బ్యాంకులకు టోకరపెట్టి...లాకర్లను బంగారంతో నింపేశాడు

అవినీతి సొమ్ము ఏదో ఒక రోజు చట్టం చేతుల్లోకి రావాల్సిందే. తాజాగా ఓ ఘటన విచారణ అధికార్లకు షాక్ కు గురిచేసింది. ఇటీవల వేల కోట్ల రూపాయాలు రుణం తీసుకుని ఎగ్గొట్టి, బ్యాంకుల్ని మోసం చేసిన ఓ ముంబయి సంస్థపై కేసు నమోదు కాగా.. ఎన్‌పోర్స్‌మెంట్ డైరెక్టరేట్ మెరుపు సోదాలు నిర్వహించింది. ఈ సోదాల్లో భారీగా బంగారు కడ్డీలు, వెండి ఇటుకలు బయటపడగా.. వీటి విలువ రూ.47 కోట్లకుపైగా ఉంటుందని అంచనా. పరేఖ్‌ అల్యూమినెక్స్‌ లిమిటెడ్‌ కంపెనీ పలు బ్యాంకుల నుంచి రూ.2,296.58 కోట్లు రుణం తీసుకొని ఎగ్గొట్టింది. మోసపూరితంగా రుణాలు తీసుకుందన్న ఆరోపణలపై 2018లో ఆ కంపెనీపై ఈడీ మనీలాండరింగ్‌ కేసు నమోదైంది.

ఈ కేసు విచారణలో భాగంగా రక్షా బులియన్‌, క్లాసిక్‌ మార్బల్స్‌ కంపెనీలలో ఈడీ సోదాలు నిర్వహించింది. ఈ క్రమంలో రక్షా బులియన్‌ సంస్థకు సంబంధించి కొన్ని ప్రైవేటు లాకర్లు ఉన్నట్టు గుర్తించింది. దీంతో ప్రైవేటు లాకర్లను తెరిచిన అధికారులు వాటిలో ఉన్న బంగారం, వెండిని చూసి షాక్‌ అయ్యారు. సరైన నిబంధనలు పాటించకుండా ఈ లాకర్లు నిర్వహిస్తున్నట్టు తేలింది. కైవేసీ పాటించకపోవడం, ఆ ప్రాంగణంలో సీసీ కెమెరాలు లేకపోవడం, ఎవరు వస్తున్నారు, ఎవరు వెళ్తున్నారనే సమాచారం తెలిపే సరైన రిజిస్టర్‌ కూడా నిర్వహించలేదని గుర్తించినట్టు ఈడీ అధికారులు ప్రకటనలో తెలిపారు.

అక్కడ మొత్తం 761 లాకర్లు ఉండగా.. మూడు లాకర్లు రక్షా బులియన్‌కు చెందినవిగా గుర్తించామని పేర్కొన్నారు. మొత్తం మూడింటిలో రెండు లాకర్లలో 91.5కిలోల బంగారు కడ్డీలు, 152 కిలోల వెండి.. మరో లాకర్‌లో 188 కిలోల వెండి ఉందని వివరించారు. వీటి విలువ రూ.47.76 కోట్లు ఉంటుందని పేర్కొన్నారు. మరోవైపు, ఇదే కేసుకు సంబంధించి 2019లో ఈడీ రూ.205 కోట్ల ఆస్తులను అటాచ్‌ చేసింది. రుణాలుగా తీసుకుని పలు ఖాతాలకు డబ్బు మళ్లించారు.. పెట్టుబడుల పెట్టాలనే ఉద్దేశంతో రుణాలు తీసుకోవలేదు.. అటువంటి లావాదేవీలకు ఎటువంటి ఒప్పందాలు లేవు అని ఈడీ పేర్కొంది.