టారిఫ్ వార్ వేళ భారతీయులకు అమెరికా గుడ్ న్యూస్.. ఈబీ-5 వీసాలో కీలక ముందడుగు

అమెరికాలో శాశ్వత నివాసం (గ్రీన్‌కార్డు) కోసం ఎదురుచూస్తున్న భారతీయ పెట్టుబడిదారులకు గొప్ప శుభవార్త. యునైటెడ్ స్టేట్స్ స్టేట్ డిపార్ట్‌మెంట్ విడుదల చేసిన తాజా వీసా బులెటిన్ ప్రకారం.. ఈబీ-5 వీసా ప్రాసెసింగ్ తేదీలు ముందుకు జరిగాయి. అక్టోబర్ నెల కోసం విడుదల చేసిన ఈ బులెటిన్‌లో.. ఈబీ-5 ఇన్వెస్టర్ ప్రోగ్రామ్ కింద భారతీయులకు సంబంధించిన ఫైనల్ యాక్షన్ డేట్ దాదాపు 15 నెలలు ముందుకు వచ్చింది. ఇది గ్రీన్‌కార్డు కోసం వేచి చూస్తున్న వేలాది భారతీయ కుటుంబాలకు పెద్ద ఊరట కల్పించే విషయం.

ఈబీ-5 వీసా అనేది అమెరికాలో స్థిరపడాలనుకునే విదేశీయులకు వేగవంతమైన మార్గంగా భావిస్తున్నారు. అయితే ఈ వీసా పొందాలంటే ఒక వ్యక్తి అమెరికా ఆర్థిక వ్యవస్థలో 8,00,000 డాలర్లు ( భారత కరెన్సీ ప్రకారం సుమారు రూ. 7 కోట్లు) పెట్టుబడి పెట్టాల్సి ఉంటుంది. గతంలో ఈ వీసా కోసం పెద్ద ఎత్తున ఆలస్యం జరిగేది. అయితే ఇప్పుడు వచ్చిన ఈ అసాధారణ ముందడుగుతో భారతీయుల్లో కొత్త ఆశలు చిగురించాయి. ముఖ్యంగా కంప్యూటర్ సైన్స్, బయోటెక్నాలజీ, ఫైనాన్స్ వంటి రంగాలలో ఉన్న భారతీయ విద్యార్థులు.. హెచ్-1బీ వీసా హోల్డర్లలో ఈబీ-5 వీసా పట్ల ఆసక్తి పెరిగిందని నిపుణులు అభిప్రాయ పడుతున్నారు.

ముఖ్యంగా పెట్టుబడి పెట్టడం ద్వారా గ్రీన్ కార్డ్ పొందే ఈబీ-5 కేటగిరీలో భారతీయులకు పెద్ద ఊరట దక్కింది. ఈ కేటగిరీలో వీసా ప్రాసెసింగ్ తేదీ దాదాపు 15 నెలలు ముందుకు కదిలి 2021 ఫిబ్రవరి 1 వరకు చేరుకుంది. ఇది ఈబీ-5 వీసా కోసం చాలా కాలంగా ఎదురు చూస్తున్న భారతీయ పెట్టుబడిదారులకు, వారి కుటుంబాలకు ఉపశమనం కలిగించే వార్త. ఇదే కేటగిరీలో చైనాకు చెందిన దరఖాస్తులకు మాత్రం 2015 డిసెంబర్ 8 వద్దే తేదీ నిలిచిపోయింది.

ఇతర వీసా కేటగిరీల పరిస్థితి

ఈబీ-1 వీసా: ఈ కేటగిరీలో భారతదేశానికి చెందిన దరఖాస్తులకు ఎలాంటి మార్పు లేదు. ఇది 2022 ఫిబ్రవరి 15 వద్దే ఉంది. అయితే చైనాకు చెందిన దరఖాస్తులకు మాత్రం ప్రాసెసింగ్ తేదీ 5 వారాలు ముందుకు వచ్చింది.

ఈబీ-2 వీసా: ఈ వీసా కోసం దరఖాస్తు చేసుకున్న భారతీయులకు ప్రాసెసింగ్ తేదీ 3 నెలలు ముందుకు వచ్చి 2013 ఏప్రిల్ 1 వరకు చేరుకుంది.

ఈబీ-3 వీసా: నైపుణ్యం కలిగిన కార్మికులు, నిపుణులకు సంబంధించిన ఈ కేటగిరీలో భారతీయుల తేదీ 3 నెలలు ముందుకు కదిలి 2013 ఆగస్టు 22 వరకు చేరింది.

దీనికి తోడు ఈబీ-5 సెట్-అసైడ్ కేటగిరీలైన రూరల్, హై అన్‌ఎంప్లాయిమెంట్, ఇన్‌ఫ్రాస్ట్రక్చర్ అనే కేటగిరీలు కరెంట్‌లోనే కొనసాగుతున్నాయి. ఈ మార్పులు భారతీయుల్లో కొత్త ఆశలను రేకెత్తించగా.. చైనాలో మాత్రం డిమాండ్‌ను బట్టి వీసా కేటగిరీలకు గడువులు వెనక్కి తగ్గాయి. ఇది వివిధ దేశాలకు కేటాయించిన కోటా, డిమాండ్‌ను బట్టి వీసా కేటగిరీలలో మార్పులు ఉంటాయని తెలుస్తోంది. ఈ తాజా వీసా బులెటిన్‌తో గ్రీన్‌కార్డు కోసం దరఖాస్తు చేసుకున్న వేలాది మంది భారతీయుల నిరీక్షణకు కాస్తైనా తెరపడినట్లేనని నిపుణులు చెబుతున్నారు.