లాస్ట్ 10 ఓవర్స్‌లో సీన్ రివర్స్.. ఓడిపోయే మ్యాచ్ గెలిచిన భారత్!

భారత్ - దక్షిణాఫ్రికా మధ్య జరిగిన ఐదో టీ20 ఉత్కంఠభరితంగా సాగింది. టీమిండియా అందించిన 232 పరుగుల భారీ టార్గెట్ ఛేజింగ్‌తో బరిలోకి దిగిన సౌతాఫ్రికా ఆరంభం నుంచే దూకుడు ప్రదర్శించింది. తొలి ఓవర్‌లోనే హ్యాట్రిక్ ఫోర్లతో శుభారంభం చేసిన క్వింటన్ డికాక్.. పవర్ ప్లేలో భారత బౌలర్లను ఉతికారేశాడు. పేస్, స్పిన్ అన్న తేడా లేకుండా బౌండరీలు బాది మ్యాచ్‌పై పట్టు సాధించాడు. తొలి పది ఓవర్లలో సఫారీల ఆట చూసి మ్యాచ్ వన్ సైడ్ అని అందరూ ఫిక్సయ్యారు. పది ఓవర్ల తర్వాత మ్యాచ్ మొత్తం ఒక్కసారిగా మలుపు తిరిగింది.

11వ ఓవర్‌లో బంతి అందుకున్న జస్ప్రీత్ బుమ్రా అద్భుతమైన బంతితో హాఫ్ సెంచరీ బాదిన డికాక్‌ను కాట్ అండ్ బౌల్డ్ చేశాడు. ఆ తర్వాత ఓవర్‌లోనే బ్రెవిస్‌ను పాండ్యా బయటకు పంపగా.. 13వ ఓవర్‌ వరుస బంతుల్లో కెప్టెన్ మర్కరమ్, ఫెరీరాను వరుణ్ చక్రవర్తి పెవిలియన్‌కు పంపాడు. వరుసగా మూడు ఓవర్లలోనే సౌతాఫ్రికా నాలుగు వికెట్లు కోల్పోయింది.

పది ఓవర్లకు 118/1తో ఉన్న సౌతాఫ్రికా జట్టు కేవలం 17 పరుగుల తేడాతోనే కీలకమైన నాలుగు వికెట్లు కోల్పోయి పీకల్లోతు కష్టాల్లో పడింది. ఆ తర్వాత కొంతసేపు డేవిడ్ మిల్లర్ స్కోర్ బోర్డును ముందుకు నడిపించే ప్రయత్నం చేసినా అర్ష్‌దీప్ బౌలింగ్‌లో భారీ షాట్‌కు ప్రయత్నించి సంజుకి క్యాచ్ ఇచ్చి అవుటయ్యాడు. దాంతో సౌతాఫ్రికా 154 పరుగులకే ఆరు వికెట్లు కోల్పోయింది.

టెయిలెండర్ బ్యాటర్లు కాసేపు పోరాడినా ఫలితం దక్కలేదు. నిర్ణీత 20 ఓవర్లు ముగిసే సమయానికి సౌతాఫ్రికా జట్టు 8 వికెట్ల నష్టానికి 201 పరుగులు చేసింది. దాంతో టీమిండియా 30 పరుగుల తేడాతో విజయం సాధించింది. క్వింటన్ డికాక్ 65 (35), రీజా హెండ్రిక్స్ 13 (12), డివాల్డ్ బ్రెవిస్ 31 (17), డేవిడ్ మిల్లర్ 18 (14), ఎయిడెన్ మర్కరమ్ 6 (4), డొనోవాన్ ఫెరీరా 0 (1), జార్జ్ లిండే 16 (8), మార్కో యాన్సన్ 14 (5), కార్బిన్ బాష్ 17 (15), లుంగీ ఎంగిడి 7 (9) పరుగులు చేశారు. భారత బౌలర్లలో వరుణ్ చక్రవర్తి 4 వికెట్లు పడగొట్టాడు. బుమ్రా రెండు, పాండ్యా ఒకటి, అర్ష్‌దీప్ ఒక వికెట్ తీసుకున్నారు. ఐదు మ్యాచ్‌ల టీ20 సిరీస్‌లో టీమిండియా 3 - 1 తేడాతో సిరీస్‌ను సొంతం చేసుకుంది.

అంతకుముందు తొలుత బ్యాటింగ్ చేసిన టీమిండియా నిర్ణీత 20 ఓవర్లలో ఐదు వికెట్ల నష్టానికి 231 పరుగులు చేసింది. సంజు శాంసన్ 37 (22), అభిషేక్ శర్మ 34 (21), తిలక్ వర్మ 73 (42), సూర్యకుమార్ యాదవ్ 5 (7), హార్దిక్ పాండ్యా 63 (25), శివమ్ దుబే 10 (3) పరుగులు చేశారు. సౌతాఫ్రికా బౌలర్లలో కార్బిన్ బాష్ రెండు వికెట్లు పడగొట్టగా.. జార్జ్ లిండే, బార్ట్‌మన్ చెరొక వికెట్ తీసుకున్నారు.