ప్రభాస్ అభిమానుల అత్యుత్సాహం...తగలబడిపోయిన థియేటర్

యంగ్ రెబల్ స్టార్ ప్రభాస్ అభిమానులు ప్రదర్శించిన అత్యుత్సాహంతో ఓ సినిమా థియేటర్ తగలబడిపోయింది. ప్రభాస్ బర్త్ డే సందర్భంగా అభిమానులు ఫుల్ హుషార్‌లో ఉన్నారు. కేక్ లు కట్ చేస్తూ తమ అభిమాన నటుడి బర్త్ డేను సెలబ్రేట్ చేసుకుంటున్నారు. సోషల్ మీడియాలో ప్రభాస్‌కు తమ విషెస్ తెలియచేస్తున్నారు. పలువురు సినీ ప్రముఖులతో పాటు అభిమానులు ప్రభాస్‌కు సోషల్ మీడియాలో పుట్టినరోజు శుభాకాంక్షలు చెబుతున్నారు. అయితే ప్రభాస్ బర్త్ డే సందర్భంగా అభిమానులు ప్రదర్శించిన ఉత్యుత్సాహంతో థియేటర్‌లో మంటలు చెలరేగాయి.

ప్రభాస్ బర్త్ డేను పురస్కరించుకుని పశ్చిమగోదావరి జిల్లా తాడేపల్లిగూడెంలోని వెంకట్రామ థియేటర్‌లో బిల్లా సినిమాను ప్రత్యేకంగా ప్రదర్శించారు. ప్రభాస్ ఫ్యాన్స్ అసోసియేషన్ ఈ సినిమా ప్రదర్శనను ఏర్పాటు చేసింది. ఈ సందర్బంగా కొంతమంది అభిమానులు సినిమా థియేటర్‌లో హల్‌చల్ చేశారు. సీట్ల మధ్యలో, సీట్ల మీద క్రాకర్స్ కాల్చారు. దీంతో సీట్లు కాలిపోయి థియేటర్‌లో మంటలు చెలరేగాయి. థియేటర్ మొత్తానికి మంటలు వ్యాపించి పొగలు వచ్చాయి. ఈ పరిణామంతో స్థానికులు కాసేపు టెన్షన్‌కు గురయ్యారు. కానీ థియేటర్ నుంచి అందరూ బయటకు పరగులు తీయడంతో ఎవరికీ ఎలాంటి ప్రమాదం జరగకపోవడంతో అభిమానులు, థియేటర్ యాజమాన్యం ఊపిరి పీల్చుకుంది.

యాజమాన్యం సమాచారం ఇవ్వడంతో అగ్నిమాపక సిబ్బంది థియేటర్ వద్దకు చేరుకుని మంటలను ఆర్పివేశారు. ఈ ఘటనతో సినిమా షోను థియేటర్ యాజమాన్యం మధ్యలోనే ఆపేసి అభిమానులను వెనక్కి పంపించింది. దీపావళి పండుగ సందర్భంగా కొత్త సినిమాలు రావడంతో బిల్లా సినిమా ప్రదర్శనకు సాయంత్రం థియేటర్లు దొరకలేదు. అందుకే ఉదయం 8 గంటల నుంచి పలు థియేటర్లలో బిల్లా సినిమా ప్రదర్శన జరిగింది. ప్రభాస్ బర్త్ డే సందర్భంగా థియేటర్ల వద్ద ఫ్యాన్స్ హంగామా సృష్టిస్తున్నారు. బాణసంచా కాల్చుతూ రచ్చ రచ్చ చేస్తోన్నారు.

ఇదిలావుంటే గతంలో పవన్, మహేష్ బాబు బర్త్ డేల సందర్భంగా జల్సా, పోకిరి సినిమాలను ప్రత్యేకంగా ప్రదర్శించారు. అప్పుడు కూడా పలు అవాంఛనీయ ఘటనలు చోటుచేసుకున్నాయి. షోలో ఆటంకం కలగడంతో థియేటర్ లో సీట్లను అభిమానులు చింపేశారు. దీంతో ఇలాంటి స్పెషల్ షోలను ప్రదర్శించడానికి థియేటర్ యాజమాన్యాలు భయపడుతున్నాయి.