మన వాళ్లు ఆ సమయంలో విచ్చలవిడిగా వాడేశారు...అవన్నీ సెంట్రల్ డ్రగ్ రెగ్యులేటరీ ఆమోదం లేనివే

ఏదీ మంచి జౌషదం ఏదీ కాదు అన్న తేడా తెలుసుకోలేని స్థితి నుంచి మనదేశ ప్రజలు ఇంకా బయటపడటంలేదు. ఇదిలావుంటే కోవిడ్-19 మహమ్మారికి ముందు, ఆ తర్వాత అజిత్రోమైసిన్ వంటి యాంటీబయాటిక్స్‌ను భారతీయులు విచ్చలవిడిగా వినియోగించినట్టు ఓ అధ్యయనం వెల్లడించింది. వీటిలో అజిత్రోమైసిన్ అగ్రస్థానంలో ఉందని తెలిపింది. ఈ ఔషధాల్లో చాలా వరకూ సెంట్రల్ డ్రగ్ రెగ్యులేటరీ ఆమోదం లేదని లాన్సెట్ రీజినల్ హెల్త్- దక్షిణాసియా జర్నల్‌లో సెప్టెంబరు 1న ప్రచురించిన అధ్యయనం పేర్కొంది. ‘‘ ఈ అధ్యయనం చాలా ముఖ్యమైంది.. ఎందుకంటే విచ్చలవిడిగా యాంటీబయాటిక్స్ వినియోగం భారతదేశంలో వ్యాధినిరోధక సామర్థ్యానికి కీలక అంశం’’ అని తెలిపింది.

నియంత్రణ విషయంలో జాతీయ, రాష్ట్ర ఏజెన్సీల మధ్య సమన్వయం దేశంలో యాంటీబయాటిక్స్ లభ్యత, అమ్మకాలు, వినియోగాన్ని క్లిష్టతరం చేస్తుందని అధ్యయనం అభిప్రాయపడింది. ‘‘అనేక దేశాలతో పోలిస్తే భారత్‌లో యాంటీబయాటిక్స్ తలసరి ప్రైవేట్ రంగం వినియోగ రేటు చాలా తక్కువగా ఉన్నప్పటికీ విస్తృతంగా చూస్తే పెద్ద పరిమాణంలో ఉపయోగిస్తున్నారు.. వీటిని సాధ్యమైనంత తక్కువగా వాడాలి’’ అని అధ్యయనం పేర్కొంది.

న్యూఢిల్లీకి చెందిన పబ్లిక్ హెల్త్ ఫౌండేషన్ ఆఫ్ ఇండియా నిపుణుడు ఆష్నా మెహతా అందించిన సహకారాన్ని కూడా అధ్యయనం గుర్తించింది. దేశవ్యాప్తంగా యాంటీబయాటిక్స్ విక్రయాల గణాంకాలను నమోదుచేసే ప్రైవేట్ రంగ ఔషధ అమ్మకాల సంస్థ ఫార్మాట్రాక్ డేటాను విశ్లేషించినట్లు పరిశోధకులు తెలిపారు. యాంటీబయాటిక్స్ తలసరి ప్రైవేట్ సెక్టార్ వినియోగాన్ని లెక్కించడానికి నిర్వచించిన రోజువారీ మోతాదు ప్రామాణికంగా తీసుకుంది.

2019లో మొత్తం రోజువారీ మోతాదు వినియోగం 5,071 మిలియన్లు.. దీనిని బట్టి 1,000 జనాభాకు 10.4 గా ఉందని తెలిపింది. ‘‘మొత్తం డ్రగ్స్ వినియోగంలో పన్నెండు యాంటీబయాటిక్‌లే 75% ఉన్నాయి.. అత్యధికంగా వినియోగించబడే యాంటీబయాటిక్ అజిత్రోమైసిన్ (640 మిలియన్ డీడీడీలు 12.6%) తర్వాత సెఫిక్సైమ్ (516 మిలియన్, 10.2%) నిలిచింది.. అజిత్రోమైసిన్ 500mg టాబ్లెట్ల (384 మిలియన్ డీడీడీలు, 7.6%) తర్వాతి స్థానంలో సెఫిక్సైమ్ 200mg (331మిలియన్ డీడీడీలు, 6.5%) ఉంది’’ అని పేర్కొంది.

‘‘నిత్యవసర ఔషధాల జాతీయ జాబితాలో నమోదయిన డ్రగ్స్ వాటా 49 శాతం (2486 మిలియన్ డీడీడీలు); ఎఫ్‌డీసీఎస్ కంట్రిబ్యూషన్ 34.0% (1722 మిలియన్లు), ఆమోదం లేని ఫార్ములాల వాటా 47.1% (2408 మిలియన్ డీడీడీఎస్)’’ అని తెలిపింది. భారతదేశంలో 1,098 ప్రత్యేకమైన ఫార్ములాలు, 10,100 ప్రత్యేకమైన బ్రాండ్‌ల యాంటీబయాటిక్స్ ఉన్నాయని కూడా వివరించింది.