ఇరాన్ పతనమైందా? హార్ముజ్ జలసంధి తెరవడానికి సిద్ధమని ట్రంప్ వ్యాఖ్యలు

ఇరాన్‌తో కొనసాగుతున్న ఉద్రిక్తతల మధ్య అణు కార్యక్రమంపై చర్చలను తాత్కాలికంగా నిలిపివేసి, అమెరికా ఆంక్షలను ఎత్తివేస్తే యుద్ధాన్ని ముగించడంతో పాటు హార్మూజ్ జలసంధిని తిరిగి తెరవడానికి సిద్ధమని ఇరాన్ ప్రతిపాదించినట్లు సమాచారం. అయితే ఈ ప్రతిపాదనపై అమెరికా ప్రభుత్వం సానుకూలంగా స్పందించే అవకాశాలు తక్కువగా కనిపిస్తున్నాయి.పాకిస్థాన్ ద్వారా అమెరికాకు చేరిన ఈ ప్రతిపాదనపై ఇప్పటికే అమెరికా విదేశాంగ మంత్రి మార్కో రూబియో సందేహాలు వ్యక్తం చేశారు. ఏ ఒప్పందమైనా ఇరాన్ అణ్వాయుధాల అభివృద్ధి దిశగా ముందుకు వెళ్లకుండా పూర్తిగా అడ్డుకునేలా ఉండాలని ఆయన ఫాక్స్ న్యూస్ ఇంటర్వ్యూలో స్పష్టం చేశారు.ఈ ప్రతిపాదనపై అధ్యక్షుడు డొనాల్డ్ ట్రంప్ తన జాతీయ భద్రతా బృందంతో చర్చించినట్లు వైట్ హౌస్ తెలిపింది. దీనిపై ఆయన త్వరలో అధికారిక ప్రకటన చేసే అవకాశం ఉంది.ఇరాన్ విదేశాంగ మంత్రి అబ్బాస్ అర్ఘాచి రష్యా పర్యటనలో ఉన్న సమయంలో ఈ అంశం వెలుగులోకి వచ్చింది. ఇరాన్‌కు దీర్ఘకాల మిత్రదేశమైన రష్యా ఈ వ్యవహారంలో ఎలాంటి పాత్ర పోషిస్తుందన్నది ఇంకా స్పష్టంగా లేదు.యుద్ధం ప్రారంభమైనప్పటి నుంచి ఇరాన్‌లో కనీసం 3,375 మంది మరణించినట్లు నివేదికలు చెబుతున్నాయి. అలాగే లెబనాన్‌లో హెజ్బొల్లా–ఇజ్రాయెల్ ఘర్షణల్లో 2,500 మందికి పైగా ప్రాణాలు కోల్పోయారు.ఇజ్రాయెల్‌లో 23 మంది, గల్ఫ్ అరబ్ దేశాల్లో డజను మందికి పైగా మరణించినట్లు సమాచారం. లెబనాన్‌లో 16 మంది ఇజ్రాయెల్ సైనికులు, అలాగే 13 మంది అమెరికా సైనిక సిబ్బంది, ఆరుగురు ఐక్యరాజ్యసమితి శాంతి దళాల సిబ్బంది కూడా ప్రాణాలు కోల్పోయినట్లు నివేదికలు పేర్కొంటున్నాయి.మంగళవారం దక్షిణ లెబనాన్‌లోని పలు గ్రామాలపై ఇజ్రాయెల్ వైమానిక దాడులు జరిగినట్లు లెబనాన్ ప్రభుత్వ వార్తా సంస్థ తెలిపింది. అదే సమయంలో డ్రోన్ దాడులు కూడా చోటుచేసుకున్నాయి. దాడుల అనంతరం ప్రాణనష్టం వివరాలు ఇంకా స్పష్టంగా తెలియరాలేదు.దక్షిణ లెబనాన్‌లోని 16 గ్రామాల ప్రజలు వెంటనే ప్రాంతం విడిచి వెళ్లాలని ఇజ్రాయెల్ సైన్యం హెచ్చరికలు జారీ చేసిన కొద్దిసేపటికే ఈ దాడులు జరిగినట్లు తెలుస్తోంది. హెజ్బొల్లా ఈ గ్రామాలను ఇజ్రాయెల్‌పై దాడులకు ఉపయోగిస్తున్నదని ఇజ్రాయెల్ ఆరోపిస్తోంది.