టీమిండియా సూపర్ స్టార్ ప్లేయర్లకు షాక్

టీమిండియా చాలా రోజుల తర్వాత వన్డేలు ఆడనున్న సంగతి తెలిసిందే. చివరగా ఛాంపియన్స్ ట్రోఫీ ఫైనల్లో ఆడగా.. ఇప్పుడు వన్డే సిరీస్ కోసం ఆస్ట్రేలియాకు వెళ్లింది భారత జట్టు. టెస్టులకు రిటైర్మెంట్ ఇచ్చిన తర్వాత.. భారత స్టార్ ప్లేయర్స్ విరాట్ కోహ్లీ, రోహిత్ శర్మ తొలిసారి ఇండియా టీమ్ తరఫున ఆడనున్నారు. దీంతో వీరిపై దృష్టి నెలకొంది. ఇక ఆసీస్ జట్టు కెప్టెన్ ప్యాట్ కమిన్స్.. గాయం నేపథ్యంలో ఈ సిరీస్‌కు దూరమయ్యాడు. అతడి బదులు.. మిచెల్ మార్ష్ తాత్కాలిక కెప్టెన్‌గా ఉండనున్నాడు. సిరీస్‌కు ముందు ఆస్ట్రేలియా ప్లేయర్లు వరుసగా తమ ఆల్ టైమ్ వన్డే XI ను ప్రకటిస్తున్నారు. ఇప్పుడు కమిన్స్ కూడా తన ఆల్ టైమ్ ఆస్ట్రేలియా- ఇండియా వన్డే XI జట్టు ప్రకటించాడు.

పెర్త్‌లో అక్టోబర్ 19న తొలి వన్డే జరగనున్న నేపథ్యంలో.. స్టార్ స్పోర్ట్స్‌తో మాట్లాడిన కమిన్స్ వన్డే XI వివరాల్ని పంచుకున్నాడు. అయితే ఇక్కడ అన్నింటికంటే షాకింగ్ విషయం ఏంటంటే.. ప్రస్తుత తరం వన్డే క్రికెట్‌లో టాప్ ప్లేయర్లుగా ఉన్న రోహిత్ శర్మ, విరాట్ కోహ్లీలకు చోటు కల్పించకపోవడం. 32 ఏళ్ల ఈ ఆసీస్ పేసర్.. సెలక్ట్ చేసిన టీంలో కేవలం ముగ్గురు రిటైర్డ్ భారత ఆటగాళ్లు మాత్రమే ఉండగా.. మిగతా 8 మంది ఆసీస్‌కు చెందిన వారే.

కమిన్స్.. భారత్ నుంచి సచిన్ టెండుల్కర్, మహేంద్ర సింగ్ ధోనీ, జహీర్ ఖాన్‌ను సెలక్ట్ చేయగా.. ఆస్ట్రేలియా నుంచి ఇటీవల వన్డేలకు రిటైర్మెంట్ ప్రకటించిన స్టీవ్ స్మిత్‌కు కూడా ప్లేస్ కల్పించాడు.

కమిన్స్ ఆల్ టైమ్ వన్డే XI ఇదే..

డేవిడ్ వార్నర్, సచిన్ టెండుల్కర్, రికీ పాంటింగ్, స్టీవ్ స్మిత్, షేన్ వాట్సన్, మైఖేల్ బెవాన్, ఎంఎస్ ధోనీ (వికెట్ కీపర్), షేన్ వార్న్, బ్రెట్ లీ, జహీర్ ఖాన్, గ్లెన్ మెక్‌గ్రాత్.

అయితే ఇక్కడో కన్ఫ్యూజన్ ఉంది. కమిన్స్.. అందరూ మాజీ ప్లేయర్లనే ఎంపిక చేశాడు. కానీ ఇక్కడ మాజీలనే ఎంపిక చేయాలని ప్రత్యేకంగా బ్రాడ్‌కాస్టర్ ఏం ప్రస్తావించకున్నా.. కమిన్స్ ప్రస్తుతం ఆడుతున్న వారిని ఎంపిక చేయలేదని తెలుస్తోంది. ఇటీవల ఆసీస్ స్టార్ క్రికెటర్ గ్లెన్ మాక్స్‌వెల్ మాత్రం.. ప్రస్తుతం ఆడుతున్న వారిని కూడా సెలక్ట్ చేశాడు. అందులో భారత్ నుంచి రోహిత్, కోహ్లీ సహా సచిన్, ధోనీ, కుంబ్లే, బుమ్రాను సెలక్ట్ చేశాడు. ఆసీస్ నుంచి పాంటింగ్, మైఖేల్ బెవాన్, షేన్ వాట్సన్, బ్రెట్ లీ, గ్లెన్ మెక్‌గ్రాత్‌ను ఎంపిక చేశాడు.