పుట్టిన రోజే ఆ చిన్నారికి చావు రోజైంది
Andhra Pradesh Telugu | Suryaa Desk | Published : Fri, Oct 14, 2022, 09:27 PM
ఓ చిన్నారికి పుట్టిన రోజే చావు రోజుగా మారింది. దీంతో ఆ కుటుంబంలో విషాధ ఛాయలు నెలకొన్నాయి. మృత్యువు ఏ క్షణంలో, ఏ రూపంలో బలి తీసుకుంటుందో ఎవరం ఊహించలేం. ఖమ్మం జిల్లా సత్తుపల్లిలో ఇలాంటిదే విషాద ఘటన చోటు చేసుకుంది. తన పుట్టినరోజు సందర్భంగా స్కూల్లో మిత్రులందరికీ చాక్లెట్లు పంచిపెట్టి, తాతతో కలిసి ఆనందంగా ఇంటికి తిరిగొస్తున్న పదకొండేళ్ల పాప ఆయుష్షు అర్ధంతరంగా ఆగిపోయింది. వాళ్లు వెళ్తున్న మార్గంలో ఓ చెట్టు కొమ్మ అకస్మాత్తుగా విరిగిపడింది. పాప తలపై చెట్టుకొమ్మ పడటంతో తీవ్ర గాయాల పాలై మృతి చెందింది. సత్తుపల్లి పట్టణంలో చోటు చేసుకున్న ఈ ఘటన స్థానికంగా విషాదం నింపింది.
సత్తుపల్లి పట్టణానికి చెందిన లిఖిత (11) స్థానిక డీఏబీ స్కూల్లో ఆరో తరగతి చదువుతోంది. రోజూలాగే శుక్రవారం (అక్టోబర్ 14) ఉదయం పాఠశాలకు వెళ్లింది. తన పుట్టినరోజు కావడంతో స్నేహితులకు, టీచర్లకు చాక్లెట్స్ పంచింది. పాఠశాలలో ఉల్లాసంగా గడిపింది. తరగతులు ముగిసిన వెంటనే పాప తాత పూర్ణ చంద్రరావు తన బైక్పై ఆమెను ఎక్కించుకొని బయల్దేరారు.
తాళ్లమడ గురుకుల పాఠశాల ముందు ఓ చెట్టుకొమ్మ విరిగి పడింది. దీంతో లిఖిత తలకు తీవ్ర గాయాలయ్యాయి. పాప కోసం తల్లడిల్లుతూ ఆ తాత పడిన ఆవేదన అక్కడున్న వారందరినీ కదిలించింది. ఖమ్మం ఆస్పత్రికి తరలిస్తుండగా మార్గమధ్యంలోలో పాప మృతి చెందింది. పుట్టినరోజు నాడే పాపకు నిండు నూరేళ్లు నిండటంతో ఆ కుటుంబ సభ్యులు కన్నీరుమున్నీరుగా రోదిస్తున్నారు.
|
|