వేద నిలయం అమ్మే ప్రసక్తే లేదు...జయలలిత మేనకోడలు దీపా జయకుమార్

పోయెస్ గార్డెన్‌లోని వేద నిలయాన్ని అమ్మే ప్రసక్తేలేదని జయలలిత మేనకోడలు దీపా జయకుమార్ స్పష్టం చేశారు. తమిళనాడు దివంగత ముఖ్యమంత్రి, అన్నాడీఎంకే అధినేత్రి జయలలిత నివాసం వేద నిలయాన్ని అమ్మేస్తున్నారంటూ సోషల్ మీడియాలో జరుగుతున్న ప్రచారంపై ఆమె మేనకోడలు దీపా జయకుమార్ స్పందించారు.  వేద నిలయాన్ని కొనుగోలు చేయడానికి జయ స్నేహితురాలు వీకే శశికళ ప్రత్యేకంగా ట్రస్టును ఏర్పాటు చేశారని సామాజిక ప్రసార మాధ్యమాల్లో జరుగుతున్న ప్రచారాన్ని ఆమె ఖండించారు. ఈ మేరకు దీప ఓ వీడియోను విడుదల చేశారు.

సుదీర్ఘ న్యాయపోరాటం తర్వాత వేద నిలయం మాకు దక్కింది.. ఇది మా పూర్వీకుల ఆస్తి.. మాన బామ్మ సంధ్య మరణం తర్వాత జయలలిత ఆ నివాసానికి వారసురాలైంది.. అక్కడే నా తల్లిదండ్రులు, మేము గడిపాం.. జయలలిత రాజకీయ ప్రవేశం తర్వాత తాము అక్కడి నుంచి టీ.నగర్‌ నివాసానికి మారాం.. మద్రాసు హైకోర్టు ఉత్తర్వుల ప్రకారం జయకు నేను, నా సోదరుడు దీపక్‌ వారసులం’’అని పేర్కొన్నారు. ప్రస్తుతం వేద నిలయాన్ని సంరక్షించే బాధ్యతలను తాము నిర్వర్తిస్తున్నామని వెల్లడించారు. వాస్తవాలు ఇలా ఉండగా ఆ ఇంటిని తాను అమ్మకానికి ప్రయత్నిస్తున్నానని, పలువురు తనను సంప్రదించారనే వార్తల్లో ఏ మాత్రం నిజం లేదని ఆమె స్పష్టం చేశారు.

ఇదే సమయంలో శశికళకు కూడా దీపా పరోక్షంగా వార్నింగ్ ఇచ్చారు. శశికళ, జయలలిత మధ్య చరిత్ర గురించి తాను బాధపడటం లేదని దీప వ్యాఖ్యానించారు. ‘‘ నా మేనత్త రాజకీయ ప్రయాణంలో చాలా మంది ఆమెతో కలిసి ఉన్నారు.. వారందరూ కుటుంబం లేదా కుటుంబ ఆస్తిపై దావా వేయలేరు.. ఇది శశికళ కుటుంబానికి కూడా వర్తిస్తుంది. వేద నిలయం అమ్మడం లేదు.. అలాంటి పుకార్లను ఖండించాలని శశికళ కుటుంబాన్ని కోరుతున్నాను’’ అని దీపా ఉద్ఘాటించారు.

జయ మరణం తర్వాత అన్నాడీఎంకే ప్రభుత్వం వేద నిలయాన్ని స్మారకంగా మార్చాలని ప్రయత్నించింది. దీనిని జయలలిత మేనకోడలు, మేనళ్లుడు దీప, జయకుమార్‌లు మద్రాసు హైకోర్టులో సవాల్ చేశారు. కోర్టు వారికి అనుకూలంగా తీర్పు ఇచ్చింది. ఇంతలో అన్నాడీఎంకే ప్రభుత్వ గద్దె దిగి డీఎంకే అధికారంలోకి వచ్చి ఎంకే స్టాలిన్ ముఖ్యమంత్రి కావడంతో మద్రాసు హైకోర్టు ఆదేశాల ప్రకారం వేద నిలయాన్ని జయలలిత వారసులకు అప్పగించారు. శశికళ స్వాధీనం చేసుకోవడం ఇష్టం లేకనే వేద నిలయాన్ని స్మారక చిహ్నంగా మార్చేందుకు అన్నాడీఎంకే నేతలు మొగ్గు చూపారు. ఇప్పుడు అది చట్టబద్ధమైన వారసులకే అప్పగించినప్పటికీ శశికళ తమ వద్ద కొనుగోలు చేయగలదని వారు భయపడుతున్నారు.