రెడ్ అలర్ట్ జారీ..ఆ జిల్లాల్లో కొన్ని గంటల్లో పిడుగులతో భారీ వానలు

ఆంధ్రప్రదేశ్ ప్రజలకు ముఖ్య గమనిక.. రాష్ట్రంలోని కొన్ని జిల్లాల్లో మరి కొన్ని గంటల్లో పిడుగులు పడనున్నాయి. ఏపీ విపత్తుల నిర్వహణ సంస్థ ఈ మేరకు హెచ్చరించింది. ఈ మేరకు కొన్ని జిల్లాలకు రెడ్ అలర్ట్ కూడా జారీ చేసింది. వచ్చే మూడు గంటల్లో కాకినాడ, అనకాపల్లి, పల్నాడు(వినుకొండ) జిల్లాల్లో అక్కడక్కడా పిడుగులతో కూడిన భారీ వర్షాలు కురుస్తాయని ఆదివారం మధ్యాహ్నం మూడు గంటల సమయంలో ఏపీ విపత్తుల నిర్వహణ సంస్థ వెల్లడించింది. ఆ మూడు జిల్లాలకు రెడ్ అలర్ట్ జారీ చేసింది. శ్రీకాకుళం, అల్లూరి సీతారామరాజు, ప్రకాశం జిల్లాల్లో పలుచోట్ల పిడుగులతో కూడిన మోస్తరు నుంచి భారీ వర్షాలు కురుస్తాయని ఏపీ విపత్తుల నిర్వహణ సంస్థ అంచనా వేసింది. ఆ జిల్లాలకు ఆరెంజ్ అలర్ట్ జారీ చేసింది. ఇక ఎన్టీఆర్ జిల్లా, ఉత్తరాంధ్ర, రాయలసీమ జిల్లాల్లో పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందంటూ ఎల్లో అలర్ట్ జారీ చేసింది.

భారీ వర్షానికి తోడు బలమైన ఈదురు గాలులు కూడా వీచే అవకాశం ప్రజలు అప్రమత్తంగా ఉండాలని ఏపీ విపత్తుల నిర్వహణ సంస్థ సూచించింది. వర్షం పడే సమయంలో భారీ హోర్డింగ్స్, చెట్ల కింద, శిథిలావస్థలో ఉన్న భవనాల వద్ద నిలబడవద్దని సూచించింది. మరోవైపు శనివారం రోజున రాష్ట్రంలోని పలు చోట్ల పిడుగులతో కూడిన భారీ వర్షాలు కురిసినట్లు ఏపీ విపత్తుల నిర్వహణ సంస్థ తెలిపింది. శనివారం ఉదయం 8:30 గంటల నుంచి ఆదివారం ఉదయం ఆరు గంటల వరకూ ఆంధ్రప్రదేశ్ రాష్ట్ర సగటు వర్షపాతం 6.9 మిమీగా నమోదైనట్లు వెల్లడించింది. 11 జిల్లాల్లో సాధారణ వర్షపాతం కంటే అధిక వర్షపాతం నమోదైందని.. ప్రజలు అప్రమత్తంగా ఉండాలని హెచ్చరించింది.

  మరోవైపు ఎన్టీఆర్ జిల్లాలో ఇప్పటికే భారీ వర్షాలు దంచికొడుతున్నాయి. దీంతో జిల్లాలోని వాగులూ, వంకలూ పొంగి పొర్లుతున్నాయి. భారీ వర్షం కారణంగా తిరువూరు మండలం లక్ష్మీపురం- మల్లెల మధ్య అలుగు పారుతోంది. దీంతో విస్సన్నపేట - తిరువూరు మధ్య వాహనాల రాకపోకలకు ఇబ్బందులు ఏర్పడ్డాయి.

అటు గంపలగూడెం మండలం వినగడప వద్ద కూడా కట్టలేరు వంతెన వద్ద రోడ్డుపై వరద నీరు భారీగా వచ్చి చేరింది. దీంతో వాహనాల రాకపోకలకు అంతరాయం కలిగింది. అధికారులు ఘటనాస్థలికి చేరుకుని వాహనాలను దారిమళ్లించారు. మరోవైపు ఈ రోజు, రేపు కూడా భారీ వర్షాలు ఉన్నాయన్న వాతావరణ శాఖ హెచ్చరికల మధ్య అధికారులు అప్రమత్తమయ్యారు.