అంతర్ రాష్ట్ర గజ దొంగ అరెస్ట్

అంతర్ రాష్ట్ర గజ దొంగ తెలుగు నాగిరెడ్డి అలియాస్ మల్లెపూల నాగిరెడ్డి (30)ను వై. ఎస్. ఆర్ జిల్లా పోలీసులు అరెస్టు చేసినట్లు జిల్లా ఎస్పీ అన్బురాజన్ తెలిపారు. గురువారం కడప జిల్లా పోలీస్ కార్యాలయంలో ఎస్పీ విలేకరుల సమావేశాన్ని నిర్వహించారు. ఎస్పీ మాట్లాడుతూ తెలంగాణ, కర్ణాటక, మహారాష్ట్రలో మొత్తం 25 కేసుల్లో ముద్దాయి గా ఉన్న ఛత్తీస్ గఢ్ కు చెందిన నాగిరెడ్డి 16 కేసుల్లో మోస్ట్ వాంటెడ్ గా నిందితుడు ఉన్నాడు అని అన్నారు. ముద్దాయిని కొండాపురం క్రాస్ వద్ద అరెస్టు చేసినట్లు తెలిపారు.

నిందితుడు చిన్న తనం నుండే దొంగతనాలు మొదలుపెట్టి వరుస దొంగతనాలకు పాల్పడుతున్నట్లు పేర్కొన్నారు. ఛత్తీస్ గఢ్ నుండి గుత్తి కి వచ్చి హోటళ్లలో, దాబాల్లో ఉంటూ దొంగతనాలకు పాల్పడే ఊళ్లలో మొదట బైకును దొంగిలించి తాళం వేసిన ఇళ్లను లక్ష్యంగా చేసుకుని గజదొంగ నాగిరెడ్డి నేరాలకు పాల్పడుతున్నట్లు తెలిపారు. దొంగతనాలకు పాల్పడితే కఠిన చర్యలు తీసుకుంటాం అన్నారు. అంతర రాష్ట్ర గజ దొంగ నాగిరెడ్డి పై పి. డి చట్టం ప్రయోగిస్తాం అని జిల్లా ఎస్. పి తెలిపారు.

కరడు గట్టిన అంతర్ రాష్ట్ర గజ దొంగ నాగిరెడ్డిని అరెస్ట్ చేసి చోరీ సొత్తు స్వాధీనం చేసుకోవడంలో కృషి చేసిన ఫ్యాక్షన్ జోన్ డి. ఎస్. పి చెంచుబాబు ఆధ్వర్యంలో కొండాపురం సి. ఐ సుదర్శన్ ప్రసాద్, కడప తాలూకా ఎస్. ఐ తాహర్ హుస్సేన్, కలమల్ల ఎస్. ఐ శివప్రసాద్, కొండాపురం ఎస్. ఐ ఎం. సత్యనారాయణ, సి. సి. ఎస్. హెడ్ కానిస్టేబుల్ ఎస్. రవి, ఏ. ఆర్ పి. సి రాహుల్, హోమ్ గార్డు శివారెడ్డి లను జిల్లా ఎస్. పి అన్బురాజన్ ప్రత్యేకంగా అభినందించారు. నగదు రివార్డులు అందచేశారు.