ఏపీకి నమ్మక ద్రోహం చేస్తున్న యనమల: మంత్రి గుడివాడ అమర్‌నాథ్

ఫార్మా పరిశ్రమ హబ్‌గా రాష్ట్రం నిలుస్తుంటే.. ఏపీకి బల్క్‌ డ్రగ్‌ పార్క్‌ వద్దంటూ టీడీపీ నేత యనమల కేంద్రానికి లేఖ రాయడం దారుణమని మంత్రి గుడివాడ అమర్‌ నాథ్ అన్నారు. మాజీ మంత్రి యనమల రామకృష్ణుడు ఏపీకి ద్రోహం చేస్తున్నారని విమర్శించారు. సెప్టెంబర్‌ ఒకటి అంటే చంద్రబాబు, యనమల రామకృష్ణుడికి వెన్నుపోటు పొడిచేందుకు అనుకూలమైన రోజని.. 1995లో చెట్టు కింద ప్లీడర్‌ను ప్రజాప్రతినిధిగా, మంత్రిగా, స్పీకర్‌గా చేసి రాజకీయ భవిష్యత్‌ ప్రసాదించిన ఎన్టీఆర్‌కు వెన్నుపోటు పొడిచిన ఘనత యనమలకే దక్కుతుందన్నారు.

యనమలకు మూడున్నర దశాబ్దాల పాటు ఎమ్మెల్యేగా గెలిపించి రాజకీయ పదవులు కట్టబెట్టిన సొంత జిల్లాకు బల్క్‌ డ్రగ్స్‌ పార్క్‌ వస్తే అడ్డుకుంటూ లేఖలు రాసి మరోసారి వెన్నుపోటుదారుడిగా నిరూపించుకున్నారని ఘాటు వ్యాఖ్యలు చేశారు. యనమల సెల్ఫ్ మేడ్ మేథావి.. చంద్రబాబు, యనమల పార్టీకి ప్రజలకు వెన్నుపోటు దారులు అంటూ మండిపడ్డారు. తూర్పుగోదావరి జిల్లాకు ప్రయోజనం వస్తుందంటే యనమల నిస్సుగ్గుగా అడ్డుకునే ప్రయత్నం చేశారన్నారు. యనమల మూడు దశాబ్దాల్లో జిల్లాకు చేసింది ఏమీ లేదన్నారు.

బల్క్ డ్రగ్ ప్రాజెక్ట్‌లో అమెరికన్ సంస్థలు అన్ని నిబంధనలు పాటిస్తాయని.. చంద్రబాబును ఎప్పుడో జనం మర్చిపోయారని.. కానీ యనమల టీడీపీ కార్యకర్తలను గుర్తు చేసేందుకు కేంద్రానికి లేఖ రాసినట్టు ఉందని ఎద్దేవా చేశారు. బల్క్ డ్రగ్ ప్రాజెక్ట్ కోసం 15 రాష్ట్రాలు పోటీ పడ్డాయని.. ఏపీ మాత్రం ఆ అవకాశం దక్కించుకుంది అన్నారు. పరిశ్రమలు ఏపీకి వస్తే ఆహ్వానిస్తాము.. అలాగే ప్రజల ఆరోగ్యం కోసం ప్రత్యేక శ్రద్ధ చూపిస్తామన్నారు.

చంద్రబాబు, యనమలను రాష్ట్రం నుంచి ప్రజలు బహిష్కరించాలన్నారు మంత్రి. టీడీపీ నేతలే కాదు.. కార్యకర్తలు కూడా చంద్రబాబును పూర్తిగా మరిచిపోయారన్నారు. జైలుకు వెళ్లిన వారికే పార్టీలో సముచిత స్థానం కల్పిస్తామని చంద్రబాబు చెప్పడం విడ్డూరంగా ఉందపిజజ వచ్చే ఎన్నికల్లో 175 సీట్లు గెలుచుకోవడంపై తాము కసరత్తు చేస్తుంటే.. చంద్రబాబు, ఆయన కుమారుడు కుప్పంలో ఎలా నెగ్గాలో మల్లగుల్లాలు పడుతున్నారని సెటైర్లు పేల్చారు. ఏ నియోజకవర్గం దొరక్క చివరికి హిందూపురం నుంచి పోటీ చేయడానికి కోడలిని బతిమిలాడుకోవాల్సిన పరిస్థితి ఉందన్నారు.

రెండేళ్ల క్రితం చిత్తూరు జిల్లాలో అమర్‌రాజా బ్యాటరీస్‌ అంశాన్ని మంత్రి ప్రస్తావించారు. ఈ కంపెనీ వల్ల చుట్టుపక్కల గ్రామాల్లో కలుషితం జరుగుతోందని ఫిర్యాదు వస్తే చంద్రబాబు, యనమల ఎందుకు స్పందించలేదన్నారు. పొల్యూషన్‌ కంట్రోల్‌ బోర్డు కూడా దీన్ని ధృవీకరించిందని.. టీడీపీకి చెందిన వారి పరిశ్రమల నుంచి కాలుష్యం వెలువడి ప్రజలు ఏమైపోయినా ఫర్వాలేదా అంటూ ప్రశ్నించారు.

రాష్ర్ట విభజనకు కారకులు చంద్రబాబు.. ఉమ్మడి రాజధాని హైదరాబాద్ విడిచి పారిపోయిన వ్యక్తి చంద్రబాబు అంటూ మండిపడ్డారు. అసాంఘిక కార్యకలాపాలకు పాల్పడే వారికి టీడీపీలో అవకాశం ఇస్తామని చంద్రబాబు చెప్పడం దారుణమన్నారు. శాంతి భద్రతలు అతిక్రమించిన చంద్రబాబు..లోకేష్ లను ముందు అరెస్ట్ చేయాలన్నారు. చంద్రబాబు రెచ్చగొట్టే ప్రయత్నాలు చేస్తున్నారని.. 14 ఏళ్లు సీఎంగా చేసినా తనను ప్రజలు గుర్తించు కొకపోవడంతో మదనపడుతున్నారని ఎద్దేవా చేశారు.