సౌతాఫ్రికా గ్రాండ్ విక్టరీ.. 101 పరుగులకే బంగ్లా ఆలౌట్...!
sports | Suryaa Desk | Published : Thu, Oct 27, 2022, 12:34 PM
సిడ్నీ వేదికగా సూపర్-12లో భాగంగా బంగ్లాదేశ్‌ను దక్షిణాఫ్రికా ఓడించింది. దక్షిణాఫ్రికా 104 పరుగుల తేడాతో విజయం సాధించింది. తొలుత బ్యాటింగ్ చేసిన సఫారీలు 5 వికెట్ల నష్టానికి 205 పరుగులు చేశారు. ఛేజింగ్ లో బంగ్లాదేశ్ బ్యాట్స్ మెన్ ఏమాత్రం ప్రతిఘటించకపోవడంతో.. వచ్చినవారు వచ్చినట్లుగానే పెవిలియన్ బాట పట్టడంతో 101 పరుగులకే ఆలౌటైంది. బంగ్లాదేశ్ ఇన్నింగ్స్ 16.3 ఓవర్ల వద్ద ముగిసింది. నోకియా 3.3 ఓవర్లలో 10 పరుగులిచ్చి 4 వికెట్లు పడగొట్టి బంగ్లాదేశ్ పతనాన్ని శాసించింది. బంగ్లాదేశ్ బ్యాట్స్‌మెన్‌లలో లిటన్ దాస్ 34 పరుగులతో టాప్ స్కోరర్‌గా నిలిచాడు. మిగతా వారంతా ఘోరంగా విఫలమయ్యారు. తొలుత బ్యాటింగ్ చేసిన దక్షిణాఫ్రికా భారీ పరుగులు చేసింది. రిలే రుసోవ్ కేవలం 52 బంతుల్లోనే సెంచరీ పూర్తి చేశాడు. ఈ ప్రపంచకప్‌లో ఇదే తొలి సెంచరీ. రిలే రుసోవ్ ఇన్నింగ్స్‌లో ఎనిమిది ఫోర్లు, ఏడు సిక్సర్లు ఉన్నాయి. సెంచరీ పూర్తి చేసిన తర్వాత రూసో భారీ షాట్‌కు ప్రయత్నించి షకీబ్‌ బౌలింగ్‌లో క్యాచ్‌ ఔటయ్యాడు. 109 పరుగుల వద్ద రిలే రుసోవ్ ఔటయ్యాడు. టీ20ల్లో రిలే రుసోవ్‌కి ఇది రెండో సెంచరీ. దీంతో దక్షిణాఫ్రికా నిర్ణీత ఓవర్లలో ఐదు వికెట్ల నష్టానికి 205 పరుగులు చేసింది. తొలుత టాస్ గెలిచిన దక్షిణాఫ్రికా బ్యాటింగ్ ఎంచుకుంది. డికాక్, రిలే రుసోవ్‌ల మధ్య రెండో వికెట్‌కు 163 పరుగుల భాగస్వామ్యం ఏర్పడింది. డి కాక్ కూడా ఆరంభం నుంచి దూకుడుగా ఆడాడు. 38 బంతుల్లో 63 పరుగులు చేశాడు. రిలే రుసోవ్‌కు ప్లేయర్ ఆఫ్ ద మ్యాచ్ అవార్డు లభించింది.
|
|