రాజెక్టులో నీటిమట్టం 884.1 అడుగులుగా ఉందని అధికారులు చెప్తున్నారు.