పాములు రక్షణలో...అక్కడి పోలీస్ స్టేషన్

అందరికీ రక్షణఇచ్చే పోలీసులకు పాములు రక్షణ ఇవ్వాల్సిన పరిస్థితి కేరళ రాష్ట్రంలో చోటుచేసుకొంది. కేరళలోని హై-రేంజ్ ఇడుక్కిలోని దట్టమైన అడవిలో ఉండే ఓ పోలీస్ స్టేషన్‌కి కోతులు బెడద ఎక్కువగా ఉంది. వాటితో పోలీసులు విసిగిపోయారు. ఎంత తరిమికొట్టినా.. మళ్లీ మళ్లీ వచ్చి ఇబ్బంది పెడుతుండేవి. దాంతో కోతుల నుంచి తమను తాము రక్షించుకోవడానికి వారు విచిత్రమైన ఆలోచన చేశారు. కోతులను భయపట్టేందుకు రబ్బరు పాములను పెడుతున్నారు. కేరళ-తమిళనాడు సరిహద్దులో ఉన్న కుంబుమెట్టు పోలీస్ స్టేషన్ చుట్టూ కోతులను భయపెట్టేందుకు రబ్బరు పాములను ఏర్పాటు చేస్తున్నారు. ఈ ట్రిక్ చాలా విజయవంతమైంది.

అచ్చం పాముల్లా ఉండే రబ్బరు పాములను తయారు చేయించి.. వాటిని తెచ్చి పోలీస్ స్టేషన్‌ సమీపంలోని చెట్ల కొమ్మలపై, గ్రిల్స్‌పై పెడుతున్నారు. దాంతో అవి నిజమైన పాములనుకుని కోతులు ఆ చుట్టుపక్కలకే వెళ్లడం మానేశాయి. కోతుల నుంచి పోలీసులకు ఉపశమనం లభించింది. రబ్బరు పాములను చూసిన తర్వాత ఏ కోతి పోలీస్ స్టేషన్‌ వైపు రావడానికి ధైర్యం చేయడం లేదని, కోతులు ఎక్కువగా వచ్చే దగ్గర అలా రబ్బరు పాములను పెడితే వాటి బెడద ఉండడం లేదని కుంబుమెట్టు సబ్‌ఇన్‌స్పెక్టర్‌ పీకే లాల్‌భాయ్‌ చెప్పారు.

కొన్నేళ్లుగా స్టేషన్‌లో కోతులు ఇబ్బందులకు గురి చేస్తున్నాయని మరో పోలీస్ మనీష్ చెప్పారు. "కోతుల గుంపుగా వచ్చి స్టేషన్ ఆవరణలో తిరుగుతూ మా కాంపౌండ్‌లోని కూరగాయల తోటను కూడా నాశనం చేసేవి. కానీ రబ్బరు పాములను పెట్టడంతో.. వాటి రాక తగ్గిపోయింది." అని మనీష్ చెప్పారు. అంతేకాదు సమీపంలోని ఉడుంబన్‌చోలలోని ఏలకుల రైతు నుంచి ఈ రబ్బరు పాములను ఉంచే ఉపాయం గురించి తెలుసుకున్నామని పోలీసులు చెప్పారు.