టీకా అంటే భయమా? ఇక ఆ నొప్పి ఉండదు! నాసల్ స్ప్రే రూపంలో ఫ్లూ వ్యాక్సిన్‌ అద్భుతం!

సూది రహిత నాసల్ స్ప్రే ఫ్లూ వ్యాక్సిన్‌ను యూఏఈ ఆరోగ్య మంత్రిత్వ శాఖ (MOHAP) దేశంలో మొట్టమొదటిసారిగా అధికారికంగా విడుదల చేయడంతో, ఇంజెక్షన్ల వల్ల కలిగే నొప్పికి భయపడే పిల్లలకు, పెద్దలకు ఇది నిజంగా శుభవార్త. ఈ నీడిల్ ఫ్రీ వ్యాక్సిన్, సురక్షితమైన, సులభమైన రోగనిరోధకత ఎంపికలను విస్తరించడంలో ఒక ప్రధాన ముందడుగు. ఇది సాంప్రదాయ ఫ్లూ షాట్‌కు త్వరిత, నొప్పి లేని ప్రత్యామ్నాయాన్ని అందిస్తూ, 2 నుండి 49 సంవత్సరాల మధ్య వయస్సు గల ఆరోగ్యవంతులైన వారి కోసం ప్రత్యేకంగా తీసుకొచ్చింది. ఈ ఫ్లూమిస్ట్ క్వాడ్రివలెంట్ (లేదా LAIV) వ్యాక్సిన్ ద్వారా లక్షలాది మంది పౌరులకు సులభంగా, వేగంగా వ్యాక్సిన్ ఇచ్చే వెసులుబాటు వచ్చింది. ఈ అభివృద్ధి టీకా కవరేజీని పెంచడానికి UAE చేపట్టిన వ్యూహాత్మక ప్రయత్నంలో ఒక భాగం. ఈ టీకాను ముక్కు రంధ్రాల్లోకి సులభంగా స్ప్రే చేయవచ్చు. 2 నుండి 17 సంవత్సరాల ఆరోగ్యకరమైన పిల్లలు, 18 నుండి 49 సంవత్సరాల ఆరోగ్యకరమైన పెద్దలు ఈ టీకాకు అర్హులు. తొమ్మిది లేదా అంతకంటే ఎక్కువ వయస్సు ఉన్నవారికి సాధారణంగా ఒకే మోతాదు (రెండు స్ప్రేలు) సరిపోతుంది, అయితే ఇంతకు ముందు ఫ్లూ వ్యాక్సిన్ తీసుకోని 2 నుండి 8 సంవత్సరాల పిల్లలకు రెండు మోతాదులు అవసరం కావొచ్చు. కాగా, ఈ నాసల్ స్ప్రే అందరికీ తగినది కాదు. 2 సంవత్సరాల కంటే తక్కువ వయస్సున్న పిల్లలు, 50 ఏళ్లు పైబడిన పెద్దలు, గర్భిణులు, రోగనిరోధక శక్తి బలహీనంగా ఉన్నవారు, తీవ్రమైన ఆస్తమాతో బాధపడేవారు, మరియు కొన్ని రకాల అలర్జీలు ఉన్నవారు ఈ టీకా తీసుకోవడానికి అనర్హులుగా ఆరోగ్య అధికారులు స్పష్టం చేశారు. రోగనిరోధక శక్తి తక్కువగా ఉన్న వ్యక్తులతో సన్నిహితంగా ఉండే వారు నాసల్ స్ప్రేకు బదులుగా ఇంజెక్షన్ వ్యాక్సిన్‌ను ఉపయోగించడం ఉత్తమం అని అధికారులు సూచించారు. ఈ వ్యాక్సిన్ ప్రస్తుతం UAE అంతటా ఎంపిక చేసిన ప్రభుత్వ, ప్రైవేట్ ఆరోగ్య కేంద్రాలలో అందుబాటులో ఉంది.