ఆ నాణేం తీసుకొస్తే రూ.5 పైసలకే బిర్యానీ

న్యూ ఇయర్ ఆఫర్ కింద  ఓ హోటల్ యజమాని బిర్యానిని ఆఫర్ చేశాడు. న్యూ ఇయర్ వచ్చిందంటే చాలు ఆ సందడే వేరు. ఇక డిసెంబర్ 31న ఏడాది చివర రోజు హడవుడి అంతా ఇంతా కాదు. మద్యం దుకాణాలు, రెస్టారెంట్లు, పబ్‌లు, హోటళ్లు, బేకరీలు కిటకటలాడతాయి. డిసెబంర్ 31న వాటి యజమానులు ప్రత్యకే ఆఫర్లు కూడా ప్రకటిస్తుంటారు. ఇక దేనిపైనైనా ఆఫర్ ఉందంటే మనం ఊరుకుంటామా ! ఎగబడి మరీ కొనేస్తుంటాం. ఇక మనకిష్టమైన బిర్యానీపై ఆఫర్ అంటే.. అదీ కూడా ఐదు పైసలకే బిర్యానీ అంటే.. ఇక చెప్పెదేముంది. హోటల్ మందు బారులు తీరుతాం. ఈ క్రమంలోనే ఓ రెస్టారెంట్ ఇచ్చిన ఆఫర్.. వారిని ఇబ్బందుల్లోకి నెట్టింది. రూ.5 పైసల నాణెం తీసుకొస్తే.. బిర్యానీ ఇస్తామన్న ఆఫర్ బెడిసి కొట్టింది. బిర్యానీ కోసం జనం రెస్టారెంట్ ముందు బారులు తీరటంతో యాజమాన్యం చేతులెత్తేసింది. దీంతో పోలీసులు రంగలోకి దిగాల్సి వచ్చింది.

వివరాల్లోకి వెళితే.. నంద్యాల పట్టణం పద్మావతి నగర్‌లోని క్లాసిక్‌ జైల్‌ రెస్టారెంట్‌ నిర్వాహకులు డిసెంబర్ 31 సందర్భంగా పాత 5 పైసల నాణెం ఇస్తే బిర్యానీ ఇస్తామంటూ ఆఫర్‌ ప్రకటించారు. ఈ విషయం తెలుసుకున్న పట్టణవాసులు.. తమ ఇంట్లోని పాత బీరువాలు, అల్మారాలు వెతికి మరీ రూ. 5 పైసల నాణేలు తీసుకొని రెస్టారెంట్‌కు తరలివచ్చారు. గుంపులు గుంపులుగా జనం రెస్టారెంట్‌కు తరలిరావటంతో తరలిరావటంతో రహదారిలో ట్రాఫిక్‌ జామ్‌ అయింది. బిర్యానీ కోసం జనాల మధ్య తోపులాట జరిగింది.

విషయం తెలుసుకున్న పోలుసులు అక్కడికి చేరుకొని వారిని అదుపు చేసే ప్రయత్నం చేశారు. పరిస్థితి అదుపులోకి రాకపోవటంతో స్వల్పంగా లాఠీ చార్జ్‌ చేయాల్సి వచ్చింది. అనంతరం జనాలను అక్కడి నుంచి పంపేసి రెస్టారెంట్‌ను మూసేయించారు. ఆఫర్ పేరుతో న్యూసెన్స్‌కు కారణమైన రెస్టారెంట్‌ నిర్వాహకులపై కేసు నమోదు చేస్తామని పోలీసులు వెల్లడించారు.