దసరా, దీపావళి పండగ బంపరాఫర్.. చేనేత వస్త్రాలపై ఏకంగా 40 శాతం డిస్కౌంట్

తెలుగు రాష్ట్రాలకు పండగ శోభ వచ్చేసింది. నవరాత్రులు మొదలైంది మొదలు దీపావళి ముగిసే వరకూ ప్రతి ఇంటా.. పండగే. తెలంగాణలో బతుకమ్మ వేడుకలు, ఆంధ్రప్రదేశ్‌లో దసరా నవరాత్రి ఉత్సవాలతో జనం పండగ మూడ్‌లోకి వచ్చేశారు. ఈ నేపథ్యంలో ఆప్కో బంపరాఫర్ ప్రకటించింది. దసరా, దీపావళి పండుగలను పురస్కరించుకుని ఆంధ్రప్రదేశ్‌ స్టేట్‌ హ్యాండ్‌ లూమ్‌ వీవర్స్‌ కో-ఆపరేటివ్‌ సొసైటీ (ఆప్కో) భారీ డిస్కౌంట్‌ ప్రకటించింది. పండుగల సీజన్ కావటంతో.. చేనేత వస్త్రాలపై 40శాతం డిస్కౌంట్‌ ఇస్తున్నట్లు ఆప్కో ప్రకటించింది. ఈ ఆఫర్ ద్వారా చేనేత వస్త్రాల అమ్మకాలు పెరిగి అటు నేతన్నలకు, ఇటు ధరలు తగ్గటంతో వినియోగదారులకు మేలు జరుగుతుందని ఏపీ చేనేత, జౌళి శాఖ మంత్రి సవిత తెలిపారు. ఈ పండుగకు ఆప్కో ఆఫర్ ఉపయోగించుకుని చేనేత వస్త్రాల వినియోగాన్ని ప్రోత్సహించాలని కోరారు.

మరోవైపు ఆప్కో ఉత్పత్తుల వినియోగం పెంచేందుకు ఏపీ ప్రభుత్వం అనేక చర్యలు తీసుకుంటోంది. చేనేత వస్త్రాల వాడకాన్ని పెంచేందుకు రాష్ట్రంలో, జాతీయ స్థాయిలో చేనేత బజార్లు కూడా నిర్వహిస్తున్నారు. ఈ క్రమంలోనే ఇటీవల ఆప్కో సంస్థకు ఉత్పత్తులను సరఫరా చేసే సొసైటీలలో పనిచేసే నేత కార్మికుల జీతాలు, ప్రాసెసింగ్‌ ఛార్జీలను పెంచుతూ ఆంధ్రప్రదేశ్ ప్రభుత్వం ఇటీవల నిర్ణయం తీసుకుంది. ఈ వేతన పెంపు నిర్ణయం ద్వారా చేనేత సహకార సంఘాలలోని ఒక్కో నేత కార్మికుడికి అదనంగా రూ.3000 ఆదాయం లభించనుంది.

మరోవైపు ఏపీ ప్రభుత్వం తీసుకున్న నిర్ణయంతో రాష్ట్రంలోని 89 వేల మంది చేనేత కార్మికులకు ప్రయోజనం చేకూరుతుందని మంత్రి సవిత వెల్లడించారు. చేనేత వస్త్రాలు, ఉత్పత్తుల విక్రయాలను ప్రోత్సహించడానికి ఎగ్జిబిషన్లు నిర్వహిస్తున్నట్లు తెలిపారు. చేనేతలను ఆదుకోవాలనే ఉద్దేశంతో రాష్ట్రంలోని 92 వేల మంది చేనేతలకు 50 ఏళ్లకే పింఛను అందిస్తున్నామని వివరించారు.ఆప్కో పనితీరు మెరుగుపరిచేందుకు గానూ ఏపీ ప్రభుత్వం విశాఖలోని ఇండియన్‌ ఇన్‌స్టిట్యూట్‌ ఆఫ్‌ మేనేజ్‌మెంట్‌తో ఒప్పందం కూడా చేసుకుంది.

అలాగే పబ్లిక్ ప్రైవేట్ పార్టనర్‌షిప్ విధానంలో.. ఇతర రాష్ట్రాల్లోనూ లేపాక్షి షోరూమ్‌లను ఏర్పాటు చేయాలని నిర్ణయించింది. ఇక ఆప్కో ద్వారా చేనేత వస్త్రాలను ఆఫ్ ‌లైన్, ఆన్ లైన్ ద్వారా కూడా విక్రయిస్తున్నారు. డోర్ డెలివరీ చేసే సౌకర్యానికి కూడా ఆప్కో ఇటీవల శ్రీకారం చుట్టింది.