యాషెస్ ఓటమి చాలా బాధిస్తోంది.. మాకంటే ఆసీస్ టీమ్ బెటర్, బెన్‌స్టోక్స్ ఎమోషనల్

యాషెస్ 2025-26 సిరీస్‌ను ఆస్ట్రేలియా 3-0 తేడాతో కైవసం చేసుకున్న విషయం తెలిసిందే. అడిలైడ్‌లో జరిగిన మూడో టెస్టులో ఇంగ్లాండ్‌పై 82 పరుగుల తేడాతో ఆసీస్ ఘన విజయం సాధించింది. దీంతో మరో రెండు మ్యాచ్‌లు మిగిలుండగానే సిరీస్‌ను సొంతం చేసుకుంది. 11 రోజుల్లోనే సిరీస్ తేలిపోవడం గమనార్హం. తమ ఓటమిపై ఇంగ్లాండ్ కెప్టెన్ బెన్ స్టోక్స్ స్పందించాడు. ఈ సిరీస్ ఓటమి చాలా బాధ కలిగిస్తోందన్నాడు. ఈ ఓటమిని ఒప్పుకోవడం కూడా కష్టంగా ఉందని చెప్పాడు. అయితే మిగతా రెండు టెస్టుల్లో కచ్చింతగా నిలకడగా రాణిస్తామన్నాడు.

యాషెస్ సిరీస్‌ను ఎలాగైనా కాపాడుకోవాలనే లక్ష్యంతోనే అడిలైడ్‌లో అడుగుపెట్టామని బెన్ స్టోక్స్ అన్నాడు. కానీ తమ కల చెదిరిపోయిందని.. ఈ ఓటమి జట్టులోని ప్రతి ఒక్కరిని చాలా బాధకు గురి చేస్తోందన్నాడు. అందరూ చాలా భావోద్వేగానికి గురవుతున్నారని చెప్పాడు. అయితే దీనిపై ఆస్ట్రేలియాకు కచ్చితంగా క్రెడిట్ ఇవ్వాల్సిందేనన్న స్టోక్స్.. గెలుపు అనేది మూడు విభాగాల్లో రాణించడంపై ఆధారపడి ఉంటుందని తెలిపాడు. ఈ మ్యాచ్‌లో ఆసీస్ తమ కంటే మెరుగైన ప్రదర్శన చేసిందని.. వారు బ్యాటింగ్, బౌలింగ్, ఫీల్డింగ్ మూడింటిలోనూ ఇంగ్లాండ్ జట్టుపై పైచేయి సాధించారని చెప్పాడు.

"నాలుగో ఇన్నింగ్స్‌లో మా ముందు భారీ టార్గెట్ ఉంది. అయినా మేము చివరి వరకు పోరాడాం. విల్ జాక్స్, జెమీ స్మిత్ రాణించారు. మంచి పార్టనర్‌షిప్ నెలకొల్పారు. టాస్ ఓడిన‌ప్పటికీ.. ఆస్ట్రేలియాను మొదటి ఇన్నింగ్స్‌లో ఓ మోస్తరు స్కోర్‌కే క‌ట్టడి చేయ‌గలిగాం. మేము భారీ స్కోర్ చేయ‌డంలో విఫ‌ల‌మ‌య్యాం. రెండో ఇన్నింగ్స్‌లో కూడా కేవ‌లం 60 ప‌రుగులకే 6 వికెట్లు ప‌డ‌గొట్టాము. మాకు చాలా సానుకూల ఆంశాలు ఉన్నాయి. ముఖ్యంగా ఇంగ్లాండ్ లోయర్ ఆర్డర్ బ్యాటర్లు చూపిన పోరాటపటిమ అద్బుతం. నేను ఆశించిన పట్టుదల వారిలో క‌నిపించింది" అని బెన్ స్టోక్స్ చెప్పాడు.

టాస్‌ గెలిచి బ్యాటింగ్ ఎంచుకున్న ఆస్ట్రేలియా మొదటి ఇన్నింగ్స్‌లో 371 పరుగులు చేశారు. అలెక్స్ కేరీ (106) అద్భుత సెంచరీ చేశాడు. ఖవాజా (82) రాణించారు. జోఫ్రా ఆర్చర్ 5, విల్ జాక్స్ 2, బ్రైడన్ కార్స్ తలో రెండు వికెట్లు పడగొట్టారు. జోష్ టంగ్ ఒక వికెట్ తీశాడు. అనంతరం తమ మొదటి ఇన్నింగ్స్‌లో ఇంగ్లాండ్ 286 పరుగులు చేసింది. బెన్ డకెట్ (29), హ్యారీ బ్రూక్ (45), బెన్ స్టోక్స్ (83), జోఫ్రా ఆర్చర్ (53) రాణించారు. అయితే రెండో ఇన్నింగ్స్‌లో ఆసీస్‌ను ఇంగ్లాండ్ కట్టడి చేయలేకపోయింది. దీంతో 415 పరుగుల టార్గెట్‌తో బరిలోకి దిగిన ఇంగ్లాండ్.. 352 పరుగులకే కుప్పకూలింది. దీంతో సిరీస్ ఆస్ట్రేలియా కైవసం చేసుకుంది.