మీ పోరాటం స్ఫూర్తినిచ్చింది...ఏఆర్ కానిస్టేబుల్ ప్రకాష్ కు బాబు, లోకేష్ ప్రశంస

అనంతపురం ఏఆర్ కానిస్టేబుల్ ప్రకాష్ పై టీడీపీ నాయకత్వం ప్రశంసలు కురిపించిం. ప్రకాశ్ ‌సస్పెన్షన్ వ్యవహారంపై కూడా ఆ పార్టీ స్పందించింది. ప్రభుత్వంపై ఆయన చేస్తున్న పోరాటం స్ఫూర్తిని ఇచ్చిందంటూ టీడీపీ అధినేత చంద్రబాబు, జాతీయ ప్రధాన కార్యదర్శి నారా లోకేష్ పొగడ్తల వర్షం కురిపించారు. ‘ఏఆర్ కానిస్టేబుల్ ప్రకాష్ కి హాట్సాఫ్.. నిరంకుశ ప్రభుత్వం పై మీ పోరాటం స్ఫూర్తినిచ్చింది. సేవ్ ఏపీ పోలీస్ అంటూ సీఎం జగన్ రెడ్డి గారిని ప్రశ్నించే హక్కు ఒక దళిత కానిస్టేబుల్ కి లేదా? అదే నిరసన మీ సొంత సామాజిక వర్గం వారి నుండి వస్తే వేటు వేసేవారా జగన్ రెడ్డి గారు?. రాష్ట్రంలో దళితులపై జరుగుతున్న దమనకాండకు ప్రకాష్ ఉదంతం ఒక తాజా ఉదాహరణ. పోలీసులకు రావాల్సిన బకాయిల గురించి ప్రశ్నిస్తే లేని కేసుని తెరపైకి తెచ్చి వేటు వేసారు. తక్షణమే ఆయన్ని సర్వీసులోకి తీసుకోవాలి. పోలీసులకు ఇచ్చిన హామీలు నెరవేర్చడంతో పాటు పెండింగ్ పెట్టిన బకాయిలు అన్ని విడుదల చెయ్యాలి’అంటూ లోకేష్ ట్వీట్ చేశారు.

చంద్రబాబు కూడా ట్విట్టర్ వేదికగా స్పందించారు.‘సమస్యలను పరిష్కరించలేని దద్దమ్మ ప్రభుత్వం.. సమస్యలపై నిలదీసిన వాళ్ళ మీద చర్యలు తీసుకోవడం దారుణం. అనంతపురంలో "సేవ్ ఏపీ పోలీస్" అంటూ అమరవీరుల స్మారక స్థూపం దగ్గర నిరసనకు దిగిన ఏఆర్ కానిస్టేబుల్ ప్రకాష్ ను సర్వీసు నుంచి తొలగించడానికి అక్రమ కేసులు మోపుతారా?. ఏఆర్ కానిస్టేబుల్ ప్రకాష్ చేసిన తప్పేంటి? పోలీసు శాఖలో ఉండే సమస్యలను పరిష్కరించమని జగన్ రెడ్డి దృష్టికి తేవాలనుకోవడం తప్పా? జగన్ రెడ్డి మాట మీద ఒక పోలీసు పైనే అక్రమకేసులు పెట్టారంటే, వైసీపీ నేతల మాటలు విని సామాన్యులను ఎంత వేధిస్తున్నారో అర్థం అవుతోంది.ప్రకాష్ పై ప్రభుత్వం వ్యవహరిస్తోన్న తీరును ఖండిస్తున్నాను. ప్రకాష్ పై పెట్టిన అక్రమ కేసులను ఉపసంహరించుకోవాలి. అతనిని వెంటనే సర్వీసులోకి తీసుకోవాలి. అంతవరకు ప్రకాష్ కు అండగా ఉంటుంది తెలుగుదేశం’అంటూ ట్వీట్ చేశారు.

ఈ ఏడాది జూన్ 14న తమ బకాయిలు చెల్లించాలంటూ అనంతపురంలో కానిస్టేబుల్ ప్రకాష్ ప్లకార్డులు ప్రదర్శించిన సంగతి తెలిసిందే. ఆ తర్వాత అతడ్ని విధుల్లో నుంచి తొలగించారు. గార్లదిన్నెకు చెందిన మహిళ నుంచి కానిస్టేబుల్ ప్రకాష్ బంగారం, డబ్బు తీసుకున్నారనే ఆరోపణలపై విధుల నుంచి తొలగించినట్లు అనంతపురం ఎస్పీ ఫకీరప్ప తెలిపారు. దీంతో చంద్రబాబు, లోకేష్ స్పందించారు.