"విడాకుల ఆహ్వానం" అనే పేరుతో...వింత వేడుక

కాలం మారుతున్న కొద్ది భార్య బాధితులు కూడా బాగా పెరిగిపోతున్నారు. ఈ తరుణంలో మధ్యప్రదేశ్‌లోని భోపాల్లో ఓ ఎన్జీవో సంస్థ సరికొత్త కార్యక్రమానికి శ్రీకారం చుట్టింది. కని వినీ ఎరగని రీతిలో విడాకుల తీసుకున్నందుకు వేడుక నిర్వహిస్తుంది. భాయ్ వెల్ఫేర్ సొసైటీ పెళ్లైన మగవాళ్లపై జరుగుతున్న అన్యాయాలపై పోరాడుతుంది. అయితే ఈ సంస్థ చేసిన సుదీర్ఘ న్యాయ పోరాటాల ద్వారా 18 మంది మగవాళ్లకు విడాకులు వచ్చాయి. దాంతో వారి విడాకులపై సంస్థ వేడుక నిర్వహిస్తుంది. దీనికోసం "విడాకుల ఆహ్వానం" అనే పేరుతో ఓ ఇన్విటేషన్‌ కూడా ప్రింట్ చేయించింది.

ఈ విడాకుల వేడుక సెప్టెంబర్ 18న జరగనుంది. విడాకుల తీసుకునే విషయాన్ని ఆ సంస్థ సరికొత్త ఆరంభంగా పరిగణిస్తుంది. దాంతో ఇలా వేడుకను నిర్వహించాలని నిర్ణయం తీసుకుంది. ఈ వేడుకలో రకరకాలైన కార్యక్రమాలను కూడా ఏర్పాటు చేసింది. వాటికి సంబంధించిన విశేషాలను ఆహ్వాన పత్రికలో వెల్లడించింది. అందులో ముఖ్యంగా జయమాల విసర్జన్ (వివాహ మాల నిమజ్జనం), మగవాళ్ల సంగీతం, సామాజిక సేవ కోసం ప్రతిజ్ఞలు, మనస్సాక్షిని శుభ్రపరిచే పవిత్రమైన అగ్ని ఆచారం వంటి ఈవెంట్స్ ఉన్నాయి.

ఈ సందర్భంగా విడాకులు తీసుకున్న మగవాళ్లు స్వేచ్ఛను సెలబ్రేట్ చేసుకుంటున్నారని భాయ్ వెల్ఫేర్ సొసైటీ పేర్కొంది. భార్యా బాధితులైన మగవాళ్ల కోసం తమ సంస్థ పోరాడుతుందని వెల్లడించింది. "గత రెండున్నరేళ్లలో 18 మంది మగవాళ్లు తమ జీవితాన్ని దుర్భరం చేసిన వివాహం నుంచి విముక్తి పొందారు. మేము హెల్ప్‌లైన్ ద్వారా అలాంటి వారు మానసికంగా స్థిరంగా ఉండేందుకు చేయూతనిస్తాం." అని ఆర్గనైజింగ్ కమిటీ సభ్యుడు జకీ అహ్మద్ అన్నారు. చట్టపరమైన కేసులు బాధితులను ఆర్థికంగా, మానసికంగా దెబ్బతీస్తాయని చెప్పారు.

విడాకులు తీసుకున్న ఈ మగవాళ్లు తమ కొత్త జీవితాలను సానుకూల మనస్తత్వంతో, మరింత ఆత్మ గౌరవంతో ముందుకు వెళ్లేందుకు ఈ వేడుక ఒక మార్గమని ఆ సంస్థ అంటుంది. 18 మందిలో కొంతమంది ఏళ్ల తరబడి విడాకుల కోసం పోరాడాల్సి వచ్చిందని, వేచి చూడాల్సి వచ్చిందని సంస్థ ప్రతినిధులు తెలియజేశారు. ఈ నేపథ్యంలో వారి విడాకులను సెలబ్రేట్ చేయాలనే ఉద్దేశంతో.. కొద్దిమందితో దీనిని ప్లాన్ చేశారు. కానీ ఆహ్వాన పత్రిక వైరల్ అవ్వడంతో.. ఈవెంట్‌ను గ్రాండ్‌గా జరపేందుకు రీ డిజైన్ చేశారు. దీనిపై నెటిజన్లు కూడా తమదైన శైలీలో స్పందిస్తున్నారు. చాలామంది పాజిటివ్‌గానే తీసుకుంటున్నారు. మన చట్టం ప్రకారం విడాకులు తీసుకోవడం కష్టమని.. ఇలాంటి సెలబ్రేషన్స్ జరగాలని కూడా కొంతమంది అభిప్రాయపడుతున్నారు. మొత్తానికి ఇదొక వింత పార్టీగా మారింది.