పెళ్లికి లంగా పెట్టిన చిచ్చు... ఏకంగా పెళ్లియే రద్దు అయింది

వివాహం అంటే ఎంతో పవిత్రమైంది. వివాహానికి ముందు జరిగే ఎంగేజ్ మెంట్ అంటే సగం పెళ్లి అయినట్లేనని మన దేశంలోని వారు భావిస్తారు. కానీ ఎంగేజ్ మెంట్ జరిగి పెళ్లికి ముందు.. మండపంలో పెళ్లిళ్లు రద్దుఅవుతున్నాయి. చిన్న చిన్న కారణాలకే పెళ్లిళ్లు క్యాన్సిల్ అవ్వడం కామన్ అయిపోయింది. పెళ్లి పీటల వరకు వచ్చిన వివాహాలు రద్దు అవుతున్నాయి. పెళ్లికొడుకు సమయానికి రాలేదనో.. వధువు డ్యాన్స్ వేసిందనో.. సింపుల్‌గా నో చెప్పేసి.. గుడ్‌ బై చెప్పేసుకుంటున్నారు. అప్పటి వరకు అయిన ఖర్చు గురించి కానీ.. కుటుంబం పరువు, ప్రతిష్టల గురించి కానీ ఏ మాత్రం ఆలోచించడం లేదు. తాజాగా ఓ పెళ్లి కూతురు లెహంగా నచ్చలేదని పెళ్లి రద్దు చేసుకుంది. ఈ ఘటన ఉత్తరాఖండ్‌లో జరిగింది.

హల్ద్వానీలో నివాసించే యువతికి, అల్మోరాలో ఉండే యువకుడికి పెళ్లి కుదిరింది. నవంబర్ 5న పెళ్లికి ముహూర్తం పెట్టుకున్నారు.పెళ్లి తంతులో భాగంగా వరుడు తండ్రి లక్నో నుంచి రూ. 10,000 విలువైన లెహెంగాను ఆర్డర్ చేశారు. దానిని కాబోయే కోడలు కోసం పంపించారు. అయితే అది వధువుకు అసలు నచ్చలేదు. అమ్మాయి తల్లి కూడా తనకు నచ్చలేదని చెప్పింది.

ఈ విషయం అబ్బాయి ఇంట్లో తెలిసింది. దాంతో ఇరు కుటుంబాల మధ్య వాగ్వాదం జరిగింది. అది పెద్ద గొడవగా మారింది. ఈ క్రమంలో వివాహాన్ని రద్దు చేసుకోవాలనే నిర్ణయానికి వచ్చారు. ఈ మేరకు అక్టోబర్ 30వ తేదీన యువకుడు బంధువులు వధువు ఇంటికి వెళ్లి లక్ష రూపాయలు నగదు ఇచ్చి పెళ్లి రద్దు ఒప్పందం చేసుకున్నారు. దానికి రుజువుగా ఒక వీడియో కూడా తీసుకున్నారు.

కానీ అంతలోనే వధువు ఇంటి వాళ్లు మనస్సు మార్చుకున్నారు. వద్దనుకునే వారే మళ్లీ యువకుడి ఇంటికి వెళ్లి పెళ్లి గురించి మాట్లాడారు. దాంతో మళ్లీ ఘర్షణ జరిగింది. ఇరు వర్గాల మధ్య మాటల యుద్ధం జరిగింది. దాంతో ఈ విషయం పోలీసుల వరకూ వెళ్లింది. వారి సమక్షంలో కూడా ఒకరిపై మరొకరు ఆరోపణలు చేసుకున్నారు. పోలీసులు సర్ది చెప్పడంతో గొడవను ఆపి.. ఇక వివాహానికి సంబంధించిన ఆలోచనలు పూర్తిగా విరమించుకున్నారు. ఏదిఏమైనా ఈ ఘటన ఆనంద్ సినిమాలో హీరోయిన్ చీర కోసం పెళ్లి క్యాన్సిల్ చేసుకున్న సీన్ గుర్తు చేస్తుంది. రీల్ లైఫ్‌లోనే కాకుండా.. రియల్ లైఫ్‌లో కూడా జరగడం ఆసక్తికరంగా మారింది.