వెనిజులా ఆపరేషన్‌లో 32 మంది క్యూబన్లు మృతి

వెనిజులా మాజీ అధ్యక్షుడు నికోలస్ మదురోను బంధించేందుకు అమెరికా సైన్యం చేపట్టిన మెరుపు దాడి తీవ్ర రక్తపాతానికి దారితీసింది. ఈ ఆపరేషన్‌లో తమ దేశానికి చెందిన 32 మంది సైనిక, నిఘా విభాగం సిబ్బంది మరణించినట్లు క్యూబా ప్రభుత్వం అధికారికంగా ప్రకటించింది. ఒక దేశాధినేతను మరో దేశ దళాలు అపహరించడం అంతర్జాతీయ నిబంధనలకు విరుద్ధమని మండిపడ్డ హవానా... మరణించిన తమ వీరుల గౌరవార్థం జనవరి 5, 6 తేదీల్లో (నేడు, రేపు) దేశవ్యాప్త సంతాప దినాలు ప్రకటించింది.

మదురోకు రక్షణగా ఉన్న తమ దేశ భద్రతా దళాలు అమెరికా కమెండోలను చివరి వరకు అడ్డుకున్నాయని క్యూబా ప్రభుత్వం వెల్లడించింది. "మా దేశస్థులు తమ బాధ్యతను అత్యంత గౌరవప్రదంగా, వీరోచితంగా నిర్వహించారు. ఆక్రమణదారులకు వ్యతిరేకంగా ప్రత్యక్ష పోరాటంలో, బాంబు దాడుల వల్ల వారు వీరమరణం పొందారు" అని ఒక ప్రకటనలో పేర్కొంది. మదురో అధికారంలోకి వచ్చినప్పటి నుంచి ఆయన వ్యక్తిగత భద్రతను క్యూబా పర్యవేక్షిస్తోంది. అయితే దాడి జరిగిన సమయంలో ఎంతమంది క్యూబన్లు అక్కడ ఉన్నారనే దానిపై స్పష్టత లేదు.

బంధీగా మదురో.. నేడు న్యూయార్క్ కోర్టులో హాజరు

శనివారం తెల్లవారుజామున వెనిజులా రాజధాని కరాకస్‌లో అమెరికా ప్రత్యేక బలగాలు నిర్వహించిన ఈ సాహసోపేత ఆపరేషన్‌లో 63 ఏళ్ల నికోలస్ మదురోతో పాటు ఆయన భార్య సీలియా ఫ్లోరస్‌ను కూడా బంధించారు. వెంటనే వారిని విమానంలో అమెరికాకు తరలించారు. ప్రస్తుతం న్యూయార్క్‌లోని ఒక డిటెన్షన్ సెంటర్‌లో ఉన్న మదురోను.. సోమవారం రోజు మాన్హాటన్ ఫెడరల్ కోర్టులో హాజరు పరచనున్నారు.

 అయితే మదురోపై అమెరికా ప్రధానంగా నార్కో-టెర్రరిజం (డ్రగ్స్ స్మగ్లింగ్, ఉగ్రవాదం) ఆరోపణలు మోపింది. 2020లో విడుదల చేసిన అభియోగపత్రం ప్రకారం.. మదురో ప్రభుత్వం అమెరికాలోకి వేల టన్నుల కొకైన్‌ను సరఫరా చేసే ముఠాలకు సహకరిస్తోందని అమెరికా వాదిస్తోంది. ఈ నేరాలకు సంబంధించి ఆయనను విచారించేందుకే ఈ అపహరణ ఆపరేషన్ చేపట్టినట్లు ట్రంప్ యంత్రాంగం పేర్కొంది. అయితే మదురో ఈ ఆరోపణలను ఎప్పటికప్పుడు తోసిపుచ్చుతూనే ఉన్నారు.

ముగిసిన నియంత శకం?

దశాబ్ద కాలంగా వెనిజులాను ఏలుతున్న మదురో ఇలా అమెరికా జైలు పాలవ్వడం అంతర్జాతీయ రాజకీయాల్లో పెను మార్పులకు సంకేతంగా విశ్లేషకులు భావిస్తున్నారు. మరోవైపు క్యూబన్ల మరణంతో ఈ వివాదం కేవలం అమెరికా-వెనిజులా మధ్యే కాకుండా క్యూబాతో కూడా దౌత్యపరమైన చిక్కులను తెచ్చిపెట్టింది. నిందితుడిగా కోర్టు ముందుకు వెళ్తున్న మదురోకు మద్దతుగా రష్యా, చైనా వంటి దేశాలు ఎలా స్పందించనున్నాయో అని అంతా ఆసక్తిగా ఎదురు చూస్తున్నారు.