వ్యక్తి దారుణ హత్య , కేసు నమోదు చేసిన పోలీస్ లు

అనకాపల్లి జిల్లా నక్కపల్లి మండలం సీహెచ్‌బీ అగ్రహారానికి చెందిన మైలారపు అప్పారావు(45) కుటుంబంతో సహా నాలుగేళ్ల క్రితం గాజువాక వచ్చాడు. వియ్యపువానిపాలెంలో నివాసం ఉంటూ ఓ ప్రైవేటు కంపెనీలో లారీ డ్రైవర్‌గా పనిచేస్తున్నాడు. భార్య ఉమ గాజువాకలోని ఓ హోటల్‌లో స్వీపింగ్‌ సూపర్‌వైజర్‌గా పనిచేస్తున్నది. వీరికి ఇద్దరు పిల్లలున్నారు. అప్పారావు శనివారం రాత్రి విధులు ముగించుకుని ఇంటికి వచ్చి కొద్దిసేపటి తరువాత బయటకు వెళ్లాడు. ఆదివారం తెల్లవారుజామున ఇంటికి సమీపంలో రోడ్డుపై అంబేడ్కర్‌ కాలనీ రోడ్డులో అప్పారావు నిర్జీవంగా పడివుండడాన్ని చూసిన స్థానికులు పోలీసులకు సమాచారం ఇచ్చారు. న్యూపోర్టు పోలీసు స్టేషన్‌ సీఐ రాము సిబ్బందితో సంఘటన స్థలానికి చేరుకుని వివరాలు సేకరించారు. ఇంటి అద్దె చెల్లించేందుకు డబ్బులు లేకపోవడంతో, తన చెవిదిద్దులు తాకట్టుపెట్టి డబ్బులు తెస్తానని చెప్పి శనివారం రాత్రి తన భర్త బయటకు వెళ్లాడని ఉమ పోలీసులకు చెప్పారు. అయితే ఇద్దరు వ్యక్తులు శనివారం రాత్రి అప్పారావు ఇంటికి వచ్చి, అతడిని ద్విచక్రవాహనంపై తీసుకువెళ్లారని, అప్పారావును వారే హత్య చేసి ఉంటారని స్థానికులు అనుమానిస్తున్నారు. ఘటనా స్థలాన్ని ఏడీసీపీ శ్రావణ్‌ కుమార్‌, డీసీపీ సుమిత్‌ పరిశీలించారు. మృతదేహాన్ని పోస్టుమార్టం నిమిత్తం కేజీహెచ్‌ మార్చురీకి తరలించి, కేసు నమోదు చేసి దర్యాప్తు చేస్తున్నట్టు పోలీసులు తెలిపారు. కాగా మృతుడితోపాటు అతని భార్య మొబైల్‌ ఫోన్లను పోలీసులు స్వాధీనం చేసుకుని కాల్‌ డేటాను పరిశీలించారు. హతుడి భార్యతోపాటు, మరో ఇద్దరిని అదుపులోకి తీసుకుని విచారిస్తున్నట్టు తెలిసింది.