తప్పించుకునిపోయిన ఇద్దరు ఖైదీలు మళ్లీ పోలీసులకు చిక్కారు

అనకాపల్లి జిల్లాలో రిమాండ్ ఖైదీల పరారీ ఎపిసోడ్‌కు ఎండ్ కార్డు పడింది. జైలు అధికారిపై దాడి చేసి పరారైన ఇద్దరు ఖైదీలు.. తమ ప్రయత్నం బెడిసికొట్టి పోలీసులకు దొరికిపోయారు. అనకాపల్లి జిల్లాలోని చోడవరం సబ్‌ జైలు నుంచి శుక్రవారం సాయంత్రం ఇద్దరు ఖైదీలు పరారయ్యారు. జైలు అధికారిపై సుత్తితో దాడి చేసి, అనంతరం అతని వద్ద నుంచి తాళాలు లాక్కొని గెటు తెరుచుకుని పారిపోయారు. అల్లూరి జిల్లా అనంతగిరికి చెందిన పంచాయతీ మాజీ కార్యదర్శి నక్కా రవికుమార్ అనే వ్యక్తి పింఛన్ నగదు కాజేశాడన్న ఆరోపణపై అరెస్ట్ అయ్యాడు. ప్రస్తుతం చోడవరం సబ్ జైలులో రిమాండ్ ఖైదీగా ఉన్నాడు. అలాగే ఓ దొంగతనం కేసులో బెజవాడ రాము అనే వ్యక్తి అరెస్ట్ అయ్యి అదే జైలులో రిమాండ్‌‍లో ఉన్నారు.

అయితే శుక్రవారం సాయంత్రం వీరిద్దరూ భోజనం తయారీ కోసం వంటగదికి తీసుకెళ్లారు. ఆ తర్వాత వంటగది నుంచి బయటకొచ్చి వార్డర్ వి. వీర్రాజుపై సుత్తితో దాడి చేశారు. అనంతరం అతని వద్ద నుంచి తాళాలు లాక్కొని మెయిన్ గేటు తీసుకుని బయటకు పారిపోయారు. ఈ ఘటన రాష్ట్రవ్యాప్తంగా సంచలనం రేపింది. ఈ నేపథ్యంలో పరారైన ఖైదీల కోసం పోలీసులు గాలింపు చర్యలు చేపట్టారు. టాస్క్ ఫోర్స్ పోలీసులు వీరిద్దరి కోసం ముమ్మరంగా గాలించారు. అల్లూరి జిల్లా, విశాఖ, విజయనగరం జిల్లాల్లో గాలించారు. బస్టాండ్లు, రైల్వే్స్టేషన్లు, రోడ్లు వెంబడి గాలించారు. సీసీటీవీ ఫుటేజీ సాయంతో ఖైదీల ఆచూకీ కనిపెట్టే ప్రయత్నం చేశారు.

ఈ క్రమంలోనే టాస్క్ ఫోర్స్ పోలీసులు గంటల వ్యవధిలోనే వారిద్దరిని పట్టుకుని అనకాపల్లి పోలీసులకు అప్పగించారు. దీంతో అలా వెళ్లినవారు ఇలా దొరికిపోయినట్లైంది. మరోవైపు దాడిలో గాయపడిన జైలు అధికారి వీర్రాజు పరిస్థితి సాధారణంగా ఉందని వైద్యులు తెలిపారు. మరోవైపు అనకాపల్లి జిల్లా ఎస్పీ తుహిన్ సిన్హా ఈ ఘటనపై సమీక్షించారు. సమాచారం అందిన వెంటనే సబ్ జైలుకు వెళ్లిన ఆయన.. జైలులో భద్రతా లోపాలపై సమీక్షించారు. ఇలాంటి ఘటనలు పునరావృతం కాకుండా చర్యలు తీసుకుంటామన్నారు. ఇక పారిపోయిన ఖైదీలు గంటల వ్యవధిలో చిక్కడంతో పోలీసులు కూడా ఊపిరి పీల్చుకుంటున్నారు.