గుడివాడలో హైటెన్షన్...టీడీపీ ఎమ్మెల్యే గద్దె రామ్మోహన్ అరెస్ట్

ఏపీలో వైసీపీ వర్సెస్ టీడీపీ అన్నట్లుగా సాగుతున్న మాటల యుద్దం కాస్త తీవ్ర రూపం దాల్చుతోంది. తాజాగా గుడివాడ వైఎస్సార్ కాంగ్రెస్ పార్టీ ఎమ్మెల్యే, మాజీ మంత్రి కొడాలి నానిపై తెలుగు దేశం పార్టీ నాయకులు భగ్గుమంటున్నారు. కొడాలి నానికి వ్యతిరేకంగా టీడీపీ నేతలు ఆందోళనలు చేపడుతున్నారు. అయితే, టీడీపీ నేతలను గుడివాడ వెళ్లకుండా పోలీసులు ఎక్కడికక్కడ అడ్డుకుంటున్నారు. ఇందులో భాగంగా గుడివాడ వస్తున్న టీడీపీ ఎమ్మెల్యే గద్దె రామ్మోహన్ వాహనాన్ని కంకిపాడు టోల్‌గేట్ వద్ద పోలీసులు అడ్డుకుని అరెస్టు చేశారు. అనంతరం ఎమ్మెల్యే గద్దె రామ్మోహన్‌ను ఉంగుటూరు పీఎస్‌కు తరలించారు.

ఇదిలావుంటే తెలుగుదేశం పార్టీ అధినేత చంద్రబాబునాయుడు, ఆయన కుమారుడు నారా లోకేష్‌‌పై కొడాలి నాని అనుచిత వ్యాఖ్యలు చేశారంటూ ఆదివారం ఉదయం తాడేపల్లి పోలీస్‌ స్టేషన్‌లో ఫిర్యాదు చేశారు. అలాగే, కొడాలి నానిపై గుడివాడ పోలీస్ స్టేషన్‌లో ఫిర్యాదు చేసేందుకు వెళ్తున్న టీడీపీ నేతలను పోలీసులు ఎక్కడికక్కడ అడ్డుకుంటున్నారు. దీంతో పామర్రులో హై టెన్షన్ వాతావరణం నెలకొంది. పామర్రు చేరుకున్న కొందరు టీడీపీ నేతలను పోలీసులు అడ్డుకున్నారు.

ఈ సందర్భంగా కొడాలి నానిపై టీడీపీ నేతలు నిప్పులు చెరుగుతున్నారు. మాజీ ఎమ్మెల్యే, టీడీపీ కోశాధికారి శ్రీరాం తాతయ్య మాట్లాడుతూ.. చంద్రబాబు కుటుంబంపై అవాకులు చెవాకులు పేలితే ఆకాశంపై ఉమ్మేసినట్టేనని, అలాంటి వ్యాఖ్యల ద్వారా చరిత్ర హీనుడిగా నిలిచిపోతావని మాజీ మంత్రి కొడాలిపై ఫైరయ్యారు. సంస్కారహీనంగా మహిళల గురించి మాట్లాడితే సభ్య సమాజం ఏమాత్రం సహించన్నారు.

తెలుగు రైతు రాష్ట్ర అధికార ప్రతినిధి కొఠారు సత్యనారాయణ ప్రసాద్‌ మాట్లాడుతూ.. ఢిల్లీ లిక్కర్‌ స్కామ్‌లో సీఎం జగన్‌ కుటుంబ సభ్యుల పేర్లు వినిపిస్తుంటే ప్రజల దృష్టి మరల్చేందుకు కొడాలి నానితో ముఖ్యమంత్రి వైఎస్ జగన్మోహన్ రెడ్డి ఇలాంటి వ్యాఖ్యలు చేయిస్తున్నారని ఆరోపించారు. నియోజకవర్గ తెలుగు మహిళా అధ్యక్షురాలు కన్నెబోయిన రామలక్ష్మి మాట్లాడుతూ.. కొడాలి నానికి దమ్ముంటే తన రౌడీ అనుచరులు, పోలీసులు లేకుండా మహిళల వద్దకు వచ్చి అలాంటి మాటలు మాట్లాడాలని సవాల్‌ చేశారు. త్వరలోనే తెలుగు మహిళలు నాని తాట తీస్తారని హెచ్చరించారు.