రారండోయ్ బీఆర్ఎస్ లోకి....నేతలను ఆహ్వానిస్తున్న బీఆర్ఎస్

ఇతర రాష్ట్రాల్లో విస్తరించాలని భావిస్తున్న బీఆర్ఎస్ అందుకు అనుగుణంగా వివిధ రాష్ట్రాల్లో నేతలను గాళంవేసే పనిలో నిమగ్నమైంది. ఇప్పటికే.. కర్టాటక మాజీ సీఎం కుమారస్వామి బీఆర్ఎస్‌కు మద్దతివ్వగా.. మిగతా రాష్ట్రాలల్లోనూ మద్దతు కూడగట్టుకునే పనిలో పడింది. కాగా.. మరో తెలుగు రాష్ట్రమైన ఆంధ్రప్రదేశ్‌ లో మాత్రం మద్దతుపై కాకుండా.. జనాదరణ ఉన్న నాయకులను పార్టీలోకి ఆహ్వానించే పనిలో పడినట్టు సమాచారం. అందులో భాగంగానే.. పలువురు కీలక నేతలపై ఇప్పటికే బీఆర్ఎస్ నాయకులు దృష్టి సారించినట్టు సమాచారం. ఈ క్రమంలోనే.. మాజీ ఐపీఎస్ లక్ష్మీనారాయణ కు పార్టీ నుంచి ఆహ్వానం అందినట్టు తెలుస్తోంది లక్ష్మీనారాయణతో సమావేశం కోసం మంత్రి తలసాని శ్రీనివాస్ యాదవ్ ప్రయత్నించినట్టు వార్తలు వినిపిస్తున్నాయి. కాగా.. ఏ పార్టీలో చేరాలి అన్నదానికి ఇంకా సమయముందని మంత్రి ఆహ్వానానికి లక్ష్మీనారాయణ బదులిచ్చినట్టు సమాచారం. అయితే.. ఇప్పటికే లక్ష్మీనారాయణ ఆమ్ ఆద్మీ పార్టీతో టచ్‌లో ఉన్నట్టు తెలుస్తోంది.

అయితే.. బీఆర్ఎస్ ఆవిర్భావం నుంచి మరో తెలుగు రాష్ట్రమైన ఆంధ్రప్రదేశ్‌ మీద నాయకత్వం ప్రత్యేక దృష్టి పెట్టినట్టు తెలుస్తోంది. త్వరలో ఆంధ్రప్రదేశ్‌ శాఖను కూడా ప్రారంభించనున్నట్టు వార్తలు వినిపిస్తున్నాయి. అందుకు అనుగుణంగానే.. బీఆర్ఎస్‌కు అనుకూలంగా ఏపీలో భారీగా ఫ్లెక్సీలు కూడా వెలిశాయి. అయితే.. పలువురు నేతలతో ఫోన్లలో టచ్‌లో ఉన్నట్టు వార్తలు వస్తున్న నేపథ్యంలో.. మాజీ జేడీ లక్ష్మీనారాయణ అంశం తెర మీదికి రావటం ఆసక్తికరంగా మారింది. లక్ష్మీ నారాయణకు మంత్రి తలసాని టచ్‌లో ఉన్నట్టు వస్తున్న వార్తలు నిజమే అయినప్పటికీ.. ఏపీ శాఖను ప్రారంభించే సమయంలో ఆహ్వానించేందుకే సంప్రదించారా.. లేదా పార్టీలో చేరేందుకే ఆహ్వానించారా.. అన్నది మాత్రం తెలియాల్సి ఉంది.

ఇదిలా ఉంటే.. లక్ష్మీనారాయణ మాత్రం వచ్చే ఎన్నికల్లో రాజకీయంగా పోటీ చేయనున్నట్టు వెల్లడించారు. అది కూడా విశాఖపట్నం నుంచే.. పోటీ చేస్తానని కూడా తెలిపారు. అయితే.. ఏ పార్టీ నుంచి పోటీ చేస్తారన్నది మాత్రం స్పష్టం చేయలేదు. దీనికి సంబంధించి.. ఆప్ నాయకత్వం లక్ష్మీనారాయణతో ఇప్పటికే చర్చలు జరుపుతుండగా.. తెర మీదికి ఇప్పుడు బీఆర్ఎస్ కూడా రావటంతో.. ఏ పార్టీలోకి వెళ్తారు.. అన్నది ఆసక్తికరంగా మారింది. ఇదిలా ఉండగా.. బీఆర్ఎస్‌ పార్టీకి మద్దతు ఇవ్వటంపై ఏపీ నేతలు రకరకాలుగా స్పందిస్తున్నారు. ఇది అధికారంలో ఉన్న వైఎస్సార్ కాంగ్రెస్ పార్టీ నేతలు కూడా పార్టీని ఆహ్వానిస్తున్నట్టు ప్రకటించటం గమనార్హం.