బాబు కుట్రలో భాగంగానే ఆ మహా పాదయాత్ర: విడదల రజినీ
Andhra Pradesh Telugu | Suryaa Desk | Published : Sun, Sep 11, 2022, 11:41 PM
టీడీపీ అధినేత నారా చంద్రబాబాబునాయుడిపై రాష్ట్ర వైద్య, ఆరోగ్య శాఖ మంత్రి, విశాఖపట్నం జిల్లా వైఎస్సార్‌ కాంగ్రెస్ పార్టీ ఇన్‌ఛార్జ్ విడదల రజినీ తీవ్రంగా మండిపడ్డారు. తెలుగు దేశం పార్టీ అధినేత, ప్రతిపక్ష నాయకుడు చంద్రబాబునాయుడు కుట్రలో భాగంగానే అమరావతి రైతుల పేరిట పాదయాత్ర చేపట్టారని విడదల రజనీ ఆరోపించారు. అమరావతి, ఉత్తరాంధ్ర ప్రజల మధ్య ఎలాంటి విధ్వేషాలు లేవని, అంతా తెలుగు వారేనని ఆమె తెలిపారు.
విశాఖపట్నంలోని కింగ్ జార్జ్‌ ఆసుపత్రిలో మంత్రి విడదల రజనీ విస్తృత స్థాయి తనిఖీలు చేపట్టారు. ఈ సందర్భంగా మీడియాతో మంత్రి రజినీ మాట్లాడుతూ.. చంద్రబాబునాయుడు ఈ వయసులో పాదయాత్ర చేయలేరని.. ఆయన కుమారుడు లోకేష్ పాదయాత్ర చేసినా జనం విశ్వసించరన్నారు. అందుకే అమరావతి రైతుల పేరిట చంద్రబాబు నాయుడు కొత్త డ్రామాకు తెరలేపారని వ్యాఖ్యానించారు.
ముఖ్యమంత్రి వైఎస్ జగన్మోహన్ రెడ్డి రాష్ట్రంలోని అన్ని ప్రాంతాలు అభివృద్ధి చెందాలన్న ఉద్దేశంతోనే విశాఖపట్నం, కర్నూలు, అమరావతిలను మూడు రాజధానులుగా గుర్తించారని మంత్రి విడదల రజినీ తెలిపారు. ఎవరెన్ని అవాంతరాలు సృష్టించినా మూడు రాజధానుల ప్రక్రియ ముందుకెళ్తుందని తేల్చిచెప్పారు. ఇక, అమరావతి రైతుల పేరిట జరిగే పాదయాత్రలో జరిగే పరిణామాలకు చంద్రబాబునాయుడే బాధ్యత వహించాలని మంత్రి విడదల రజినీ డిమాండ్ చేశారు.
|
|