అమెరికాలో రానున్న ఎన్నికలపై కీలక వ్యాఖ్యలు చేసిన ట్రంప్
international | Suryaa Desk | Published : Wed, Jan 07, 2026, 01:33 PM
అమెరికా అధ్యక్షుడు డొనాల్డ్ ట్రంప్ తన పదవీ కాలంపై సంచలన వ్యాఖ్యలు చేశారు. ఈ ఏడాది నవంబర్లో జరగనున్న 2026 మధ్యంతర ఎన్నికల్లో అధికార రిపబ్లికన్ పార్టీ గెలవకపోతే డెమొక్రాట్లు తనను 'ఇంపీచ్' (అభిశంసన) చేసే అవకాశం ఉందని హెచ్చరించారు. వాషింగ్టన్లో జరిగిన రిపబ్లికన్ ప్రజాప్రతినిధుల సమావేశంలో ఆయన మాట్లాడుతూ.. "మనం ఈ ఎన్నికల్లో ఖచ్చితంగా గెలవాలి. లేదంటే నన్ను పదవి నుంచి తొలగించడానికి వారు ఏదో ఒక కారణం వెతుకుతారు" అని పేర్కొన్నారు.వెనిజులా అధ్యక్షుడు నికోలస్ మదురోను పట్టుకునేందుకు ట్రంప్ జరిపిన సైనిక దాడి ఇప్పుడు అమెరికా రాజకీయాల్లో పెను తుపాను సృష్టించింది. కాంగ్రెస్ అనుమతి లేకుండా ఒక సార్వభౌమ దేశంపై దాడి చేయడం రాజ్యాంగ విరుద్ధమని డెమొక్రాట్లు మండిపడుతున్నారు. మేరీల్యాండ్ ఎంపీ ఏప్రిల్ మెక్లైన్ డెలానీ మాట్లాడుతూ.. వెనిజులాపై దాడి రాజ్యాంగాన్ని ఉల్లంఘించడమేనని, వెంటనే అభిశంసన ప్రక్రియను ప్రారంభించాలని డిమాండ్ చేశారు. కాలిఫోర్నియా సెనేటర్ స్కాట్ వీనర్ కూడా దీనిని 'అక్రమ దురాక్రమణ'గా అభివర్ణించారు.
|
|