నమ్మి విషయం చెబితే.. సైలెంట్‌గా పని కానిచ్చేశాడు

హైదరాబాద్ నగరంలో చోటుచేసుకున్న ఒక సంచలనాత్మక దోపిడీ కేసును భవానీనగర్ పోలీసులు ఛేదించారు. భవానీనగర్‌ ఠాణా పరిధిలోని తలాబ్‌కట్ట ప్రాంతంలో ఇటీవల ఒక గాజుల వ్యాపారి ఇంట్లో రూ. 40 లక్షల దోపిడీకి పాల్పడిన నలుగురు నిందితులను శుక్రవారం పోలీసులు అరెస్టు చేశారు. ఈ కేసులో విస్తుపోయే విషయం ఏమిటంటే.. ఈ భారీ దోపీడికి పథకం వేసి అమలు చేసిన ముఠాలో బాధితుడికి అత్యంత సన్నిహితుడైన స్నేహితుడే ప్రధాన నిందితుడిగా ఉండటం. కేసు వివరాలను పురానీహవేలీలో మీర్‌చౌక్‌ ఏసీపీ, భవానీనగర్‌ ఇన్‌స్పెక్టర్‌ మీడియాకు వెల్లడించారు.

పోలీసులు తెలిపిన వివరాల ప్రకారం.. బిహార్‌కు చెందిన బాధితుడు మహ్మద్‌ సుల్తాన్‌ తలాబ్‌కట్టలో రాళ్ల గాజుల ముడి సరకుల వ్యాపారం సాగిస్తున్నాడు. ఇటీవల సుల్తాన్‌ బిహార్‌లోని తన భూములు అమ్మగా వచ్చిన రూ. 40 లక్షల నగదును ఇంట్లోనే భద్రపరిచాడు. ఈ డబ్బుతో హైదరాబాద్‌లో ఇల్లు కొనుగోలు చేయాలని అనుకున్న విషయం.. తనతోపాటు ఇక్కడే వ్యాపారం సాగించే బిహార్‌కు చెందిన మిత్రుడు మహ్మద్‌ జాహీద్‌తో పంచుకున్నాడు. సుల్తాన్‌ ఆర్థిక పరిస్థితి తెలుసుకున్న జాహీద్‌ డబ్బుపై కన్నేసి, దోపిడీకి ప్లాన్ చేశాడు. ఈ పథకాన్ని అమలు చేయడానికి, తలాబ్‌కట్టకు చెందిన కారు డ్రైవర్‌ ఇర్ఫాన్, రాపిడో డ్రైవర్‌ ముద్దాషీర్‌, మైలార్‌దేవ్‌పల్లికి చెందిన చిరుద్యోగి మహ్మద్‌ అబ్దుల్‌ రహ్మెన్‌లను జాహీద్‌ తన ముఠాలో చేర్చుకున్నాడు.

నవంబరు 30న ఈ నలుగురు ముఠాగా ఏర్పడి.. సుల్తాన్ ఇంటికి చేరుకున్నారు. వారు ముందుగా ఆ ప్రాంతంలోని సీసీ కెమెరాలను తొలగించి ఆ తర్వాత సైలెంట్‌గా ఇంట్లోకి ప్రవేశించారు. ఒంటరిగా ఉన్న వ్యాపారి సుల్తాన్‌ను తాళ్లతో బంధించి, కత్తితో బెదిరించి, బలవంతంగా రూ. 40 లక్షల నగదును దోచుకెళ్లారు. పోలీసులు సాంకేతిక ఆధారాల సహాయంతో దర్యాప్తు చేసి జాహీద్‌ను ప్రధాన సూత్రధారిగా గుర్తించారు. స్నేహితుడి నమ్మకాన్ని, ఆపదలో అండగా నిలవాల్సిన బంధాన్ని దుర్వినియోగం చేస్తూ జాహీద్‌ ఈ చోరీకి పాల్పడ్డాడని పోలీసులు వెల్లడించారు. నిందితులను అరెస్టు చేసిన పోలీసులు.. వారి వద్ద నుంచి దోపిడీ సొత్తును స్వాధీనం చేసుకున్నారు. అనంతరం న్యాయమూర్తి ఎదుట హాజరుపరిచి రిమాండ్‌కు తరలించారు. ఇలాంటి డబ్బు విషయాల్లో జాగ్రత్తగా ఉండాలని పోలీసులు సూచిస్తున్నారు. గుడ్డిగా నమ్మి ఎవరికీ ఆర్థిక లావాదేవీలకు సంబంధించిన విషయాలు వెల్లడించొద్దని చెబుతున్నారు.