మృగరాజు టీంపై ఎదురుదాడికి దిగిన దున్నలు...చావుదెబ్బలు తిన్న ముసలి సింహం

అన్ని వేళలు మనవి ఉండవు అన్నది ఈ ఘటనతో మరోసారి రుజువైంది.  ఏకంగా ఓ సింహాన్ని ఓ దున్నల గ్రూప్ చితకబదింది. సింహాన్ని మృగరాజు.. అడవికి రాజు అని అంటారు. అయితే, సింహాలు ఒంటరిగా ఉండవు. 5 నుంచి 16 దాకా కలిసి గుంపులుగా జంతువులను వేటాడుతుంటాయి. ఇలా, గుంపుగా వేటకు వెళ్లి సింహాలు.. అడవి దున్నలపై దాడిచేశాయి. అవి అనూహ్యంగా ఎదురుదాడి చేయడంతో గుంపు పలాయనం చిత్తగించింది. కానీ, ఓ ముసలి సింహం ఆ మందకు చిక్కి చావుదెబ్బలు తింది. ప్రస్తుతం వీడియో ప్రస్తుతం ఇంటర్నెట్‌లో వైరల్ అవుతోంది. ఈ వీడియో క్లిప్‌ను డియోన్ కెల్‌బ్రిక్ అనే ఫోటోగ్రాఫర్ తన ఇన్‌స్టాగ్రామ్‌లో షేర్ చేశాడు. సఫారీ పర్యాటకుల బృందంతో కలిసి పంచుకున్న ఈ వీడియోలో సింహాన్ని గేదెల తమ కొమ్ములతో పొడిచి దాడి చేసి, ఎత్తిపడేయడం గమనార్హం.

‘‘డార్క్ మేన్ అవోకా మగ సింహం గేదెల మంద మధ్య చిక్కుకుని తన ప్రాణాల కోసం పోరాడుతుంది’’ అనే క్యాప్షన్‌తో వీడియోను పోస్ట్ చేశాడు. ‘‘నేను మృగరాజును అనే అహంకారంతో గేదెల మందపై పడి వేటాడేందుకు ప్రయత్నించాయి.. సింహాలపై బర్రెల మంద ఎదురుతిరిగి ప్రతీకారం తీర్చుకోవడంతో అవి తోకముడించాయి.. దురదృష్టవశాత్తు మగ సింహం తన గాయం కారణంగా త్వరగా అక్కడ నుంచి బయటపడలేకపోయింది’’ అని డియోన్ తెలిపాడు.

‘‘ఇది ఎంత విచారకరం.. ఇది అడవి.. ప్రకృతి కొన్నిసార్లు చాలా క్రూరంగా ఉంటుంది.. ఇది మనుగడ కోసం పోరాటం అని మనం ఎల్లప్పుడూ గుర్తుంచుకోవాలి.. ఈ మగ సింహం ఇప్పటికే గత నాలుగు సంవత్సరాలుగా అన్ని అనారోగ్యాలను జయించి బయటపడింది.. తన చివరి శ్వాస వరకు పోరాడింది’’ అని పోస్ట్‌ చేశాడు.

ముసలి సింహం డార్క్ మేన్ అవోకాను సుమారు 15 నిమిషాల పాటు గేదెల మంద తొక్కిపడేసింది. దీంతో తీవ్రంగా గాయపడిన అది సొమ్మసిల్లి పడిపోగా.. మరొకటి సహాయానికి వచ్చింది. ఈ దాడిలో గాయపడిన మేన్ అవోకా.. మూడు రోజుల తర్వాత మృతిచెందడం బాధాకరం. ఇన్‌స్టాగ్రామ్‌లో డియోన్ షేర్ చేసిన వీడియోకు ఇప్పటికే 1.5 మిలియన్లకుపైగా వ్యూస్ వచ్చాయి. ఈ వీడియోను చూసిన నెటిజన్లు షాకవుతున్నారు. ‘‘ఓరి దేవుడో గేదెల మందకు వెర్రెక్కినట్టుంది.. ఈ దాడి చూడటం చాలా బాధాకరం.. వాటి నుంచి బయటపడింది. దాడి తర్వాత డార్క్ మేన్ ఎలా ఉంది? ఆరోగ్య పరిస్థితిపై ఏదైనా అప్‌డేట్ ఉందా?’’ అని ఓ నెటిజన్ అడిగాడు.

‘‘ఓరి దేవుడో ఇది చూడటానికి చాలా కష్టంగా ఉంది.. ఇది జరిగే సమయంలో మీరు, తోటి పర్యాటకులు ఎంత కష్టపడ్డారో ఊహించలేం... పరిస్థితులు వ్యతిరేకంగా ఉన్నప్పటికీ అధిగమించగలడని ఆశిస్తున్నాం.. వీడియో షేర్ చేసినందుకు ధన్యవాదాలు అని మరో నెటిజన్ రాయగా... ‘‘ఎవరూ ఆ సింహానికి సహాయం చేయడానికి ముందుకు రాలేదు.. ప్రకృతి ప్రకృతి కానీ ఆ గేదెలు కేవలం దానిని చంపాలని భావించినట్టున్నాయి.. ఈ సింహం అలసిపోయింది’’ అని మరో వ్యక్తి వ్యాఖ్యానించారు.