ఎలాన్ మస్క్ గిన్నిస్ రికార్డ్ లో ఎక్కేశారు

ఎలాన్ మస్క్ ఈ పేరు తెలియనివారుండరు.  టెస్లా, స్పేస్ ఎక్స్ సంస్థల సీఈఓ. ఇటీవల సోషల్ మీడియా దిగ్గజం ట్విట్టర్‌ను కూడా ఆయన దక్కించుకున్నారు. బోరింగ్ కంపెనీ కూడా ఈయనదే. ఇప్పుడు మస్క్ గిన్నిస్ వరల్డ్ రికార్డ్ సృష్టించారు. ఈ రికార్డు మస్క్‌కే అవమానకరంగా, సిగ్గుపడేలా ఉంది. మస్క్ సహా ఎవరూ ఇది కలలో కూడా ఊహించి ఉండరేమో. ఇంతకీ ఆ గిన్నిస్ వరల్డ్ రికార్డ్ ఎందులో అనుకుంటున్నారా? తన వ్యక్తిగత సంపదకు సంబంధించి ఈ చెత్త రికార్డును తన పేరిట లిఖించుకున్నారు మస్క్. 2021 నవంబర్ నుంచి ఏకంగా 180 బిలియన్ డాలర్ల సంపదను కోల్పోయారు ఈ దిగ్గజ పారిశ్రామిక వేత్త. భారత కరెన్సీలో ఇది దాదాపు రూ.15 లక్షల కోట్లకుపైనే కావడం గమనార్హం. గిన్నిస్ వరల్డ్ రికార్డ్ ప్రకారం ఇది అంచనా మాత్రమే.

మస్క్ కంటే ముందు ఈ రికార్డు జపాన్‌కు చెందిన టెక్ ఇన్వెస్టర్ మసయోషి సన్ పేరిట ఉండేది. ఆయన 2000 సంవత్సరంలో 58.6 బిలియన్ డాలర్లు కోల్పోయి.. ఆ రికార్డుల్లోకి ఎక్కారు. ఇప్పుడు మస్క్ అంతకంటే దాదాపు మూడింతలు కోల్పోయి భవిష్యత్తులో మరెవరూ సాధించని రీతిలో ఒక మెట్టు ముందే ఉన్నారు. ఫోర్బ్స్ మ్యాగజైన్ ప్రకారం.. ఎలాన్ మస్క్ సంపద 2021 నవంబర్‌లో 320 బిలియన్ డాలర్లుగా ఉండేది. ఇది భారత కరెన్సీలో రూ.26 లక్షల కోట్లకుపైనే. 2023 జనవరి నాటికి అది 138 బిలియన్ డాలర్లకు పడిపోయింది. అంటే ఇది సుమారు రూ.11 లక్షల కోట్లు అన్నమాట. ప్రస్తుతం తన దగ్గర ఉన్న సంపద కంటే చాలా ఎక్కువ కోల్పోవడం గమనార్హం. తన టెస్లా కంపెనీ పేలవ ప్రదర్శన కారణంగా మస్క్ సంపద భారీగా తగ్గిపోయింది. టెస్లా షేర్లు దారుణంగా పడిపోయాయి. మస్క్ వాటా కూడా ఇందులోనే ఎక్కువగా ఉండటంతో.. సంపద గణనీయంగా పతనమైంది.

ఇదే క్రమంలో మస్క్ ప్రపంచ కుబేరుల జాబితాలోనూ తన అగ్రస్థానాన్ని కొద్దిరోజుల కిందట కోల్పోయిన సంగతి తెలిసిందే. లగ్జరీ గూడ్స్ గ్రూప్ ఎల్వీఎంహెచ్ ఫౌండర్, ఫ్రాన్స్‌ దిగ్గజ వ్యాపారవేత్త బెర్నార్డ్ ఆర్నాల్ట్ తన స్థానాన్ని ఆక్రమించారు. తన సంపద 190 బిలియన్ డాలర్లుగా ఉంది. చరిత్రలోనే అత్యధిక సంపద పోగొట్టుకున్న వ్యక్తిగా మస్క్ నిలిచినప్పటికీ.. ఇంకా అత్యంత ధనవంతుల జాబితాలో రెండో స్థానంలోనే ఉండటం విశేషం. అయితే బ్లూమ్‌బెర్గ్ బిలియనీర్స్ ఇండెక్స్ ప్రకారం.. మస్క్ 200 బిలియన్ డాలర్లకుపైగా కోల్పోయారని తెలిసింది.

ట్విట్టర్‌ను దక్కించుకున్నప్పటినుంచి మస్క్.. టెస్లాను పట్టించుకోవట్లేదనే వాదనలు వినిపించాయి. ఈ క్రమంలోనే గతేడాది టెస్లా షేరు 65 శాతం మేర పతనమైంది. 2021లో టైమ్స్ మ్యాగజైన్ పర్సన్ ఆఫ్ ది ఇయర్ టైటిల్ గెల్చుకున్న మస్క్.. ఇప్పుడు మాత్రం అత్యధిక సంపద పోగొట్టుకున్న వ్యక్తిగా గిన్నిస్ రికార్డుల్లోకి ఎక్కడం ఊహించని పరిణామం.