జబర్దస్త్ లో ఆ స్కీట్ చేస్తే బాగుంటుంది..రోజాకు సోమిరెడ్డి సూచన

మూడు రాజధానులపై జబర్దస్త్‌లో స్కిట్ వేయాలని మంత్రి ఆర్కే రోజాపై టీడీపీ సీనియర్ నాయకుడు సోమిరెడ్డి చంద్రమోహన్ రెడ్డి సెటైర్లు వేశారు. ప్రజల్లో వస్తున్న వ్యతిరేకత చూసి ఏపీ మంత్రులు, వైఎస్సార్ కాంగ్రెస్ పార్టీ ఎమ్మెల్యేలకు మతిపోతోందని తెలుగు దేశం పార్టీ సీనియర్ నాయకుడు, మాజీ మంత్రి సోమిరెడ్డి చంద్రమోహన్ రెడ్డి అన్నారు. ఈ మేరకు సోమవారం సోమిరెడ్డి మీడియాతో మాట్లాడుతూ.. వైసీపీ నేతలు, మంత్రులపై మండిపడ్డారు. సాక్షాత్తు ప్రధాన మంత్రి నరేంద్ర మోదీ శంకుస్థాపన చేసిన అమరావతిపైనే ఇప్పుడు విమర్శలు చేస్తున్నారని దుయ్యబట్టారు. అమరావతిలో రాజధాని ఏర్పాటుకు శాసనసభలో అధికార, ప్రతిపక్షాలు అంగీకరించినందు వల్లే రైతులు భూములిచ్చారని వెల్లడించారు. అమరావతిలో రాజధాని కడుతామని చెప్పే కృష్ణా, గుంటూరు జిల్లాల్లో వైసీపీ గెలిచిందన్నారు.

ఎమ్మెల్యే పదవికి కరణం ధర్మశ్రీ కాదు.. కృష్ణా, గుంటూరు జిల్లాల ఎమ్మెల్యేలు, మంత్రులు రాజీనామా చేసి ఎన్నికలకు రావాలని సోమిరెడ్డి చంద్రమోహన్ రెడ్డి సవాల్ విసిరారు. విశాఖపట్నంలో సగానికి పైగా పరిశ్రమలు వెనక్కు వెళ్లిపోయాయని ఆందోళన వ్యక్తం చేశారు. 22 మంది ఎంపీలు ఉన్నారు కదా.. దమ్ముంటే విశాఖపట్నంకు రైల్వే జోన్ తీసుకురావాలని సవాల్ విసిరారు.

అలాగే, అమరావతి రైతుల పాదయాత్ర పై పిచ్చి పిచ్చి ప్రేలాపనలు మానుకోవాలని సోమిరెడ్డి చంద్రమోహన్ రెడ్డి హితవుపలికారు. రాజధాని కుప్పంలోనో, నారావారిపల్లిలోనో పెట్టుకుంటే ఏడవాలి గానీ.. రాష్ట్రం నడిబొడ్డులో నిర్మిస్తుంటే మీకొచ్చే కష్టం ఏంటో చెప్పాలని డిమాండ్ చేశారు. అమరావతికి, అభివృద్ధికి సంబంధం లేదని.. చంద్రబాబు హయాంలో వచ్చిన మూడు కేంద్ర ప్రభుత్వ సంస్థలను రాష్ట్రంలోని మూడు ప్రాంతాల్లో ఏర్పాటు చేశారని గుర్తు చేశారు. ఇప్పటికే విశాఖపట్నం భూకుంభకోణంలో రూ. 40 వేల కోట్ల అవినీతి జరిగిందన్నారు. ఈ ప్రభుత్వం కంటే బ్రిటిష్ ప్రభుత్వమే మేలు అన్నట్టుగా ఉందన్నారు. మంత్రులు తమ పదవులకు రాజీనామా చేసి విశాఖపట్నంలో రౌండ్ టేబుల్ సమావేశం పెట్టుకోవాలన్నారు. మంత్రి రోజా జబర్దస్త్‌లో మూడు రాజధానుల స్కిట్ వేయాలని సెటైర్లు వేశారు.