దారి దోపిడీ కేసు మిస్టరీని ఛేధించిన పోలీసులు...భార్యే హంతకురాలు

వివాహేతర సంబంధాలు ప్రతి ఒక్కరిని నేర ప్రపంచం వైపు నెడుతున్నాయి. తాజాగా జరిగిన దారిదోపిడి కేసు మిస్టరీ వెనక కూడా ఓ వివాహేతర సంబంధం వెలుులోకి వచ్చింది. చిత్తూరు జిల్లాలో సంచలనంరేపిన దారి దోపిడీ కేసు మిస్టరీ వీడింది. ఈ కేసులో భార్య పక్కా స్కెచ్ వేసి ప్రియుడితో కలిసి ప్లాన్ చేసింది. దుండగులు చంపారని ఆ నేరం వారిపై మోపి పోలీసులను నమ్మించే ప్రయత్నం చేశారు. కానీ భార్యే భర్తను హత్య చేయించినట్లు తేల్చారు. పెద్ద హైడ్రామా నడిచింది.. కానీ అడ్డంగా దొరికిపోయింది. నిందితులను పోలీసులు అరెస్ట్ చేసి వివరాలను వెల్లడించారు.

పుంగనూరు మండలం బత్తలాపురం గ్రామానికి చెందిన దామోదరంకు పెద్దపంజాణి మండలం పెనుగొలకలకు చెందిన అనురాధతో 2021లో వివాహమైంది. దామోదరం తల్లిడండ్రులు అనురాధకు బంగారు నగలు పెట్టి పెళ్లి ఘనంగా జరిపించారు. ఈ క్రమంలో పెద్దపంజాణి మండలం టీకేపల్లెకు చెందిన గంగరాజు పెనుగొలకలలో అనురాథ తండ్రి చంద్రమోహన్‌ దగ్గర పాల క్యాన్లు వేస్తున్నాడు. ఈ క్రమంలో అనురాధతో వివాహేతర సంబంధం ఏర్పరుచుకున్నాడు.

అప్పటికే గంగరాజు ప్రేమ వివాహం చేసుకున్నాడు.. ఇద్దరు ఇద్దరు ఆడపిల్లలు ఉన్నారు. గంగరాజు గంగవరంలోని ప్రశాంత్‌ నగర్‌లో నివాసం ఉంటోంది. అయితే అనురాధకు పెళ్లి అనంతరం కూడా వివాహేతర సంబంధం కొనసాగిస్తూ వచ్చింది. ఈ మధ్య గంగరాజు తన అవసరాల కోసం అనురాధ దగ్గర ఉన్న బంగారు ఆభరణాలు తీసుకుని తాకట్టు పెట్టాడు. ఇంతలో అనురాధ భర్త, అత్తమామలు పుంగనూరులో స్థలం కొనాలని భావించారు.. డబ్బులు తక్కువ కావడంతో అనురాధకు ఇచ్చిన నగలు ఇవ్వమని అడిగారు. ఆమె పుట్టింటిలో నగలు ఉన్నాయని చెప్పి ఎప్పటికప్పుడు తప్పించుకుంది.

అత్తింట్లో నగలు ఇవ్వాల్సి వస్తుందని ప్రియుడు గంగరాజుతో భర్తను చంపేందుకు ప్లాన్ చేసింది. దారి దోపిడీ స్కెచ్ సిద్ధం చేసుకున్నారు. దీపావళికి భర్త దామోదరంతో కలసి బైక్‌పై పెనుగొలకలకు వెళ్లింది. అక్కడి నుంచి తిరిగి వస్తూ మొబైల్‌లో మెసేజ్‌ ద్వారా తాము ఎక్కడ ఉన్నది ప్రియుడు గంగరాజుకు ఎప్పటికప్పుడు అనురాధ సమాచారం ఇచ్చింది. నాగలకుంట చెరువు కట్ట దగ్గరకు రాగానే వీరి బైక్‌ను గంగరాజు ఆపి దామోదరం కంట్లో కారం చల్లాడు. అతడ్ని కత్తితో పొడిచి చంపాడు.

ఎవరికీ అనుమానం రాకుండా అనురాధ తన కత్తితో చేయి, భుజంపై చిన్న గాయాలు చేసుకుంది. గంగరాజు అనురాధ వద్ద ఉన్న నగలు తీసుకుని పారిపోయాడు. దారి మధ్యలో దుండగులు భర్తను కత్తితో పొడిచి చంపారని పోలీసులను నమ్మించడానికి డ్రామా ఆడింది. అనురాధ తీరుపై అనుమానం రావడంతో ఆరా తీశారు. అనురాధ, గంగరాజు దామోదరంను హత్య చేశారని తేలింది. వీరిని పోలీసులు అరెస్ట్ చేశారు. నగలు, మొబైల్స్, బైక్, కత్తిని సీజ్ చేశారు.