ఏపీలో వాహన మిత్ర పథకం పేరు మారింది.. కొత్త పేరు ఆటో డ్రైవర్లకు సేవలో

రాష్ట్రంలోని ఆటో డ్రైవర్లను ఆదుకునేందుకు ఏపీ ప్రభుత్వం వాహనమిత్ర పథకం కింద రూ.15000 అందించాలని నిర్ణయించిన సంగతి తెలిసిందే. ఉచిత బస్సు పథకం అమలుతో ఆర్థి్కంగా ఇబ్బందులు పడుతున్న వారిని ఆదుకునేందుకు ఈ నిర్ణయం తీసుకుంది. వాహన మిత్ర పథకం కోసం ఇప్పటికే గ్రామ, వార్డు సచివాలయాల్లో దరఖాస్తులు కూడా స్వీకరించారు. అయితే తాజాగా ప్రభుత్వం కీలక నిర్ణయం తీసుకుంది. వాహన మిత్ర పథకం పేరును మార్చింది. వాహన మిత్ర స్థానంలో ఆటో డ్రైవర్ల సేవలో అంటూ పేరు మార్చారు. ఇప్పటికే గ్రామ, వార్డు సచివాలయ ఉద్యోగుల మొబైల్ ఫోన్లలో వాహన మిత్ర స్థానంలో ఆటో డ్రైవర్ల సేవలో అనే పేరును అప్‌డేట్ చేశారు.

మరోవైపు ఈ పథకం కింద ఆటో రిక్షా, మోటార్‌ క్యాబ్, మ్యాక్సీ క్యాబ్‌ డ్రైవర్లకు ఏడాదికి రూ.15,000 ఆర్థిక సాయం అందించనుంది ప్రభుత్వం. ఈ పథకం అమలు కోసం ఇప్పటికే మార్గదర్శకాలు కూడా జారీ అయ్యాయి. అర్హులైన వారు తమ సమీపంలోని గ్రామ, వార్డు సచివాలయాల్లో దరఖాస్తు చేసుకునేందుకు అవకాశం ఇచ్చారు. దరఖాస్తు విషయంలో ఏమైనా సమస్యలు ఉంటే అర్జీ నమోదు చేసుకునేందుకు కూడా తాజాగా సచివాలయాలలో ఆప్షన్ ఇచ్చారు. ఏవైనా సమస్యలు ఉంటే డిజిటల్ అసిస్టెంట్ ఆఫీసర్, లేదా డేటా ప్రాసెసింగ్ సెక్రటరీని సంప్రదించాల్సి ఉంటుంది.

మరోవైపు ఆటో డ్రైవర్లకు ఆర్థిక సాయం తొలుత అక్టోబర్ ఒకటో తేదీన జమ చేయాలని ప్రభుత్వం భావించింది. సీఎం నారా చంద్రబాబు నాయుడు చేతుల మీదుగా ఈ కార్యక్రమం ప్రారంభించాలని భావించారు. అయితే ఇప్పుడు ఆటో డ్రైవర్లకు అక్టోబర్ రెండో తేదిన ఆర్థిక సాయం అకౌంట్లలో జమ చేయనున్నట్లు తెలిసింది. వాహనమిత్ర (ఆటో డ్రైవర్లకు సేవలో) పథకం కోసం సెప్టెంబర్ 17 నుంచి 20 వరకూ కొత్త దరఖాస్తులు స్వీకరించారు.

22వ తేదీన కొత్త దరఖాస్తులను క్షేత్రస్థాయిలో పరిశీలించనున్నారు. వెల్ఫేర్ సెక్రటరీ, ఎంపీడీవో, కలెక్టర్ పరిశీలన అనంతరం దరఖాస్తులు గ్రామ,వార్డు సచివాలయ శాఖ అధికారులకు చేరుతాయి. సెప్టెంబర్ 24వ తేదీన తుది జాబితాను ప్రచురించిన అనంతరం.. అక్టోబర్ రెండో తేదీన ఆటో డ్రైవర్ల బ్యాంక్ ఖాతాలలో రూ.15000 చొప్పున జమ చేయనున్నారు.