అమెరికా డాలర్ వ్యవస్థలోకి రష్యా రీ-ఎంట్రీ.. ట్రంప్‌తో దోస్తీకి పుతిన్ వ్యూహం!

ఉక్రెయిన్‌పై యుద్దం తర్వాత అంతర్జాతీయ ఆర్థిక వ్యవస్థలో ఏకాకి అయిన రష్యా.. తిరిగి అమెరికా డాలర్ వ్యవస్థలోకి వచ్చేందుకు పావులు కదుపుతోంది. అమెరికా అధ్యక్షుడు డొనాల్డ్ ట్రంప్‌తో తమ ఆర్థిక భాగస్వామ్యాన్ని పటిష్టం చేసుకునే దిశగా మాస్కో ఒక అంతర్గత మెమోను రూపొందించింది. ఉక్రెయిన్‌తో యుద్ధం నేపథ్యంలో విధించిన ఆంక్షల నుంచి బయటపడటం తోపాటు ఆర్థిక వ్యవస్థను పట్టాలెక్కించేందుకు క్రెమ్లిన్ ఈ సంచలన నిర్ణయం తీసుకున్నట్లు సమాచారం రష్యా ఉన్నతాధికారుల మధ్య సర్క్యులేట్ అయిన మెమో ప్రకారం.. అమెరికాతో ప్రధానంగా ఏడు రంగాల్లో సహకరించుకోవాలని మాస్కో భావిస్తోంది. శాంతి ఒప్పందంపై ఉక్రెయిన్, రష్యా మధ చర్చలు జరుగుతోన్న వేళ ఈ పరిణామం చోటుచేసుకుంది.

ముఖ్యంగా ఏరోస్పేస్ రంగంలో ఒప్పందాలు, చమురు ప్రాజెక్టులు, అణుశక్తి, కీలకమైన ముడి పదార్థాలు, సహజ వాయువుల ఎగుమతి వంటి అంశాలపై వాషింగ్టన్‌తో కలిసి పనిచేయడానికి రష్యా ప్రతిపాదనలు సిద్ధం చేసింది. ఈ ప్రతిపాదనలు కార్యరూపం దాల్చితే అమెరికా, రష్యా మధ్య వాణిజ్య సంబంధాలు సరికొత్త మలుపు తీసుకుంటాయని నిపుణులు భావిస్తున్నారు. ఫిబ్రవరి 2022లో ఉక్రెయిన్‌పై రష్యా దండయాత్ర మొదలైన తర్వాత అమెరికా సహా పశ్చిమ దేశాలు క్రెమ్లిన్‌పై కఠిన ఆంక్షలు విధించాయి. దీంతో తన ఇంధన ఎగుమతులకు సంబంధించి చెల్లింపులను డాలర్లకు బదులుగా యువాన్ (చైనా కరెన్సీ), రష్యన్ రూబుల్స్‌, భారత రూపాయితో జరుపుతోంది. అప్పటి నుంచి చైనా, భారతదేశంతో రష్యా తన వాణిజ్యంలో దాదాపు 90 శాతాన్ని జాతీయ కరెన్సీలలోకి మార్చుకుంది. బ్రిక్స్ స్థానిక కరెన్సీ వినియోగం దాదాపు 60–67%కి పెరిగింది. ఇది కొంతమేర అస్థిరతను తగ్గించింది కానీ యుద్ధానికి ముందు స్థాయితో పోల్చితే ఎక్కువే.

ఈ పరిణామాల నేపథ్యంలో తిరిగి డాలర్ ఆధారిత చెల్లింపుల వ్యవస్థలోకి రావాలని మోమోలో రష్యా ప్రతిపాదించడం గమనార్హం. ముఖ్యంగా ఆయిల్, సహజ వాయువు విక్రయాల్లో చెల్లింపులకు మళ్లీ డాలర్లను అనుమతించడం ద్వారా అంతర్జాతీయ మార్కెట్‌లో తన పట్టును నిలుపుకోవాలని మాస్కో భావిస్తోంది. గత రెండేళ్లుగా తన ఆర్థిక అవసరాల కోసం చైనాపై రష్యా ఎక్కువగా ఆధారపడుతోంది. ఇది మంచిది కాదని, ఇలాగే కొనసాగితే దేశ ప్రయోజనాలకు విఘాతం కలిగిస్తుందని రష్యా ఆందోళన చెందుతున్నట్టు తెలుస్తోంది. అందుకే, అమెరికాతో సంబంధాలను పునరుద్దరణ ద్వారా చైనా ప్రాబల్యాన్ని తగ్గించాలని మాస్కో వ్యూహాత్మకంగా అడుగులు వేస్తోంది. కానీ, చైనాతో ఆ దేశానికి ఉన్న బలమైన సైనిక, ఆర్థిక బంధాల నేపథ్యంలో ఇది ఎంతవరకు సాధ్యమనే దానిపై అనుమానాలు వ్యక్తమవుతున్నాయి.

అయితే, అమెరికా ఏరోస్పేస్, టెక్ కంపెనీలకు అవసరమైన నికెల్, పల్లాడియం, టైటానియం వంటి అరుదైన ఖనిజ నిల్వలు రష్యా వద్ద అధికంగా ఉన్నాయి. అందుకే మెమోలో అమెరికా సంస్థలకు ప్రయోజనాలను స్పష్టంగా ప్రస్తావించారు. పునర్నిర్మాణ ఒప్పందాలు, సైబీరియన్ గ్యాస్ క్షేత్రాలలో జాయింట్ వెంచర్లు, రష్యన్ మార్కెట్లకు డైరెక్ట్ యాక్సెస్ వంటి దీనిలోఉన్నాయి. ఈ ఒప్పందం ఖరారైతే ప్రపంచ ఆర్థిక వ్యవస్థ పునిర్నిర్మాణం జరిగి.. ఇంధన మార్కెట్లలో అమెరికా డాలర్ ఆధిపత్యాన్ని బలోపేతం చేస్తుంది. ఇదే సమయంలో డాలర్‌పై ఆధారపడటాన్ని తగ్గించడానికి బ్రిక్స్ దేశాలు చేస్తున్న ప్రయత్నాలను బలహీనపరుస్తుంది.