కుప్పం ఉద్రిక్తల కేసులో...టీడీపీ నేతల అరెస్ట్
Andhra Pradesh Telugu | Suryaa Desk | Published : Wed, Sep 07, 2022, 10:42 PM
చంద్రబాబు పర్యటన సందర్భంగా కుప్పంలో నెలకొన్న ఉద్రిక్తత పరిస్థితులకు కారణమైన టీడీపీ నేతల అరెస్ట్‌లు కొనసాగుతున్నాయి. తాజాగా కుప్పం మాజీ జెడ్పీటీసీ రాజ్‌కుమార్‌ను హైదరాబాద్‌లో పోలీసులు అరెస్ట్ చేశారు. ఆయన్ను కుప్పం తీసుకొచ్చి వైద్య పరీక్షలు పూర్తి అయ్యాక కోర్టులో హాజరుపరచగా 14 రోజులు రిమాండ్ విధించింది. మొత్తం 60 మంది టీడీపీ నేతలు, కార్యకర్తలపై పోలీసులు కేసులు పెట్టారు. ఈ కేసులోనే రాజ్‌కుమార్‌ను పోలీసులు అరెస్టు చేశారు. ఇప్పటికే పలువురు నేతలు చిత్తూరు జైలులో ఉన్నారు.
టీడీపీ అధినేత చంద్రబాబు ఆగస్టు 24 నుంచి మూడు రోజుల పాటు కుప్పం నియోజకవర్గంలో పర్యటించారు. ఈ క్రమంలో పట్టణంలో ఉద్రిక్త పరిస్థితులు కనిపించాయి. టీడీపీ, వైఎస్సార్‌సీపీలు పోటా పోటీగా నిరసనకు దిగాయి.. ర్యాలీలతో హై టెన్షన్ వాతావరణం కనిపించింది. ఆ తర్వాత టీడీపీ ఏర్పాటు చేసిన అన్న క్యాంటిన్‌ను వైఎస్సార్‌సీపీ కార్యకర్తలు ధ్వంసం చేశారు. ఈ ఘటనను నిరసిస్తూ చంద్రబాబు రోడ్డుపై బైఠాయించారు. వైఎస్సార్‌సీపీ ప్రభుత్వ తీరుపై ఆగ్రహం వ్యక్తం చేశారు. ఆ తర్వాత కొద్దిరోజులకే నారా లోకేష్ చిత్తూరు జిల్లా పర్యటన రోజు మరోసారి అన్న క్యాంటిన్‌ను ధ్వంసం చేయడం హీట్ పెంచింది.
|
|