సొరకాయ తీగ కోసం గొడవ... మరోసటి రోజు బాధితుడి మరణం

కొన్ని ఘటనలు జీవితంలో ఊహించని మలుపులకు తీసుకెళ్లుంది. ఖమ్మం జిల్లా సత్తుపల్లి మండలం కొత్తూరు గ్రామంలో ఓ వ్యక్తి చనిపోయాడు. అయితే.. ఆ వ్యక్తి చనిపోడానికి కారణం మాత్రం సొరకాయ తీగే కారణమంటా..! ఒక సొరకాయ తీగ.. అంత పెద్ద మనిషి ప్రాణాలు ఎలా తీస్తుంది అనే కదా మీ డౌటు. అక్కడికే వస్తున్నా.. గ్రామానికి చెందిన సూరయ్య తన ఇంటి ముందున్న కంచెను శుభ్రం చేస్తున్నాడు. ఈ క్రమంలోనే కంచెపైకి పారిన సొరకాయ తీగ.. అనుకోకుండా తెగిపోయింది. అయితే.. ఆ తీగ పక్కింటి వాళ్లది కావటంతో.. గొడవ మొదలైంది. సొరకాయ తీగను ఎందుకు తెంపేశావంటూ.. పక్కింటి మహిళ సూరయ్యతో గొడవకు వచ్చింది. ఇద్దరి మధ్య మాట మాట పెరగటంతో.. గొడవ పెద్దదైంది. ఈ క్రమంలోనే పక్కింటి మహిళ అక్కడే ఉన్న ఓ కట్టెతో సూరయ్యను కొట్టింది. దీంతో గొడవ కాస్తా ఘర్షణకు దారి తీసింది. దీంతో.. ఇరుగుపొరుగు వాళ్లు.. ఇరు వర్గాలను అడ్డుకున్నారు. ఇద్దరిని మందలించి పంపించేశారు.

అక్కడితో గొడవ సద్దమణిగిందనుకున్నారంతా.. కానీ.. అసలు ట్విస్టేంటంటే.. తెల్లరేసరికి సూరయ్య ప్రాణాలొదిలాడు. దీంతో.. గ్రామంలో పలు వార్తలు షికార్లు చేశాయి. పక్కింటి మహిళ కొట్టినందుకు.. అవమానంగా భావించిన సూరయ్య మనస్తాపంతోనే ప్రాణాలొదిలాడంటూ అందరూ చెవులు కొరుక్కున్నారు. మరోవైపు.. సూరయ్య మృతదేహాన్ని తీసుకుని పక్కింటి ముందు సూరయ్య బంధువులు ఆందోళనకు దిగారు. అంతటితో ఆగకుండా.. ఆ మహిళపై సత్తుపల్లి పోలీస్ స్టేషన్‌లోనూ ఫిర్యాదు చేశారు. ఆ మహిళ కొట్టటం వల్లే సూరయ్య చనిపోయాడని.. ఆమెపై కఠిన చర్యలు తీసుకుని న్యాయం చేయాలంటూ పోలీసులను కోరారు.

అయితే.. తాను సన్నని కట్టేతో కొట్టనని.. దాని వల్ల సూరయ్యకు పెద్ద దెబ్బలేమీ తగల్లేదని ఆ పక్కింటి మహిళ చెబుతోంది. అలా చేసినందుకు పెద్దమనుషులు ఆమెను మందలించారని.. వెయ్యి రూపాయల జరిమానా కూడా విధించారని చెబుతోంది. ఒకవేళ అంత పెద్ద దెబ్బ తగిలితే అప్పుడే తెలిసేదిగా అంటోంది. సూరయ్య అనారోగ్యంతో చనిపోతే.. అది తన మీద వేస్తున్నారని వాపోయింది. కాగా.. పోలీసులు మాత్రం బాధితుల ఫిర్యాదు మేరకు కేసైతే నమోదు చేశారు. సూరయ్య ఎలా చనిపోయాడన్నది తెలిసేందుకు మృతదేహాన్ని పోస్టుమార్టం నిమిత్తం ఆస్పత్రికి తరలించారు. ఇక ఆ పోస్టు మార్టం రిపోర్టు వస్తే గానీ.. సూరయ్య ఎలా చనిపోయాడన్నది క్లారిటీ రాదు. ఒకవేళ ఆమె కొట్టిన దెబ్బల వల్లే చనిపోయాడని వస్తే మాత్రం.. ఆ మృతికి ప్రధాన కారణం ఆ సొరకాయ తీగనే అవనుంది.