కళ్యాణమస్తుకు షరత్తులు వర్తిస్తాయి...తాజాగా ప్రకటించిన ప్రభుత్వం

కళ్యాణమస్తు పథకాన్ని ప్రారంభించిన ఏపీ సర్కార్ దానికి షరత్తులను కూడా విధించింది. ఇదిలావుంటే కళ్యాణమస్తు పథకంతో పేదింటి ఆడబిడ్డలకు ముఖ్యమంత్రి వైఎస్ జగన్మోహన్ రెడ్డి అండగా నిలిచారని రాష్ట్ర విద్యా శాఖ మంత్రి బొత్స సత్యనారాయణ అన్నారు. రాష్ట్రంలో ఏ పథకం ప్రారంభించినా కొందరు కావాలనే విషం చిమ్ముతున్నారని తీవ్ర ఆగ్రహం వ్యక్తం చేశారు. ఎన్నికల హామీలను నెరవేర్చే క్రమంలో ఎస్సీ, ఎస్టీ, బీసీ, మైనారిటీ యువతులకు వివాహ సహకారం కోసం కళ్యాణమస్తు, షాదీ తోఫా పథకాన్ని ప్రభుత్వం ప్రకటించిందని మంత్రి బొత్స సత్యనారాయణ వెల్లడించారు.

తెలుగు దేశం పార్టీ అధినేత, ప్రతిపక్ష నేత చంద్రబాబునాయుడు మాదిరిగా సీఎం జగన్‌ మోసం చేయలేదని మంత్రి బొత్స పేర్కొన్నారు. కళ్యాణమస్తు పథకంతో ఎన్నికల మేనిఫెస్టోలోని 98 శాతం హామీలను సీఎం జగన్‌ అమలు చేశారని వివరించారు.

ఇక, ఈ పథకం వర్తించేందుకు ప్రభుత్వం పలు నిబంధనలు విధించింది. పెళ్లి కూతురు కచ్చితంగా 10వ తరగతి పాసై ఉండాలని మంత్రి బొత్స సత్యనారాయణ వెల్లడించారు. అక్టోబర్ 1వ తేదీ నుంచి ఈ పథకం అమల్లోకి వస్తుందన్నారు. ఈ పథకం అమలుతో మూడున్నర ఏళ్లలోనే మేనిఫెస్టోలో చెప్పిన 98 శాతం పథకాలు పూర్తి చేయటం ఒక రికార్డు అన్నారు.

ప్రజల ఆలోచనను పక్కదారి పట్టించేందుకే కొన్ని పత్రికలు లేనిపోని కథనాలు రాస్తున్నాయని మంత్రి బొత్స దుయ్యబట్టారు. అమరావతి టు అరసవల్లి పాదయాత్ర అంటున్నారని.. అంటే ఉత్తరాంధ్ర అభివృద్ధి కానవసరం లేదా అని ప్రశ్నించారు. చంద్రబాబు చెవిలో పూలు పెడితే వినటానికి ఏమైనా చిన్నపిల్లలమా ఎద్దేవా చేశారు. చంద్రబాబు పదే పదే అబద్ధాలు చెబితే ప్రజలు నమ్మరని మంత్రి బొత్స చెప్పారు.