జరభద్రం.. ఫోన్‌పే, ఎస్‌బీఐ రివార్డుల పేరిట సైబర్ కేటుగాళ్ల కొత్త మోసం!

గత రెండు రోజులుగా సోషల్ మీడియా వేదికగా, ముఖ్యంగా వాట్సాప్ గ్రూపుల్లో ‘ఫోన్‌పే పొంగల్ గ్రాండ్ గిఫ్ట్ ప్రోగ్రామ్’ పేరుతో ఒక మెసేజ్ విపరీతంగా చక్కర్లు కొడుతోంది. ఈ లింక్ క్లిక్ చేస్తే రూ. 5,000 నగదు బహుమతి పొందవచ్చని ఆశ చూపుతూ వినియోగదారులను సైబర్ నేరగాళ్లు బురిడీ కొట్టిస్తున్నారు. పండగ ఆఫర్ల పేరుతో వచ్చే ఇటువంటి నకిలీ సందేశాలను నమ్మి లింక్‌లపై క్లిక్ చేస్తే మీ వ్యక్తిగత సమాచారంతో పాటు బ్యాంక్ ఖాతాలోని సొమ్ము కూడా మాయమయ్యే ప్రమాదం ఉందని నిపుణులు హెచ్చరిస్తున్నారు.
ఫోన్‌పే పేరుతో జరుగుతున్న ఈ మోసం ఇలా ఉండగానే, తాజాగా స్టేట్ బ్యాంక్ ఆఫ్ ఇండియా (SBI) ఖాతాదారులను లక్ష్యంగా చేసుకుని మరో కొత్త రకం దందా మొదలైంది. మీ అకౌంట్‌లో రూ. 9,980 విలువైన రివార్డ్ పాయింట్లు ఎక్స్‌పైర్ అయిపోతున్నాయని, వెంటనే వాటిని నగదుగా మార్చుకోవాలని కేటుగాళ్లు మెసేజ్‌లు పంపుతున్నారు. ఇందులో భాగంగా అనుమానాస్పద లింకులతో పాటు కొన్ని హానికరమైన ఏపీకే (APK) ఫైల్స్‌ను కూడా పంపిస్తూ ఫోన్లను హ్యాక్ చేసేందుకు ప్రయత్నిస్తున్నట్లు సమాచారం అందుతోంది.
సాధారణంగా ఇలాంటి లింకులను క్లిక్ చేయగానే అవి అధికారిక బ్యాంక్ వెబ్‌సైట్‌లను పోలి ఉండే నకిలీ పేజీలకు తీసుకెళ్తాయి. అక్కడ మీ నెట్ బ్యాంకింగ్ యూజర్ ఐడి, పాస్‌వర్డ్ లేదా ఓటీపీ (OTP) ఎంటర్ చేయగానే, క్షణాల్లో మీ ఖాతా ఖాళీ అయిపోతుంది. కేవలం లింకులు మాత్రమే కాకుండా, ఏపీకే ఫైల్స్‌ను ఇన్‌స్టాల్ చేయడం వల్ల మీ ఫోన్‌పై నియంత్రణను సైబర్ దొంగలు చేజిక్కించుకుంటారు. దీనివల్ల మీ ప్రైవేట్ ఫోటోలు, కాంటాక్ట్‌లు మరియు మెసేజ్‌లు కూడా వారి చేతుల్లోకి వెళ్లే అవకాశం ఉంది.
అందువల్ల గుర్తు తెలియని వ్యక్తుల నుంచి లేదా గ్రూపుల నుంచి వచ్చే ఎటువంటి బహుమతుల లింక్‌లను క్లిక్ చేయకండి. బ్యాంకులు ఎప్పుడూ కూడా రివార్డ్ పాయింట్ల కోసం లేదా బహుమతుల కోసం లింకులు పంపి ఓటీపీలు అడగవనే విషయాన్ని గుర్తుంచుకోవాలి. ఇలాంటి మోసపూరిత సందేశాలు వస్తే వెంటనే వాటిని డిలీట్ చేయడంతో పాటు, సైబర్ క్రైమ్ హెల్ప్‌లైన్ నంబర్ 1930 కి ఫిర్యాదు చేయాలి. అప్రమత్తంగా ఉండటమే సైబర్ నేరాల నుండి మిమ్మల్ని మీరు కాపాడుకోవడానికి ఉన్న ఏకైక మార్గం.