ఏపీ అసెంబ్లీ నుంచి 15మంది టీడీపీ సభ్యుల సస్పెన్షన్
Andhra Pradesh Telugu | Suryaa Desk | Published : Tue, Sep 20, 2022, 02:04 PM
ఏపీ అసెంబ్లీ నుంచి 15 మంది టీడీపీ సభ్యులను స్పీకర్ ఒక రోజు సస్పెన్షన్ చేశారు. వరుసగా నాలుగవ రోజు టీడీపీ సభ్యులు సస్పెన్షన్ అయ్యారు. సంక్షోభంలో సంక్షేమం అంటూ సభలో నినాదాలు చేశారు ప్రతి పక్ష సభ్యులు. సంక్షేమ పథకాల అమలుపై తామిచ్చిన వాయిదా తీర్మానంపై చర్చకు పట్టు బట్టారు. స్పీకర్ పోడియాన్ని చుట్టుముట్టి నినాదాలు చేశారు. సంక్షోభంలో సంక్షేమం అని రాసిన ప్లకార్డులను ప్రదర్శించారు. చర్చకు సహకరించాలని కోరినా వారు వినకపోవడంతో ఒకరోజు సస్పెండ్ చేశారు స్పీకర్ తమ్మినేని సీతారాం.
కాగా, టీడీపీ ప్రభుత్వ హయాంలో ప్రైవేట్ వ్యక్తుల డేటా చోరీకి గురైందని తేల్చింది సభా కమిటీ. ఆ కమిటీ చైర్మన్ భూమన కరుణాకర్రెడ్డి మధ్యంతర నివేదికను అసెంబ్లీలో ప్రవేశపెట్టారు. 2018-19 సమయంలో స్టేట్ డేటా సెంటర్లో ఉండాల్సిన సమాచారం టీడీపీ నేతలకు పంపినట్లు గుర్తించామన్నారు. అప్పటి ప్రభుత్వానికి అనుకూలంగా లేని 30 లక్షల మందిని గుర్తించి, వారి ఓట్లను తొలగించే ప్రయత్నం చేశారని చెప్పారు. టీడీపీ సేవా మిత్ర యాప్ ద్వారా డేటాను దుర్వినియోగం చేశారన్నారు. దానిపై పూర్తి స్థాయిలో విచారణ జరగాల్సి ఉందన్నారు భూమన కరుణాకర్రెడ్డి. అటు డేటా చౌర్యం కుట్రలో లోకేష్ హస్తం ఉందని ఆరోపించారు హౌస్ కమిటీ సభ్యుడు అబ్బయ్య చౌదరి. చంద్రబాబు సభకు వస్తే డేటా చోరీ ఎవరు చేశారు..? ఎలా చేశారో ఆధారాలతో సహా నిరూపిస్తామన్నారు.
|
|