జూనియర్ల దుస్తులు తీసేసి చెడ్డీలపై క్యాట్‌ వాక్‌ .... నెల్లూరు క్రిస్టియన్ మెడికల్ కాలేజీలో ధారుణం

ప్రభుత్వం ఎన్ని చట్టాలు చేస్తున్నా ర్యాగింగ్ భూతం మాత్రం అంతంకావడంలేదు. ర్యాగింగ్ పేరుతో కొంతమంది యువకులు అరాచకంగా ప్రవర్తించారు. దీనికి సంబంధించిన వీడియో వైరల్ అవ్వడంతో ఏడుగురు విద్యార్థులు సస్పెండ్ అయ్యారు. తమిళనాడులోని వెల్లూరులోని ప్రముఖ క్రిస్టియన్ మెడికల్ కాలేజీలో సీనియర్ ఎంబీబీఎస్ విద్యార్థులు... గత నెల జూనియర్లను వేధించారు. దారుణంగా హింసించారు. అయితే దానికి సంబంధించిన వీడియోలు ఇప్పుడు సోషల్ మీడియాలో ప్రత్యక్షమయ్యాయి.

దాంతో ఈ వ్యవహారంపై సర్వత్రా విమర్శలు వ్యక్తమయ్యాయి. దాంతో ఈ విషయాన్ని కాలేజీ యాజమాన్యం సీరియస్‌గా తీసుకుంది. ర్యాగింగ్‌కు పాల్పడిన విద్యార్థులపై చర్యలకు ఉపక్రమించింది. మొదటి సంవత్సరం ఎంబీబీఎస్ విద్యార్థి తనని, సహ విద్యార్థులను వారి సీనియర్లు వేధిస్తున్న దృశ్యాలను సోషల్ మీడియాలో పోస్ట్ చేశాడు. అందులో జూనియర్లను ఏ విధంగా వేధించారో క్లియర్‌గా ఉంది.

మగవాళ్ల హాస్టల్ క్యాంపస్‌లో సీనియర్ విద్యార్థులు.. జూనియర్ల దుస్తులు తీసేసి చెడ్డీలపై క్యాట్‌ వాక్‌ చేయించారు. వారిపై పైపులతో నీరు చల్లుతూ... కర్రలు, బెల్ట్‌తో కొడుతూ ఎంజాయ్‌ చేశారు. అక్కడే ఉన్న ఓ బురద గుంటలో పడుకోవాలని ఆదేశించారు. అంతేకాదు ఒకరినొకరు రుద్దుకోవాలని ఆదేశించి వికృతంగా ప్రవర్తించారు. ఈ విషయంపై కాలేజీ యాజమాన్యం చర్యలు తీసుకుంది.

ప్రాథమిక విచారణ జరిపి.. ర్యాగింగ్‌కు పాల్పడిన ఏడుగురు విద్యార్థులను సస్పెండ్ చేసింది. ఈ విషయాన్ని సీఎంసీ ప్రిన్సిపాల్‌ డాక్టర్ సాల్మన్‌ సతీష్‌కుమార్ ప్రకటించారు. ఈ సందర్భంగా ఇలాంటి సంఘటనలను ఏ మాత్రం సహించేది లేదని, ఇలాంటి వాటికి పాల్పడిన వారు ఎవరైనా శిక్ష అనుభవించాల్సిందే అని ప్రిన్సిపాల్ స్పష్టం చేశారు. అయితే దీంతో సంబంధం ఉన్న కాలేజీ సిబ్బంది, ఇతర వ్యక్తులపై చర్యలు తీసుకోవాలని విద్యార్థులు డిమాండ్ చేస్తున్నారు.