లండన్‌లో ట్రంప్‌కు ఊహించని షాక్.. దెబ్బకు భార్యతో సహా వేరే హెలికాప్టర్‌లోకి..!

బ్రిటన్ పర్యటనను ముగించుకుని తిరిగి బయలుదేరిన అగ్రరాజ్యం అమెరికా అధ్యక్షుడు డొనాల్డ్ ట్రంప్‌నకు లండన్‌లో ఊహించని అవాంతరం ఎదురైంది. ఆయన ప్రయాణిస్తున్న హెలికాప్టర్‌లో స్వల్ప సాంకేతిక లోపం (హైడ్రాలిక్ ఇష్యూ) తలెత్తడంతో.. అప్రమత్తమైన సిబ్బంది ఆయనను, ఆయన సతీమణి మెలానియా ట్రంప్‌ను మరో హెలికాప్టర్‌లోకి మార్చారు. ఈ విషయాన్ని వైట్‌హౌస్‌యే నేరుగా ధృవీకరించింది. ఈ ఘటన వల్ల ట్రంప్ స్టాన్‌స్టెడ్‌ విమానాశ్రయానికి చేరుకోవడంలో ఆలస్యం అయింది. "స్వల్ప హైడ్రాలిక్ సమస్య కారణంగా.. పూర్తి జాగ్రత్తతో పైలట్లు స్టాన్‌స్టెడ్ విమానాశ్రయానికి చేరుకోవడానికి ముందే స్థానిక ఎయిర్‌ఫీల్డ్‌లో ల్యాండ్ అయ్యారు. అధ్యక్షుడు, ప్రథమ మహిళ సురక్షితంగా మరో హెలికాప్టర్‌లోకి మారారు" అని వైట్‌హౌస్ ప్రెస్ సెక్రటరీ కరోలిన్ లీవిట్ ఒక ప్రకటనలో తెలిపారు.

ఈ పర్యటన సందర్భంగా ట్రంప్ యూకే ప్రధాని కీర్ స్టార్మర్‌తో కలిసి ఒక సంయుక్త మీడియా సమావేశంలో పాల్గొన్నారు. ఈ సమావేశంలో ఆయన పలు అంతర్జాతీయ అంశాలపై మాట్లాడారు. ముఖ్యంగా భారత్‌తో, ప్రధానమంత్రి నరేంద్ర మోదీతో తనకు ఉన్న సన్నిహిత సంబంధాల గురించి ఆయన ప్రస్తావించారు. తాను భారత్‌కు చాలా దగ్గరగా ఉన్నానని చెప్పుకొచ్చారు. భారత ప్రధానికి నేను చాలా సన్నిహితుడినని కూడా పేర్కొన్నారు. ఇటీవల ఆయన పుట్టినరోజు సందర్భంగా ఫోన్ చేసి శుభాకాంక్షలు తెలియజేశానని వెల్లడించారు. తమ మధ్య మంచి సంబంధాలు ఉన్నాయని.. ఆయన కూడా ఒక అద్భుతమైన ప్రకటన చేశారన్నారు. కానీ నేను వారిపై ఆంక్షలు విధించానని ట్రంప్ మీడియాముఖంగా వెల్లడించారు.

 ట్రంప్ రష్యా-ఉక్రెయిన్ యుద్ధంపై కూడా కీలక వ్యాఖ్యలు చేశారు. రష్యా అధ్యక్షుడు వ్లాదిమిర్ పుతిన్ యుద్ధాన్ని ఆపకపోవడం ద్వారా తనను తీవ్రంగా నిరాశపరిచారని ట్రంప్ అన్నారు. "అతను నన్ను నిరాశపరిచారు. అతను చాలా మందిని చంపుతున్నారు. కానీ ఉక్రెయిన్ సైనికుల కంటే ఎక్కువగా రష్యా సైనికులనే కోల్పోతున్నారు" అని ఆయన అన్నారు.

రష్యా-ఉక్రెయిన్ యుద్ధం పరిష్కరించడం సులభమైన విషయం అని తాను భావించినప్పటికీ.. అది అలా కాదని ఆయన అంగీకరించారు. తాను అధ్యక్షుడిగా ఉండి ఉంటే ఈ యుద్ధం ఎప్పటికీ ప్రారంభం అయి ఉండేది కాదన్నారు. తాను అధ్యక్షుడిగా ఉన్నప్పుడు ఈ యుద్ధం జరగలేదని స్పష్టం చేశారు. బైడెన్ పాలనలోనే ఇదంతా జరిగిందని.. ఈ విషయాన్ని చాలా మంది ఒప్పుకుంటారని కూడా పేర్కొన్నారు.