గుండె పగిలే బల్లుతో షాకిచ్చిన ఉబేర్...తరువాత సరిచేసింది

కొన్ని సందర్భాలలో మనకు ఊహించని అనుభవాలు ఎదురవుతుంటాయి. అలాంటి అనుభవమే ఇటీవల ఓ వ్యక్తికి ఎదురైంది. కారులో పావుగంట సేపు ఆరు కిలోమీటర్లు ప్రయాణిస్తే మహా అయితే రూ.150 నుంచి రూ.200 వరకు బిల్లు అవుతుంది. అయితే అంతే ప్రయాణం చేసిన ఓ వ్యక్తికి ఉబర్ సంస్థ తేరుకోలేని షాక్ ఇచ్చింది. ఏకంగా రూ.32 లక్షలు చార్జ్ చేసింది. దాంతో ఆ కస్టమర్‌కు నోటమాట రాలేదు. ఈ అరుదైన ఘటన ఇంగ్లాండ్‌లో చోటుచేసుకుంది. ఒలివర్ కప్లన్ అనే యువకుడికి 15 నిమిషాల ట్రిప్‌ కోసం ఉబర్ సంస్థ ఏకంగా రూ. 32 లక్షలకు పైగా బిల్లు వేసింది. అంటే 35,427 డాలర్లు చార్జ్ చేసింది.

స్నేహితులతో కలసి మందు పార్టీ చేసుకున్న తర్వాత మరుసటి రోజు ఆ మత్తు దిగిన ఒలివర్ ఉబర్ బిల్లును చూసి కంగు తిన్నాడు. తాను చాలాసార్లు ఉబర్‌‌లో ప్రయాణించానని, ఎప్పటిలాగనే రాత్రి కూడా కారులో వెళ్లానని, తాను వెళ్లానుకునే స్థలానికి డ్రైవర్ కరెక్ట్‌గా తీసుకెళ్లాడని ఒలివర్ చెప్పాడు. దాని కేవలం పది నుంచి 11 డాలర్లు ఛార్జ్ అవుతుందని, కానీ ఉబర్ ఏకంగా రూ.32 లక్షలకుపైగా ఛార్జ్ చేసిందని చెప్పాడు. మరుసటి రోజున ఉదయం నిద్ర లేచి చూసేటప్పటికీ ఈ విషయం తనకు తెలిసిందన్నాడు.

అయితే ఒలివర్ ఆ షాక్ నుంచి తేరుకుని వెంటనే ఉబర్ కస్టమర్ కేర్‌ను సంప్రదించాడు. వారు చెప్పిన కారణంతో తేరుకున్నాడు. అయితే డ్రాపింగ్ లొకేషన్ పేరు ఆస్ట్రేలియా అని తప్పుగా పడటంతో బిల్లు ఎక్కువగా వచ్చినట్టు ఉబర్ వివరణ ఇచ్చింది. అందుకే 16000 కిలోమీటర్లకు ఒలివర్‌కు బిల్లు వేశామని ఉబర్ ప్రతినిధులు తెలియజేశారు. ఒలివర్ ప్రయాణ వివరాలు తెలుసుకుని వెంటనే బిల్లును సర్దుబాటు చేశారు. దాంతో ఒలివర్ ఊపిరి పీల్చుకున్నాడు.

అయితే తన బ్యాంకు అకౌంట్‌లో తగినంత డబ్బు లేనందున బతికిపోయానని, లేదంటే 32 లక్షల రూపాయలకుపైగా తీసుకునేవారని, మళ్లీ ఆ డబ్బు వాపసు కోసం తాను వారి వెంట పడాల్సి వచ్చేదని ఒలివర్ కాప్రన్ చెప్పాడు. దాని వల్ల తాను అన్ని రకాలుగా ఇబ్బందుల్లో పడేవాడినని వాపోయాడు. ఆర్థిక సమస్యలు చుట్టుముట్టేవని అన్నాడు. అలాగే అసలు తన డ్రాపింగ్ లోకేషన్ ఆస్ట్రేలియాకు ఎలా సెట్ చేయబడిందో తనకు ఆశ్చర్యంగా ఉందని ఒలివర్ అన్నాడు. బిల్లును చూసి అరగంట సేపు చాలా ఒత్తిడికి గురయ్యానని చెప్పాడు. ఈ అసౌకర్యానికి తమను క్షమించమని ఉబర్ కోరిందని కూడా చెప్పాడు. ఉబర్ షాక్‌తో ఒలివర్‌కు మద్యం మత్తు మొత్తం దిగిపోయింది.