కుటుంబ పాలన దేశానికి పట్టిన చీడ: జీవీఎల్
Andhra Pradesh Telugu | Suryaa Desk | Published : Sun, Dec 25, 2022, 11:43 PM
ప్రాంతీయ పార్టీల కుటుంబ పాలన దేశానికి పట్టిన చీడ అని బీజేపీ రాజ్యసభ సభ్యుడు జీవీఎల్ నరసింహారావు దుయ్యబట్టారు. కుటుంబ పాలనకు బీజేపీ పూర్తి వ్యతిరేకమని.. అందుకే రాష్ట్రంలో అరాచక పాలన సాగిస్తున్న వైసీపీని గద్దెదించడమే తమ లక్ష్యమన్నారు.
దుష్ట పరిపాలనకు ఆంధ్రప్రదేశ్ అడ్డాగా మారిందని.. గత మూడున్నర ఏళ్లుగా ఓటు బ్యాంక్ రాజకీయాలే జరుగుతున్నాయని జీవీఎల్ విమర్శించారు. టీడీపీ, వైసీపీ పార్టీలు అభివృద్ధి చేయలేకపోయారని ఫైరయ్యారు. జాతీయ జీడీపీలో 9 శాతం ఐటీ రంగం నుంచే వస్తుందని.. అలాంటి ఐటీ రంగాన్ని ఏపీ ప్రభుత్వం పూర్తిగా నిర్వీర్యం చేసిందని మండిపడ్డారు. ఆంధ్రప్రదేశ్లో ఐటీ కంపెనీలను తరిమేస్తున్నారని, ఎవరు ప్రతిపక్షంలో ఉన్నా హైదరాబాద్కే పరిమితం అవుతున్నారన్నారు.
గతంలో వైఎస్ జగన్మోహన్ రెడ్డి ప్రతిపక్ష నేతగా ఉన్నప్పుడు హైదరాబాద్ కేంద్రంగా రాజకీయాలు చేశారని.. ఇప్పుడు చంద్రబాబు సైతం హైదరాబాద్ నుంచే రాజకీయాలు చేస్తున్నారని జీవీఎల్ వ్యాఖ్యానించారు. మీరు గెలిస్తేనే ఆంధ్రాలో ఉంటారా అని ప్రశ్నించారు. ఆంధ్రప్రదేశ్లో బీజేపీకి అవకాశం ఇస్తే డబుల్ ఇంజన్ పాలన చేసి చూపిస్తామన్నారు. దేశభక్తి కలిగిన బీజేపీకి అవకాశం ఇవ్వాలని ఏపీ ప్రజలకు పిలుపునిచ్చారు.
|
|