సిద్ధులు, వీరబ్రహ్మేంద్ర స్వామి పూజలు చేసిన శివలింగం

పరమశివుడు పేరు చెబితే చాలు ఎవరైనా సరే భక్తితో పరవశించిపోతారు. శివ నామస్మరణ పలకని వారు ఉండనే ఉండరు. చరిత్ర కలిగిన శివాలయాలు దేశంలో ఎన్నో ఉన్నాయి. అలాంటి శివాలయాలు దర్శించుకునేందుకు ప్రతి ఒక్కరు ఉత్సాహం చూపిస్తూ ఉంటారు. ఆ శివుడికి పూజలు చేసి తరిస్తుంటారు. ఆంధ్రాలో కూడా ప్రత్యేకత కలిగిన శివాలయాలు చాలానే ఉన్నాయి.

ఇక ప్రకాశం జిల్లా గిద్దలూరు పట్టణంలోని పాత నాగేశ్వర స్వామి దేవాలయం ఎన్నో ప్రత్యేకతలకు పెట్టిన పేరుగా నిలిచి పోతుంది. కనుమరుగైపోతున్న ఆలయ చరిత్రను కాపాడుతూ వరదల్లో దెబ్బతిన్న ఆలయాన్ని గిద్దలూరు ఎమ్మెల్యే అన్నా వెంకట రాంబాబు సంరక్షించే బాధ్యత తీసుకున్నారు. ఆయన చొరవతో ఆలయ మనుగడను కాపాడడమే కాకుండా ఆలయం అభివృద్ధి చేయడంలో ప్రత్యేక పాత్ర పోషిస్తున్నారు. ఇంతకు ఆ ఆలయం ప్రత్యేకత ఏంటో ఆ ఆలయం యొక్క చరిత్ర ఏమిటో ఒకసారి చూసేయండి..

గిద్దలూరు పట్టణంలోని శ్రీ పాత నాగేశ్వర స్వామి దేవస్థానం చరిత్ర ఘనమే అని ప్రత్యేకంగా చెప్పవలసిన అవసరం లేదు. 500 సంవత్సరాలకు పైగా చరిత్ర కలిగిన ఈ ఆలయంలో కాలజ్ఞానం రాసిన పోతులూరి శ్రీ వీరబ్రహ్మేంద్ర స్వామి పూజింపబడిన శివలింగంగా చరిత్రకెక్కింది. ఇక్కడ శివలింగాన్ని శ్రీ పాతాళ నాగేశ్వర స్వామి అనే నామకరణంతో పిలుస్తారు. ఇక్కడ ఋషులు, సిద్ధులు పూజలు చేశారని చరిత్ర చెబుతోంది. స్వయంభువుగా వెలసిన ఈ శివలింగం ఎంతో మహిమ ఉన్న శివలింగంగా ఆలయానికి వచ్చే భక్తులు విశ్వసిస్తారు.

ఇక్కడ స్వయంభూగా వెలిసిన శివలింగానికి నీరు ఊట రూపంలో నిరంతరం అభిషేకం జరుగుతూ ఉంటుందని ఆ సంఘటన భక్తులు ప్రత్యక్షంగా తిలకించవచ్చు. అంతేకాదు కొన్ని వందల సంవత్సరాల చరిత్ర కలిగిన పురాణత బావి ఆలయ అభివృద్ధి పనులలో భాగంగా బయటపడింది. ఈ దేవాలయం నుంచి ఋషులు, సిద్ధులు శ్రీశైలం కాలినడక వెళ్లేందుకు సొరంగం మార్గం ఉండేదట కాలక్రమంలో ఆ సొరంగం మూసి వేయడం జరిగింది.

ఈ ఆలయం సగిలేరు వాగుకు సమీపంలో ఉండడంతో వరదలు వచ్చిన ప్రతిసారి తీరని నష్టం కలిగింది. ఈ ఆలయాన్ని ముంచెత్తి భారీగా నష్టం మిగిల్చింది. ఓ దశలో ఆలయం మనుగడే ప్రశ్నార్థకంగా మారిన పరిస్థితులలో గిద్దలూరు ఎమ్మెల్యే అన్నా వెంకట రాంబాబు ఈ ఆలయం పై ప్రత్యేక దృష్టి సారించారు. ఆలయం అభివృద్ధి చేసేందుకు శ్రీకారం చుట్టారు. వరదలలో దెబ్బతిన్న ఆలయానికి మరమ్మతులు చేయించి ఎమ్మెల్యే పూర్వవైభవం తీసుకువచ్చారు. ఆలయంలో అభివృద్ధి కార్యక్రమాలు ప్రస్తుతం జరుగుతూనే ఉన్నాయి.