మహిళల రక్షణగా ఆ గన్ రూపకల్పన..యూపీ వాసి అద్భుత తయారి

మనదేశంలో కళాకారులకు  ఏ మాత్రం కొదవేలేదు. తాజాగా యూపీ వాసి తయారు చేసిన ఓ వస్తువు ఇపుడు తీవ్ర చర్చాంశనీయంగా మారింది. ఇంట్లోంచి బయటికి వెళితే మహిళలకు రక్షణ లేని పరిస్థితి. ఎక్కడికైనా వెళ్లి తిరిగి వస్తుంటే అల్లరి మూకలతో ఇబ్బంది. ఇక రాత్రిళ్లు అయితే సమస్య మరీ దారుణంగా ఉంటుంది. ఇలాంటి సమయంలో యువతులు, మహిళల రక్షణకు భిన్నమైన ఉపకరణాలు ఉంటే బాగుంటుందన్న ఆలోచనతో ఉత్తర ప్రదేశ్ కు చెందిన శ్యామ్ చౌరాసియా అనే యువకుడు వినూత్నమైన పరికరాలను రూపొందించాడు. ఆధునిక సాంకేతితను ఉపయోగించి ఒక ప్రత్యేకమైన కిట్ ను కూడా రూపొందించాడు.

మహిళలు నిత్యం ఉపయోగించే వస్తువుల రూపంలోనే ప్రత్యేకమైన కిట్ ను శ్యామ్ చౌరాసియా రూపొందించాడు. అందులో ఉన్నవి సాదాసీదా ఉపకరణాలు కాదు. రివాల్వర్, జీపీఎస్ ట్రాకర్లు కావడం గమనార్హం. ఈ కిట్ లో ఒక పర్సు, జత ఎత్తు చెప్పులు, చెవులకు పెట్టుకునే కమ్మలు ఉన్నాయి.

ఇందులో పర్సుకు ‘స్మార్ట్ పర్స్ గన్’గా పేరు పెట్టాడు. దీనికి ఓ వైపు ఉండే ఎరుపురంగు బటన్ ను నొక్కితే రివాల్వర్ పేలుతుంది. బిగ్గరగా ధ్వని వస్తుంది.

రెండో పరికరం కాళ్లకు వేసుకునే శాండల్స్ (ఎత్తు చెప్పులు) లో కూడా చిన్నపాటి రివాల్వర్ ను అమర్చాడు. దీనికి కూడా ఓ వైపు ఉండే బటన్ ను నొక్కితే రివాల్వర్  పేలుతుంది. అంతేకాదు దానిలో బ్లూటూత్ సదుపాయం ఉంది. స్మార్ట్ ఫోన్ తో బ్లూటూత్ సాయంతోనూ రివాల్వర్ ను పేల్చవచ్చు.

మూడోది చెవులకు పెట్టుకునే ప్రత్యేకమైన ఇయర్ రింగ్స్. ఇందులో జీపీఎస్ ట్రాకర్ తోపాటు అత్యవసర ఫోన్ కాల్ సదుపాయం ఉంది. సదరు మహిళలు తప్పిపోయినప్పుడు, వారు ఎలాంటి సిగ్నల్ ఇవ్వలేని పరిస్థితిలో ఉన్నప్పుడు ఆటోమేటిగ్గా.. ఈ జీపీఎస్ ట్రాకర్ల ద్వారా వారు ఎక్కడున్నారో గుర్తించడానికి వీలుంటుంది. ఇక లిప్ స్టిక్ రూపంలో ఉండే చిన్నపాటి గన్ ను కూడా శ్యామ్ చౌరాసియా రూపొందించాడు. ఇది కూడా చిన్న బటన్ ను నొక్కితే పేలుతుంది.

అయితే ఈ తుపాకీలలో నిజమైన బుల్లెట్లు కాకుండా ఎయిర్ గన్ తరహా బుల్లెట్లను ఉపయోగించాడు. తుపాకీ కాల్చినప్పుడు వచ్చినట్టుగా బిగ్గరమైన శబ్దం వస్తుందని, అందరి దృష్టినీ ఆకర్షిస్తుందని చౌరాసియా చెబుతున్నాడు. ఈ పరికరాలన్నీ రీచార్జబుల్ అని.. ఒకసారి చార్జింగ్ చేస్తే రెండు వారాల పాటు వినియోగించుకోవచ్చని అంటున్నాడు. ఈ మూడు పరికరాలను కలిపి రూ.2,497 కే అందిస్తానని చౌరాసియా చెబుతున్నాడు. అబ్దుల్ కలాం యూనివర్సిటీ ఇన్నోవేషన్ హబ్ సాయంతో వీటిని మార్కెట్లోకి తెచ్చేందుకు ఏర్పాట్లు చేస్తున్నట్టు వివరిస్తున్నాడు.